မင်းဘူး၊ ၁၁ ဇွန်
မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့တွင် ၂၀၂၀ ပြည့်နှစ် အစိုးရပါဠိပထမပြန် စာမေးပွဲ မင်းဘူးစာဖြေဌာန၌ ဖြေဆိုအောင်မြင်တော်မူကြသော သံဃာတော်များနှင့် သီလရှင်များအား သတ္တမ အကြိမ်မြောက် အောင်လက်မှတ်များနှင့် လှူဖွယ်ဝတ္ထုငွေများ ဆက်ကပ်လှူဒါန်းပွဲ အခမ်းအနားကို (၁၃၈၃ ခုနှစ် နယုန်လဆန်း ၁ ရက်) ဇွန် ၁၀ရက် ညနေ ၃ နာရီက မင်းဘူးမြို့ ဓာတ်တော်ကုန်းဘုရားစေတီတော်ရှိ သံဃသာမဂ္ဂီ သိမ်ဓမ္မာရုံတော်ကြီးအတွင်း၌ ကျင်းပခဲ့ သည်။
အခမ်းအနားတွင် အစိုးရ ပါဠိပထမပြန်စာမေးပွဲ မင်းဘူးစာဖြေဌာန ကြီးကြပ်ရေးအဖွဲ့ဥက္ကဋ္ဌ ရွှေတွင်းကျောင်းတိုက်ဆရာတော် ဘဒ္ဒန္တသာသနမှ ဩဝါဒကထာ ချီးမြှင့်မိန့်ကြားတော်မူပြီး ကြီးကြပ်ရေးအဖွဲ့ ဆရာတော်ကြီး (၁၁)ပါးအား လှူဖွယ်ဝတ္ထုငွေများ ဆက်ကပ်လှူဒါန်းသည်။ ထို့နောက် စာအောင် ရဟန်း/ သာမဏေ/သီလရှင် စုစုပေါင်း (၁၇)ပါးတို့အား အောင်လက်မှတ်များနှင့် လှူဖွယ်ဝတ္ထုငွေများကို ဌာနဆိုင်ရာတာဝန်ရှိသူများနှင့် အလှူရှင်မိသားစုများက အသီးသီး ဆက်ကပ်လှူဒါန်းခဲ့ကြသည်။
အဆိုပါ စာမေးပွဲတွင် ရဟန်း/သာမဏေ/သီလရှင် (၂၉)ပါး ဝင်ရောက်ဖြေဆိုခဲ့ရာ ပထမကြီးတန်းတွင် ရဟန်း ၂ ပါး၊ ပထမလတ်တန်းတွင် ရဟန်း ၃ ပါး၊ ပထမငယ်တန်းတွင် ရဟန်း ၂ ပါးနှင့် သီလရှင် ၂ ပါး၊ အခြေပြုမူလတန်းတွင် ရဟန်း ၅ ပါးနှင့် သီလရှင် ၃ ပါး၊ စုစုပေါင်း (၁၇)ပါး အောင်မြင်ခဲ့ကြောင်း သိရသည်။
မောင်မောင်(မင်းဘူး)
