ကောလင်း ၂၀ နိုဝင်ဘာ
စစ်ကိုင်းတိုင်းဒေသကြီး၊ ကသာခရိုင်၊ ကောလင်းမြို့နယ် ကန်ပေါက်ကြီး ကျေးရွာအနီး ကျောက်ဖျာကော တောင်ပေါ်မှ ရွှေပါဝင်သော ဗြုန်းမြေစာအိတ်များ တင်ဆောင်ထားသည့် ယာဉ် တစ်စီးအား ဖမ်းမိခဲ့ကြောင်းသိရသည်။
ဖြစ်စဉ်မှာ နိုဝင်ဘာ ၁၉ ရက် ညနေပိုင်းက ကောလင်းမြို့၊ သတ္ထုတွင်း ဝန်ကြီးဌာနမှလ/ထ၂ ဦးကျော်ဇင်လတ် ဦးစီးသောအဖွဲ့သည်ဒုရဲအုပ် အောင်မြင့်မြတ်အဖွဲ့နှင့်ပူးပေါင်း၍ ကောလင်း မြို့နယ်၊ ကန်ပေါက်ကြီး ကျေးရွာအနီး ကျောက်ဖျာကောတောင်ပေါ်တွင် တရားမဝင် ရွှေသတ္ထု တူးဖော်နေကြောင်း သတင်းအရ သက်သေများနှင့်အတူ ဝင်ရောက်ဖမ်းဆီးရာ ကောလင်းမြို့နယ်၊ ရွှေတွင်း ကျေးရွာနေ ဝင်းဇော်ဦးဆိုသူ မောင်းနှင်လာသော 6F/---- ယာဉ်ပေါ်တွင် တရားမဝင် ရွှေသတ္ထု ပါဝင်သော ဗြုန်းမြေစာအိတ်အလုံး (၂၀) စစ်ဆေးတွေ့ရှိခဲ့ကြောင်း သိရသည်။
အဆိုပါ ဖြစ်စဉ်နှင့်စပ်လျဉ်း၍ ရွှေသတ္ထုပါ ဗြုန်းမြေစာအိတ်များ တရားမဝင် သယ်ဆောင်သူ ဝင်းဇော်ဦးအား ကောလင်းမြို့မရဲစခန်းမှ ရွှေသတ္ထု ဥပဒေအရ ဖမ်းဆီးအရေးယူ ဆောင်ရွက် ထားကြောင်း သိရပါသည်။
လူအောင်(ကသာ)