နေပြည်တော် ၁၈ နိုဝင်ဘာ
ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ဆောင်ရွက်ရေး ကော်မတီ၏ (၂၀)ကြိမ်မြောက် လုပ်ငန်းညှိနှိုင်းအစည်းအဝေးကို ယနေ့မွန်းလွဲပိုင်းတွင် နေပြည်တော်ရှိ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန အစည်းအဝေးခန်းမ၌ ကျင်းပသည်။
အဆိုပါအစည်းအဝေးသို့ ရခိုင်ပြည်နယ်ဆိုင်ရာအကြံပြုချက်များအပေါ် အကောင်အထည် ဖော်ဆောင်ရွက်ရေးကော်မတီဥက္ကဌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး၊ ကော်မတီဒုတိယဥက္ကဌ နိုင်ငံတော် အတိုင်ပင်ခံရုံးဝန်ကြီးဌာန ဒုတိယဝန်ကြီးဦးခင်မောင်တင်၊ ကော်မတီအတွင်းရေးမှူး နယ်စပ်ရေး ရာဝန်ကြီးဌာန ဒုတိယဝန်ကြီး ဗိုလ်ချုပ်သန်းထွဋ်နှင့် ကော်မတီဝင်များ တက်ရောက်ကြသည်။
အစည်းအဝေးတွင် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေးကော်မတီဥက္ကဌ၊ ပြည်ထောင်စုဝန်ကြီး ဒေါက်တာဝင်းမြတ်အေးက ယခုအစိုးရ စတင်တာဝန်ယူစဉ်ကတည်းက ရခိုင်ပြည်နယ်အရေးကိစ္စကို နိုင်ငံဖွံ့ဖြိုးတိုးတက်ရေးအတွက် အရေးကြီးသော ဦးစားပေးလုပ်ငန်းအဖြစ် သတ်မှတ်ပြီး ရခိုင်ပြည်နယ်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးအတွက် အကောင်အထည်ဖော်ဆောင်ရွက်ခဲ့ပါကြောင်း၊ ဖွံ့ဖြိုးတိုးတက်ရေးကို အဟန့်အတား အနှောင့်အယှက်ဖြစ်စေသည့်ရေရှည် ပဋိပက္ခများ၏ အခြေခံအကြောင်းအရင်းများကို ဖော်ထုတ်ရန်လိုအပ်သည့်အတွက် ဒေါက်တာကိုဖီအာနန် ဦးဆောင်သော ရခိုင်ပြည်နယ်ဆိုင်ရာ အကြံပေးကော်မရှင်ကို ဖွဲ့စည်းခဲ့ပါကြောင်း၊ အဆိုပါကော်မရှင်ကအကြံပြု ချက်(၈၈)ချက် တင်ပြခဲ့ပါကြောင်း၊ ဒုတိယသမ္မတ ဦးမြင့်ဆွေ ဦးဆောင်သော မောင်တောဒေသစုံစမ်းစစ်ဆေး ရေးကော်မရှင်ကလည်း အကြံပြုချက် (၄၈)ချက်တင်သွင်းခဲ့ပါကြောင်း၊ ကော်မရှင် (၂)ခု ၏ အကြံပြုချက်များကို အကောင်အထည်ဖော် ဆောင်ရွက်နိုင်စေရန် ရခိုင်ပြည်နယ် ဆိုင်ရာအကြံပြုချက်များ အပေါ်အကောင်အထည်ဖော်ရေးကော်မတီကို ၂၀၁၇ ခုနှစ် စက်တင်ဘာ (၁၂)ရက်တွင် စတင်ဖွဲ့စည်းခဲ့ပါကြောင်း။
ကော်မတီအနေဖြင့် (၂၅)လကျော်သက်တမ်းကာလ အတွင်း သက်ဆိုင်ရာလွှတ်တော်များ၊ ရခိုင်ပြည်နယ်အစိုးရအဖွဲ့၊ သက်ဆိုင်ရာဝန်ကြီးဌာနများ၊ အစိုးရမဟုတ် သောအဖွဲ့အစည်းများ၊ မိတ်ဖက်အဖွဲ့အစည်းများ၊မိတ်ဆွေနိုင်ငံများ၊ ကုလသမဂ္ဂ အဖွဲ့အစည်းများ၊ အာဆီယံနိုင်ငံများနှင့် ပူးပေါင်းဆောင်ရွက်လျက်ရှိကြောင်း၊ ကော်မတီအနေဖြင့် လုပ်ငန်းအကောင် အထည်ဖော်ဆောင် ရွက်မှု များကို နိုင်ငံတစ်ဝန်းရှိ ပြည်သူများ သိရှိနိုင်စေရေး အတွက် (၄)လ တစ်ကြိမ် ပြည်သူသို့ အစီရင်ခံစာကိုတင်ပြလျက်ရှိပါကြောင်း၊ ကော်မတီ၏လုပ်ငန်းများ အကောင် အထည်ဖော်တိုးတက် ဆောင်ရွက်မှုများကို အစီရင်ခံစာများတွင် အထောက်အထားအဖြစ် မြင်တွေ့ သိရှိနိုင်မည်ဖြစ်ပါ ကြောင်း၊ ကော်မတီအနေဖြင့် ရခိုင်ပြည်နယ်အတွင်း လူမှုသဟဇာတဖြစ်ရေးနှင့် လူမှုစီးပွားဘဝ ဖွံ့ဖြိုးတိုးတက်မှုအတွက် အစဉ်တစိုက်ဆောင်ရွက်ပေး လျက်ရှိပါကြောင်း၊ ယနေ့ အစည်းအဝေး တွင်လက်တွေ့ကျသောရှေ့ ဆက်ဆောင်ရွက်ရေး လုပ်ငန်းများကို ဆွေးနွေး ရန်ဖြစ် ကြောင်း၊ ကော်မတီ၏ လုပ်ငန်းဆောင်ရွက်မှုများ ပိုမိုအားကောင်း လာစေရေးအတွက် ရခိုင်ပြည် နယ်အတွင်း တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးအတွက် အစိုးရ၊ ပုဂ္ဂလိကနှင့် ပြည်သူ များပါဝင်ပူးပေါင်း ဆောင်ရွက်သောလူသားချင်းစာနာမှု အကူအညီ အထောက်အပံ့ပေးရေး၊ ပြန်လည်နေရာချထားရေး၊ ဖွံ့ဖြိုးရေး စီမံကိန်း (Union Enterprise for Humanitarian Assistance, Resettlement and Development in Rakhine-UEHRD)ကော်မတီ၏ လုပ်ငန်းအဖွဲ့များနှင့် လည်း ပူးပေါင်းဆောင်ရွက်လျက်ရှိပါကြောင်း။
ရခိုင်ပြည်နယ်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးအတွက် အကျပ်အတည်း (၃)ရပ်ဖြစ်သည့် ဖွံ့ဖြိုးမှုဆိုင်ရာ အကြပ်အတည်း၊ လူ့အခွင့်အရေးဆိုင်ရာ အကြပ်အတည်းနှင့် လုံခြုံရေးဆိုင်ရာ အကျပ်အတည်းများကို ဖြေရှင်းဆောင်ရွက်ရာတွင် ကောင်းမွန်သောရလဒ်များ ရရှိစေရန်မဟာ ဗျူဟာများ ရေးဆွဲဆောင်ရွက်လျက်ရှိရာနိုင်ငံသားဖြစ်မှု၊ လွတ်လပ်စွာသွားလာခွင့်၊ IDP ကိစ္စရပ်များ၊ ပညာရေးနှင့်ကျန်းမာရေး ကဏ္ဍများမှာဦးစားပေး ကဏ္ဍများဖြစ်၍မူဝါဒ၊ ဥပဒေများနှင့်အညီ ဆောင်ရွက်ပေးနိုင်ရန်လုပ်ငန်းစဉ်များ ချမှတ်နိုင်ရေး အရေးကြီးပါကြောင်း၊စီမံကိန်းကာလများ၊ စီမံကိန်းအကောင်အထည်ဖော်ရန် ဘဏ္ဍာငွေလျာ ထားမှုများ၊ ပူးပေါင်းဆောင်ရွက်နိုင်မှုများကို ဝိုင်းဝန်း ညှိနှိုင်းကြရန်ဖြစ်ကြောင်းပြောကြားသည်။
ထို့နောက် ကော်မတီဝင်ဒုတိယဝန်ကြီးများ၊ အမြဲတမ်းအတွင်းဝန်များ၊ ညွှန်ကြားရေးမှူး ချုပ်များနှင့်တာဝန်ရှိသူများက ကဏ္ဍအလိုက် ဆွေးနွေးကြပြီး ကော်မတီရုံးအဖွဲ့မှူးက ရေးဆွဲထားသော မဟာဗျူဟာ(မူကြမ်း)များကို တင်ပြရာတင်ပြချက်များအပေါ် ဝိုင်းဝန်းအကြံပြု ဆွေးနွေးကြသည်။
ထို့နောက် ကော်မတီဥက္ကဌ လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေး ဝန်ကြီးဌာန ပြည်ထောင်စုဝန်ကြီးက နိဂုံးချုပ်စကားပြောကြားခဲ့ကြောင်း သိရသည်။
(သတင်းစဉ်)
