ဂေါ်သဇင် တော်ဝင်ပန်း ဆွတ်လှမ်းဖို့ သူကြံရွယ်

ကိုရင်ဩ

 

အမေရိကန် “အိမ်ဖြူတော်ကို” စိုးစံမည့်ပုဂ္ဂိုလ် ရွေးချယ်ပွဲအတွက် အကြိတ်အနယ် ယှဉ်ပြိုင်ကြရန် ရှိနေစဉ် ရီပတ်ဘလီကန်ပါတီမှ လက်ရှိသမ္မတ ဒေါ်နယ် ထရမ့်ထက် ဒီမိုကရက်တစ်ပါတီမှ သူ၏ပြိုင်ဘက် ဂျိုးဘိုင်ဒင်(ဒုတိယသမ္မတဟောင်း)က ပြည်သူ့ထောက်ခံမှု ပိုမိုရရှိနေသည်ဆိုသော စစ်တမ်းများ၏ဖော်ပြချက်ကို ကျွန်ုပ်ဖတ်ရှုရသောအခါ ဝေဟင်အတွင်း ငှက်ခါးပျံသလို “တက်ချည်”၊ “သက်ချည်” ရှိလှသော “စုန်ချည်”၊ “ဆန်ချည်” ရှိလှသော နိုင်ငံရေးလောကအရွေ့ကို စေ့ငုလေ့လာမိလေ၏။

အသက်အရွယ်မရွေး၊ အမျိုးအနွယ်မရွေး၊ ကျားမ မရွေး လူထုလူတန်းစားအလွှာအတွင်း ပြည်သူ့နှစ်ခြိုက်မှု ပိုမိုရရှိလာသူမှာ ဘိုင်ဒင်ဖြစ်ပြီးလျှင် ထရမ့်မှာမူ လူဖြူ များ၊ ကျားကျားလျားလျား ယောကျ်ားကြီးများ၊ သက်ကြီး ပိုင်း ပုဂ္ဂိုလ်များနှင့် ခေတ်ပညာမတတ်သော လူတန်းစား အလွှာဝင်များတို့၏ အားပေးထောက်ခံမှုကို တိုး၍တိုး၍ ရရှိနေသည်ဟု စစ်တမ်းများတွင် ဖော်ပြထား၏။

 

အိမ်ဖြူတော်သို့ ဦးတည်ချီတက်နေကြချိန်တွင် ပြည်သူများ၏ “အသည်းကြားမှ မဲတစ်ပြားမှာ” ထူးထူး ခြားခြား အဖိုးတန်လှ၏။ မဲဆန္ဒရှင်ပြည်သူများ၏ အဆုံးအဖြတ်ကိုခံယူရမည့်အချိန်တွင် သူ့ထက်သာသူသည်သာ ခြေတစ်လှမ်းအသာ ရရှိနိုင်ပေ၏။ ထိုက်ထိုက်တန်တန် ရွေးချယ်ခံရေးမှာ “ပျိုတိုင်းကြိုက်တဲ့နှင်းဆီခိုင်” ပမာ ကြွားကြွားဝင့်ဝင့် ငွားငွားစွင့်စွင့် ရှိနေအပ်၏။

 

အမေရိကန်အခြေစိုက် သတင်းဝက်ဘ်ဆိုက် တစ်ခုဖြစ်သော “ဖိုက်သာတီအိတ်”(၅၃၈) “ဒေါ့ကွမ်း” တွင် ပြည်သူ့ဆန္ဒသဘောထား စစ်တမ်းများပေါ် အခြေခံ ၍ ပုံပြဂရပ်မျဉ်းဖြင့် သူတို့နှစ်ဦးရေပန်းစားမှုအခြေအနေကို ဖော်ပြထားကြောင်း ကျွန်ုပ်လေ့လာတွေ့ရှိရသည်။

ယင်းဖော်ပြချက်မှာ သင်္ချာနည်းအရဖော်ပြချက် ဖြစ်ပြီး အောက်တိုဘာ ၁၇ ရက်အခြေပြ ပုံပြဂရပ်မျဉ်း ဖြစ်သည်ဆို၏။

 

ထရမ့်နှင့် ဘိုင်ဒင်တို့၏ ပြည်သူ့ထောက်ခံမှု ရရှိမှု နှင့်ပတ်သက်၍ အမှတ်ပေးရာတွင် မတ်လတွင် ထရမ့်က ၄ မှတ်၊ ဘိုင်ဒင်က ၆ မှတ်၊ ဇွန်လတွင် ထရမ့်က ၆ မှတ်၊ ဘိုင်ဒင်က ၉ ဒသမ ၅ မှတ်၊ အောက်တိုဘာလတွင် ထရမ့် က ၈ မှတ်၊ ဘိုင်ဒင်က ၁၀ ဒသမ ၅ မှတ်ဟူ၍ တွေ့မြင်ရပေ ရာ ပြည်သူများက ဘိုင်ဒင့်အပေါ် ထောက်ခံမှု ပိုမိုလာပုံမှာ ထင်ရှားသိသာလာ၏။

 

သမ္မတဘာရက်အိုဘားမား၏ လက်ထက်က ဒုတိယ သမ္မတတာဝန်ထမ်းရွက်ခဲ့သူ ဘိုင်ဒင်မှာ ၁၉၇၀ ပြည့်လွန် နှစ်များမှ အစပြု၍ နိုင်ငံရေးလောကအတွင်း ပါဝင် လှုပ်ရှားခဲ့သူဖြစ်ပေရာ ဝါရင့်သမ္ဘာရင့် နိုင်ငံရေးသမားကြီး အသွင်ကို ယခုအခါ ပိုမိုလှစ်ဟလာနိုင်သည်။

 

နိုင်ငံနှင့်ချီပြုလုပ်သော စစ်တမ်းများသည် ရွေးကောက်ပွဲကြီးနီးကပ်လာချိန်တွင် မဲဆန္ဒရှင် ပြည်သူ များအား ရင်ဖိုစေသော်လည်း ယင်းစစ်တမ်းများအပေါ် အခြေခံ၍ ရွေးကောက်ပွဲတွင် မည်သူမည်ဝါ နိုင်လိမ့် မည်ဟု တိတိကျကျ ဟောကိန်းထုတ်ခြင်းငှာမသင့်ပါချေ။

 

ထိုစဉ်အတွင်း သမ္မတဒေါ်နယ်ထရမ့်အား ရယ်သွမ်း သွေးခဲ့သူမှာ သမ္မတဟောင်း ဘာရက်အိုဘားမားဖြစ်ပြီး လျှင် သူကရွေးကောက်ပွဲအကြို လူထုသဘောထားဆန္ဒ စစ်တမ်းများအရ ဘိုင်ဒင်ပိုမိုရေပန်းစားလာမှုနှင့် ပတ်သက်၍ ဒီမိုကရက်တို့ ကျေနပ်အားရ ဖြစ်မနေကြဘဲ ဆက်လက်ကြိုးပမ်းကြဖို့ ဒီမိုကရက်ဝိုင်းတော်သားများကို သတိပေးခဲ့လေသည်။

 

နိုဝင်ဘာ ၃ ရက် ရွေးကောက်ပွဲအကြိုကာလတွင် ဒီမို ကရက်တစ်ပါတီမှစိန်ခေါ်သူ ဘိုင်ဒင်အား ထောက်ခံမှု ပြသသော လူထုစည်းဝေးပွဲတွင် အိုဘားမားက ဒီမိုကရက်တို့ အာဏာစက်ပြန်လည်ရရှိလာစေဖို့ ရှေ့ခရီးဆက်ကြရန် ဒီမိုကရက်ဝိုင်းတော်သားတို့ကို တိုက်တွန်းနှိုးဆော်ခဲ့၏။ ပင်ဆယ်လ်ဗေးနီးယားပြည်နယ် ဖီလာဒဲဖီးယားမြို့တွင် မော်တော်ကားများအုပ်စုဖွဲ့ကာ ရပ်နားကြလျက် အိုဘားမား၏ လူထုစည်းဝေးပွဲသို့ ဒီမိုကရက်ဝိုင်းတော်သားတို့တက်ရောက်ကြ၏။

 

အမေရိကန်ရွေးကောက်ပွဲရလဒ်ကို အဆုံးအဖြတ်ပေး နိုင်သည်ဟု ယူဆရသော အကြိတ်အနယ် ယှဉ်ပြိုင်ကြရမည့် ပြည်နယ်အချို့တွင် ပင်ဆယ်လ်ဗေးနီးယားပါဝင်သည်။

သမ္မတထရမ့်အား အိုဘားမားဝေဖန်ပုံမှာ ပြင်းထန် လွန်းလှ၏။ ထရမ့်သည် သမ္မတရာထူးနှင့် လျော်ကန်စွာ လုပ်ကိုင်ဆောင်ရွက်နိုင်စွမ်းမရှိပါဟူ၍ သူကတနင့်တပိုး ဝေဖန်ခဲ့ပြီးလျှင် ထရမ့်၏ အမူအကျင့်နှင့် ပတ်သက်၍လည်း သူက မချိတင်ကဲညည်းတွားခဲ့သည်။

 

ထရမ့်နှင့်ဘိုင်ဒင်တို့၏ ဒုတိယအကြိမ်နှင့် နောက်ဆုံး အကျော့ စကားစစ်ထိုးပွဲကြီး ကျင်းပလုဆဲဆဲတွင် သမ္မတ ဟောင်း အိုဘားမား၏ လူထုစည်းဝေးပွဲ ကျွက်ကျွက်ညံ ခဲ့သည်။ ထရမ့်က ပြည်နယ်များသို့ဆင်း၍ မဲဆွယ်စည်းရုံး နေစဉ်မှာပင် ဘိုင်ဒင်က စကားစစ်ထိုးပွဲအတွက် ကြိုတင် ပြင်ဆင်နေခဲ့ပြီး အိုဘားမားက ဘိုင်ဒင့်ကိုယ်စား မဲဆွယ် ပေးခဲ့ခြင်းဖြစ်လေသည်။

 

သမ္မတထရမ့်နှင့် ဘိုင်ဒင်တို့၏ နောက်ဆုံးအကျော့ စကားစစ်ထိုးပွဲကို အောက်တိုဘာ ၂၂ ရက်ညက တင်နက်ဆီ ပြည်နယ် နက်ရှ်ဗီးမြို့ရှိ ဘဲလ်မောင့်တက္ကသိုလ်တွင် ပြုလုပ် ခဲ့သည်။

အမေရိကန်ရွေးကောက်ပွဲကျင်းပရန် ၁၂ ရက်မျှသာ လိုတော့ချိန်တွင် ထရမ့်နှင့်ဘိုင်ဒင်တို့က သူတို့၏ မတူ ကွဲပြားခြားနားသော သဘောထားရပ်တည်ချက်များကို မဲဆန္ဒရှင်များအားချပြကာ မည်သူ့ကိုမဲပေးရမည်မသိ ဖြစ်နေသူများကို ဆုံးဖြတ်ချက်တစ်ရပ်ချမှတ်စေခဲ့သည်။

 

စက်တင်ဘာလအတွင်း ပြုလုပ်ခဲ့သော စကားစစ်ထိုး ပွဲတွင် ပြောလက်စ စကားပြတ်တောက်သွားအောင် ဘိုင်ဒင် ကို အကြိမ်ကြိမ်အခါခါ နှောင့်ယှက်ခဲ့သူအဖြစ် ဝေဖန်ခံခဲ့ရသူ ထရမ့်မှာ ယခုတစ်ကြိမ်တွင် ပိုမိုသိမ်မွေ့စွာ၊ ပိုမိုယဉ်ကျေးစွာ စကားစစ်ထိုးခဲ့သည်ဟု သုံးသပ်ကြသည်။

အောက်တိုဘာ ၂၂ ရက် စကားစစ်ထိုးပွဲတွင် တစ်ဦးနှင့် တစ်ဦး ပုဂ္ဂိုလ်ရေးတိုက်ခိုက်မှုများ ဆက်လက်ပြုလုပ်ခဲ့ကြပြီး ဂါရဝတရားအလေးထားခြင်းကို ပြသမှုအလွန့်အလွန် နည်းပါး သည်ဟု ပွဲကြည့်ပရိသတ်မဲဆန္ဒရှင်များက ရှုမြင်ကြသည်။ ဤသည်မှာလည်း “စကားစစ်ထိုးပွဲ” ၏ သရုပ်သကန် မဟုတ်ပါလော။

 

နောက်ခံအတ္ထုပ္ပတ္တိဖြတ်သန်းမှုအရ စီးပွားရေးလောက တွင် ဂျင်ခြေလည်ခဲ့သူထရမ့်မှာ နှစ်ပေါင်း ၅၀ နီးပါး နိုင်ငံရေး လောကတွင် ကျင်လည်ခဲ့သူ ဘိုင်ဒင်အား အမှုမထားသည့် ပုံအသွင် ဒေါင်းတည်မောင်းတည် စကားစစ်ထိုးခဲ့သည်။ဟောဟောဒိုင်းဒိုင်း စကားနိုင်လုရန် ကြိုးပမ်းခဲ့သည်။

 

သို့ဖြစ်စေကာမူ ထရမ့်မှာ “ကိုရိုနာပိုး” ဖိစီးခံရမှုကြောင့် စီးပွားရေးဘဝ ထိခိုက်ရ၊ ထိုမှသည် ပြည်သူတို့၏ လူနေမှု ဘဝ ညှိုးနွမ်းရသည့် အနေအထားကို နဖူးတွေ့ ဒူးတွေ့ ရင်ဆိုင်နေရချိန်တွင် ထပ်မံရွေးချယ်တင်မြှောက်ခံရသည့် တိုင်အောင် လာမည့်လေးနှစ်တာကာလတွင် ပြည်သူများ အတွက် ဘာလုပ်ပေးနိုင်မည်ကို တိတိကျကျ ရေရေရာရာ ကတိမပေးနိုင်သေးဘဲ “မီးစင်ကြည့်က” ရမည့် ပုံအသွင် မဲဆန္ဒရှင်များက ရှုမြင်ကြလေသည်။

 

စကားစစ်ထိုးပွဲတွင် ထရမ့်က ဘိုင်ဒင်တို့သားအဖနှင့် ပတ်သက်၍ စွပ်စွဲမှုများဖြင့် တိုက်ခိုက်ခဲ့ရာ အချက်အလက် များ မှန် ၊ မမှန် ပိုင်းခြားသုံးသပ်သူများမှာ သာ၍ပင်အလုပ် ရှုပ်ခဲ့ရသည်။

နောက်ဆုံးအကျော့စကားစစ်ထိုးပွဲ၏ သဘာပတိ (မော်ဒရေတာ) အဖြစ် တာဝန်ယူသူ ခရစ္စတင်းဝေါ်ကာမှာ အင်န်ဘီစီ ရုပ်မြင်သံကြားဌာန၏ အိမ်ဖြူတော်အထူးသတင်း ထောက်နှင့် “Weekend Today” ရုပ်မြင်သံကြားအစီအစဉ် ပူးတွဲတင်ဆက်သူဖြစ်ရာ မေးတတ်၊ မြန်းတတ်၊ လူကဲခတ် တတ်လှပြီး စကားစစ်ထိုးပွဲကို အကောင်းဆုံးဖြစ်စေရန် “ပွဲထိန်း”နိုင်ခဲ့သည်။

 

ယခုတစ်ကြိမ်တွင် တစ်ဦးနှင့်တစ်ဦး စကားဖြတ်ပစ် နိုင်ခြင်းမရှိစေရန် သဘာပတိက တစ်ဦးဟောပြောနေချိန် အတွင်း အခြားတစ်ဦး၏မိုက်ခွက်ကို အသံတိတ်ရှိနေစေရန် “အသံတိတ်ခလုတ်”(ဝါ) Mute button ကို ပိုင်ပိုင်နိုင်နိုင် အသုံးချခဲ့သည်ဆို၏။

နှစ်ပေါင်း ၃၀ ကြာကာလအတွင်း အမေရိကန်သမ္မတ လောင်းများ၏ စကားစစ်ထိုးပွဲတွင် သဘာပတိအဖြစ်တာဝန် ယူသည့် ပထမဆုံးသော လူမည်းအမျိုးသမီးမှာ ခရစ္စတင်း ဝေါ်ကာ ဖြစ်လာသည်။

စကားစစ်ထိုးပွဲသို့ ကိုယ်တိုင်ကိုယ်ကျ တက်ရောက်နား ဆင်သူများတွင် ယူအက်စ်အေတူဒေး သတင်းစာတိုက်မှ သတင်းအချက်အလက်မှန်၊ မမှန် စိစစ်ရေးကျွမ်းကျင်သူ သတင်းစာဆရာများ ပါဝင်သည်။

စီးပွားရေး၊ လူမျိုးရေး၊ ရာသီဥတုစက်ဝန်းလည်ပတ်ပုံ ပြောင်းလဲလာမှု၊ ကျန်းမာရေးစောင့်ရှောက်မှုနှင့် ရွှေ့ပြောင်း အခြေစိုက် နေထိုင်သူများအရေးတို့နှင့် ပတ်သက်၍ နှစ်ဦးသား ဆွေးနွေးငြင်းခုံခဲ့ကြရာတွင် သမ္မတထရမ့်မှာ ယခင် တစ်ကြိမ်ကထက် ပိုမို ဣန္ဒြေရရ၊ ပိုမိုသိမ်သိမ်မွေ့မွေ့ ရှိနေခဲ့ လေသည်။

 

ရုပ်မြင်သံကြားမှ တိုက်ရိုက်ထုတ်လွှင့်ပြသသော စကားစစ်ထိုးပွဲမှာ လပေါင်းအတန်ကြာမျှ လူမျိုးရေးကိစ္စကိုင်တွယ်ဆောင်ရွက်ပုံ ညံ့ဖျင်းသူအဖြစ် ဝေဖန်ခံခဲ့ရသူ သမ္မတထရမ့်အတွက် ပြန်လည်အဖတ်ဆယ်ရန် နောက်ဆုံး အခွင့်အရေး တစ်ရပ်ဖြစ်စေခဲ့သည်ဆို၏။

 

လူဖြူရဲအရာရှိ၏ အင်အားသုံးလွန်ကဲမှုကြောင့် လူမည်းအမျိုးသား ဂျော့ဂျ်ဖလွိုက်ဒ် သေဆုံးခဲ့ရမှုအပြီး အမေရိကန်ပြည်ထောင်စုတစ်ဝန်းတွင် လူမျိုးရေး ဆန္ဒပြပွဲ များ ပြင်းထန်ခဲ့သည်။

အမေရိကန်ရွေးကောက်ပွဲကို အဆုံးအဖြတ်ပေးဖွယ် ရှိသော ပြည်နယ်အချို့တွင် တစ်ဦးနှင့်တစ်ဦး အကြိတ်အနယ် ယှဉ်ပြိုင်ရမည့်အနေအထားရှိနေချိန် မဲဆွယ်စည်းရုံးမှု၏ ရေချိန်အမြင့်ဆုံးအမှတ်သို့ ရောက်ရှိနေပေပြီ။

 

ကိုရိုနာဗိုင်းရပ်စ်ပိုးအပေါ် ကိုင်တွယ်ဆောင်ရွက်ပုံအကြောင်းရပ်ဖြင့် စကားစစ်ထိုးပွဲကို နိဒါန်းပျိုးခဲ့ရာတွင် ဂျိုးဘိုင်ဒင်က “လူတွေသောက်သောက်လဲ သေဆုံးခဲ့ရတဲ့ ကပ်ရောဂါအပေါ် ကိုင်တွယ်ဆောင်ရွက်ပုံ ညံ့ဖျင်းမှုအတွက် တာဝန်မကင်းသူတစ်ဦးအနေနဲ့ အမေရိကန်သမ္မတအဖြစ် ဆက်လက်တာဝန်ယူမှာဖြစ်နိုင်ပါ့မလား”ဟူ၍ ထရမ့်အား ထိုးနှက်တိုက်ခိုက်ခဲ့သည်။

 

မဲဆွယ်စည်းရုံးရေးပြုလုပ်ရာတွင် “စီးပွားရေး”ကို ပင်မ မဏ္ဍိုင်အကြောင်းရပ်အဖြစ် သတ်မှတ်ထားသော သမ္မတထရမ့်က ကပ်ရောဂါဆိုးအပေါ် သူ၏ကိုင်တွယ်ဆောင်ရွက်ပုံနှင့်ပတ်သက်၍ သူ့ကိုယ်သူ ကာကွယ် ပြောကြားခဲ့သည်။ ကိုဗစ်-၁၉ရောဂါပိုး ကူးစက်ခံရသူ ဦးရေ တစ်ကျော့ပြန် မြင့်တက်လာသည့်တိုင်အောင် စီးပွားရေးလောကသားတို့က သူတို့၏ စီးပွားရေးလုပ်ငန်း များကို ရပ်နားထားခြင်းဖြင့် တောင့်ခံ၊ တင်းခံနိုင်စွမ်း မရှိပုံကို ထရမ့်က ပြန်လည်ချေပပြောဆိုခဲ့သည်။

 

“ကျုပ်ရဲ့ နိုင်ငံသားတွေ ကိုရိုနာပိုးနဲ့အတူယှဉ်တွဲနေထိုင်တတ်အောင်လေ့လာကြဖို့ အရေးကြီးလှပါပေတယ်” ဟု ထရမ့်က ကပ်ရောဂါ တိုက်ဖျက်ရေးရှေ့ဆက်ရမည့်ခရီးမနီးပုံကို ထင်ဟပ်ပြောဆိုခဲ့သည်။

ကပ်ရောဂါကျရောက်ချိန်တွင် မိမိတို့အနေဖြင့် “ရွေးလမ်း”မရှိပါ။ ကပ်ရောဂါဆိုးကို တိုက်ဖျက်ရင်း စီးပွားရေးလုပ်ငန်း မပျက်ခရီးဆက်ကြရမည်ဆို၏။

 

ထိုအခါဝယ် ဘိုင်ဒင်က ပြန်လည်ချေပသည်မှာကား “ကိုရိုနာပိုးနဲ့ အတူယှဉ်တွဲနေထိုင်ကြဖို့ လေ့လာသင်ယူကြ ပါဆိုပါလား။ ကျုပ်တို့အမေရိကန်တွေသေဖို့သာပြင်ထားကြ”ဟူသတည်း။

“ကိုရိုနာပိုး အမေရိကန်ကနေ ထွက်သွားနေပါပြီ”ဟု ထရမ့်က ဖြီးလုံးထုတ်ခဲ့သော်လည်း စကားစစ်ထိုးပွဲ ပြုလုပ်သည့်နေ့မှာပင် တစ်ရက်တည်း ကိုရိုနာပိုးတွေ့ရှိမှု စံချိန်တင်ခဲ့ပေရာ ရောဂါပိုးကူးစက်မှု မြင့်တက်နေဆဲ ဖြစ်ပုံကို သာဓကညွှန်းဆိုလေသည်။

 

ကိုရိုနာပိုးအရေး နှစ်ဦးသား ဆွေးနွေးငြင်းခုံခဲ့ပြီး နောက် အမေရိကန်၏ နိုင်ငံတကာဆက်ဆံရေးဂယက် လှိုင်းထန်မှုဖြစ်စဉ်များနှင့်ပတ်သက်၍ ဘတစ်ပြန်၊ ကျား တစ်ပြန် အကြိတ်အနယ်ဆွေးနွေးကြပြန်သည်။

ဘိုင်ဒင်နှင့်သူ၏သား ဟန်တာတို့သည် တရုတ်နိုင်ငံ နှင့်ယူကရိန်းအရေးတို့တွင် ကျင့်ဝတ်နှင့်မညီ မလျော် မကန် ပြုမူဆောင်ရွက်ခဲ့ကြသည်ဟု ထရမ့်ကစွပ်စွဲခဲ့သော် လည်း စွပ်စွဲချက်များခိုင်လုံမှုမရှိလှဟု သုံးသပ်ကြသည်။

 

စီးပွားရေးလုပ်ငန်းရှင်ကြီး တစ်ဖြစ်လဲ သမ္မတထရမ့် သည် အခွန်မဆောင်ရအောင် အခွန်ရှောင်ခဲ့ပုံကို ဘိုင်ဒင်က စွပ်စွဲပြစ်တင်ခဲ့၏။ ထရမ့်သည့် ၂၀၀၀ပြည့်နှစ်မှ ၂၀၁၇ ခုနှစ်အထိ ဝင်ငွေခွန်ပေးဆောင်ခဲ့ခြင်းမရှိသလောက် ဖြစ်သည်ဟူ၍ နယူးယောက်တိုင်းမ်သတင်းစာ၏ စုံစမ်း လေ့လာမှုအရှိန်အဟုန် ရိုက်ခတ်နေဆဲကာလတွင် ယင်းသို့ စွပ်စွဲပြစ်တင်ခဲ့ခြင်းဖြစ်သည်။

ဘိုင်ဒင်သည် သားဖြစ်သူ၏ စီးပွားရေးလှုပ်ရှားမှုများ မှတစ်ဆင့် အမြတ်အစွန်းများရရှိနေသည်ဟု ထရမ့်က ဝေဖန်ခဲ့သည်။

 

ကပ်ရောဂါဘေးကိုင်တွယ်ပုံမှသည် ရာသီဥတု ထိန်းညှိရေး၊ ရုပ်ကြွင်းလောင်စာသုံးစွဲရေး၊ လူမျိုးခွဲခြားမှု အဆုံးသတ်ရေး၊ ရွှေ့ပြောင်းအခြေစိုက်သူများအရေးတို့ နှင့်ပတ်သက်၍လည်း မတူကွဲပြားသော အမြင်များကို သူတို့ထုတ်ဖော်ပြသခဲ့ကြသည်။

 

လတ်တလောပေါ်ထွက်လာသော စစ်တမ်းများအရ ဘိုင်ဒင်က ထရမ့်ထက် ပိုမိုရေပန်းစားလျက်ရှိသော်လည်း အဆုံးအဖြတ်ပေးနိုင်သော ပြည်နယ်များတွင် တစ်ဦးနှင့် တစ်ဦး ရေပန်းစားမှုအခြေအနေမှာ ကွာဟခြင်းမရှိလှပေ။ မဲပေးခွင့်ရှိသူ ပြည်သူ သန်း၂၃၀ ခန့်အနက် ၄၇သန်းကျော်မှာ ကမ္ဘာ့ကပ်ရောဂါကြောင့် ကြိုတင်မဲပေးခဲ့ကြပြီး ဖြစ်သည်။

 

ရွေးကောက်ပွဲကျင်းပရန် ၁၁ ရက်သာလိုတော့ချိန် သူနိုင်ကိုယ်နိုင် အပြိုင်ကြဲကြမည့် ရွေးကောက်ပွဲကြီးတွင် ထရမ့်က နိုင်နိုးနိုး၊ ဘိုင်ဒင်က နိုင်နိုးနိုး မဲဆန္ဒရှင်များ အတွေးရေယာဉ်ကြော ဝယ်မျောပါနေကြမည်ဟု ကျွန်ုပ် တွေးတောမိရင်း “ဂေါ်သဇင် တော်ဝင်ပန်း ဆွတ်လှမ်းဖို့ သူကြံရွယ်” ဟု ကျူးရင့်မိပါသတည်း။

 

ရည်ညွှန်း- News Agencies