ရန်ကန် ၂၇ မေ
ရန်ကုန်မြောက်ပိုင်းခရိုင်၊ လှိုင်သာယာမြို့နယ်၌ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူမှုဖူလုံရေးအဖွဲ့ ရွှေလင်ပန်းစက်မှုဇုန်ရုံးခွဲ (လှိုင်သာယာ)တွင် အကျုံးဝင် မှတ်ပုံတင်ထားသည့် MYANMAR Full Win Co.,Ltdမှ အာမခံ အလုပ်သမား (၅၀၀)အား ၂၀၁၂ ခုနှစ် လူမှုလုံရေးဥပဒေနှင့်အညီ လူမှုဖူလုံရေး ကူညီထောက်ပံ့မှု အကျိုးခံစားခွင့် ၄၀ ရာခိုင်နှုန်းကို ယနေ့ မွန်းလွဲ ၁ နာရီက စတင်ထုတ်ပေးခဲ့ကြောင်း သိရသည်။
ထိုသို့ဆောင်ရွက်ရာတွင် လူမှုဖူလုံရေးအဖွဲ့ ရွှေလင်ပန်းစက်မှုဇုန်းရုံးခွဲ (လှိုင်သာယာ)မှ အာမခံ အလုပ်သမား (၅၀၀)ကိုယ်စား လူမှုဖူလုံရေး ကူညီထောက်ပံ့မှု အကျိုးခံစားခွင့် ၄၀ ရာခိုင်နှုန်း စုစုပေါင်း ၄၇၂၅၄၄၀.၀၀ ကျပ်အား MYANMAR Full Win Co.,Ltdမှ စက်ရုံတာဝန်ခံ ဒေါ်မိုးမိုးမြင့်ခိုင် ထံသို့ ပေးအပ်ခဲ့သည်။
ယခုပေးအပ်ခြင်းသည် ကိုဗစ်−၁၉ ရောဂါ ကာကွယ်ထိန်းချုပ်ရေးအတွက် စက်ရုံပိတ်သိမ်းထားသည့် ကာလအတွင်း အာမခံအလုပ်သမားများ လစာ၏ ၄၀ ရာခိုင်နှုန်းကို ပထမဦးဆုံး ပေးအပ်ခဲ့ခြင်းဖြစ်ပြီး အခြားစက်ရုံများလည်း တင်ပြထားပြီးဖြစ်၍ ခွင့်ပြုမိန့်ရရှိပါက ဆက်လက်ပေးအပ်သွားမည်ဖြစ်ကြောင်း ရွှေလင်ပန်းစက်မှုဇုန်ရုံးခွဲ တာဝန်ခံ ဒေါ်သန်းသန်းဆင့်ထံမှ သိရသည်။
မြသန္တာဝင်း(ပြန်/ဆက်)
