ညောင်ဦး ၂၂ ဖေဖော်ဝါရီ
ကမ္ဘာ့ရှေးဟောင်းအမွေအနှစ်စာရင်းဝင် ပုဂံညောင်ဦးရှေးဟောင်းယဉ်ကျေးမှုနယ်မြေဒေသအား အစဉ်အမြဲ သန့်ရှင်း သာယာလှပစေရန်နှင့် ပြည်သူများ ပလပ်စတစ်အမှိုက်များစွန့်ပစ်ရာ၌ စနစ်တကျ စွန့်ပစ်သည့်အလေ့အကျင့်များ ရရှိစေရန် ရည်ရွယ်ကာ ညောင်ဦးခရိုင်အထွေထွေအုပ်ချုပ်ရေးဦးစီးဌာနနှင့် Bagan Plastic Campaign အဖွဲ့တို့ ပူးပေါင်းပြီး အပတ်စဉ် စနေနေ့တိုင်း စဉ်ဆက်မပြတ် စုပေါင်းအမှိုက်ကောက်ယူရှင်းလင်းရေးလုပ်ငန်းများ ကွင်းဆင်းဆောင်ရွက်လျက်ရှိရာ ဖေဖော်ဝါရီ ၂၂ ရက်(စနေနေ့) ၊ ယနေ့ နံနက် ၆ နာရီခွဲက ညောင်ဦး - မြင်းခြံသွားလမ်းတစ်လျှောက်ရှိ စွန့်ပစ်ပလပ်စတစ်အမှိုက်များအား လူအင်အား ၂၀ဝ ခန့်ဖြင့် ကောက်ယူရှင်းလင်းရေးလုပ်ငန်းများ ကွင်းဆင်းဆောင်ရွက်ခဲ့ကြောင်း သိရသည်။
အဆိုပါ စွန့်ပစ်ပလပ်စတစ်အမှိုက်များ ကောက်ယူရှင်းလင်းရေးလုပ်ငန်း ဆောင်ရွက်ရာသို့ ညောင်ဦးခရိုင်အထွေထွေ အုပ်ချုပ်ရေးဦးစီးဌာန ဒုတိယခရိုင်အုပ်ချုပ်ရေးမှူး ဦးထွန်းသိန်း ၏ ဦးဆောင်လမ်းညွှန်မှုဖြင့် (ထွေ/အုပ်)ဝန်ထမ်းများ ၊ Bagan Plastic Campaign အဖွဲ့ဉက္ကဌ ဦးတင့်ဆွေနှင့် အဖွဲ့ဝင်များ ၊ ရှေးဟောင်းသုတေသနဦးစီးဌာနမှ ဝန်ထမ်းများ ၊ ညောင်ဦးမြို့ ထွန်းကော်မာရှယ်မှ အဖွဲ့ဝင်များ ၊ တော်ဝင်ကိုယ်ပိုင်အထက်တန်းကျောင်းမှ ကျောင်းသားကျောင်းသူများ ၊ စုစုပေါင်း လူအင်အား ၂၀ဝ ဦးခန့် ပူးပေါင်းပါဝင်ကာ ညောင်ဦး - မြင်းခြံသွားကားလမ်း လမ်းဘေး(ဝဲ၊ယာ)တစ်လျှောက်ရှိ စွန့်ပစ် ပလပ်စတစ်အမှိုက်များကို အမှိုက်သိမ်းယာဉ်ဖြင့် စုပေါင်းကောက်ယူ ရှင်းလင်းဆောင်ရွက်ပေးခဲ့ကြောင်း သိရသည်။
ယခုအခါ မန္တလေးတိုင်းဒေသကြီး၊ ပုဂံညောင်ဦးဒေသသည် ကမ္ဘာ့ရှေးဟောင်းအမွေအနှစ် စာရင်းဝင်ဒေသတစ်ခု ဖြစ်လာသည့်အတွက် ခရိုင်/မြို့နယ်အဆင့် ဌာနဆိုင်ရာများ၊ Bagan Plastic Campaign အဖွဲ့မှ အဖွဲ့ဝင်များနှင့် ဒေသခံပြည်သူများက ပုဂံညောင်ဦးဒေသအား အစဉ်အမြဲ သန့်ရှင်းသာယာလှပစေရေးအတွက် ကြိုးပမ်းအကောင်အထည်ဖော် ဆောင်ရွက်လျက်ရှိရာ ယင်းဒေသသို့ လာရောက်လည်ပတ်ကြသည့် ပြည်တွင်း ၊ ပြည်ပ ဘုရားဖူး ခရီးသွားဧည့်သည်များကို ပလပ်စတစ် အမှိုက်များအား စည်းကမ်းမဲ့ စွန့်ပစ်ခြင်းများ မပြုလုပ်ကြရန်နှင့် စွန့်ပစ်အမှိုက်ပုံးများတွင် စနစ်တကျ စွန့်ပစ်ခြင်းဖြင့် ပုဂံညောင်ဦး ရှေးဟောင်းယဉ်ကျေးမှုနယ်မြေအား သန့်ရှင်းသာယာလှပရေး ပူးပေါင်းပါဝင် ဆောင်ရွက်လာ စေရန် အသိပေးနှိုးဆော်ထားရှိကြောင်း အဆိုပါ Bagan Plastic Campaign အဖွဲ့မှ သိရသည်။
ရဲဝင်းနိုင် (ညောင်ဦး)
