လားရှိုး ၁၉ စက်တင်ဘာ
တရုတ်နိုင်ငံမှ ပြန်လည်ဝင်ရောက်လာသည့် မြန်မာနိုင်ငံသား နေရပ်ပြန်ပြည်သူများသည် ရှမ်းပြည်နယ်(မြောက်ပိုင်း)ရှိ မူဆယ်မြို့၊ ကိုးကန့်ကိုယ်ပိုင်အုပ်ချုပ်ခွင့်ရဒေသ လောက်ကိုင်မြို့နှင့် ချင်းရွှေဟော်မြို့များရှိ နှစ်နိုင်ငံနယ်စပ်ဂိတ်များမှတစ်ဆင့် နေ့စဉ်ဝင်ရောက်လျက်ရှိရာ နေရပ်ပြန်ပြည်သူများအား လားရှိုးမြို့မှတစ်ဆင့် မီးရထားခရီးစဉ်ဖြင့် သက်ဆိုင်ရာ တိုင်းဒေသကြီးနှင့် ပြည်နယ်အသီးသီးသို့ မေ ၆ ရက်မှ စတင်ပြီး စနစ်တကျ လွှဲပြောင်းပို့ဆောင်ပေးလျက်ရှိသည်။
ထိုသို့ လွှဲပြောင်းပို့ဆောင်ပေးလျက်ရှိရာ စက်တင်ဘာ ၁၉ ရက်တွင် နေရပ်ပြန်ပြည်သူ အမျိုးသား (၄၆)ဦး၊ အမျိုးသမီး (၂၃)ဦး စုစုပေါင်း (၆၉)ဦးတို့အား လွှဲပြောင်းပို့ဆောင်ပေးနိုင်ခဲ့သည်။ အဆိုပါ နေရပ်ပြန်ပြည်သူ (၆၉)ဦးတို့တွင် ကချင်ပြည်နယ်မှ (၆)ဦး၊ ချင်းပြည်နယ်မှ (၅)ဦး၊ စစ်ကိုင်းတိုင်းဒေသကြီးမှ (၃)ဦး၊ မကွေးတိုင်းဒေသကြီးမှ (၁၇)ဦး၊ မန္တလေးတိုင်းဒေသကြီးမှ (၂)ဦး၊ ဧရာဝတီတိုင်းဒေသကြီးမှ (၁)ဦး၊ ရှမ်းပြည်နယ်မှ (၃)ဦး၊ ရခိုင်ပြည်နယ်မှ (၂၉)ဦး၊ ရန်ကုန်တိုင်းဒေသကြီးမှ (၃)ဦးတို့ ဖြစ်ကြသည်။
ရှမ်းပြည်နယ်(မြောက်ပိုင်း) ကိုဗစ်-၁၉ ရောဂါ ကာကွယ် ထိန်းချုပ် ကုသရေး လုပ်ငန်းကော်မတီ၏ ကြီးကြပ်မှုဖြင့် နှစ်နိုင်ငံနယ်စပ်ဂိတ်များမှတစ်ဆင့် ပြန်လည်ဝင်ရောက်လာသည့် နေရပ်ပြည်သူများအား စနစ်တကျစိစစ်၍ သက်ဆိုင်ရာ တိုင်းဒေသကြီးနှင့် ပြည်နယ်အသီးသီးသို့ မြန်မာ့မီးရထားခရီးစဉ်ဖြင့် ပို့ဆောင်ပေးလျက်ရှိရာ မေ ၆ ရက်မှ စက်တင်ဘာ ၁၉ ရက်အထိ နေရပ်ပြန်ပြည်သူ အမျိုးသား (၁၀၁၃၆)ဦး၊ အမျိုးသမီး (၆၃၆၈)ဦး စုစုပေါင်း (၁၆၅၀၄)ဦးတို့ကို စနစ်တကျ လွှဲပြောင်းပို့ဆောင်ပေးနိုင်ခဲ့ကြောင်း သိရှိရသည်။
နန်းသန္တာဦး (ပြန်/ဆက်)
