မြင်းမူ ၁ ဒီဇင်ဘာ
မြင်းမူမြို့ ထီးဆောင်းမျက်စိဆေးရုံရှေ့ ကားလမ်းဘေးတွင် ယနေ့ နံနက် ၇ နာရီ မိနစ် ၂၀ ခန့်က မော်တော်ယာဉ် မီးလောင်မှု ဖြစ်ပွားကြောင်း သိရသည်။
ဖြစ်စဉ်မှာ မြင်းမူမြို့ ထီးဆောင်းရွာ မန္တလေး-မုံရွာ ကားလမ်း မိုင်တိုင် ၄၅/၁ နှင့် ၄၅/၂ အကြား ကားလမ်း ယာဘက်ဘေးတွင် ရပ်ထားသော (၂၂)ဘီးတွဲကား ယာဉ်ပေါ်၌ ဖုန်းအားသွင်းပြီးနောက် ယာဉ်မောင်း ထွန်းထွန်းနိုင်(ခ) မောင်ပြား ယာဉ်နောက်လိုက်တို့မှာ ယာဉ်ပေါ်တွင် အိပ်ပျော်နေစဉ် ယာဉ်၏ ဖုန်းအားသွင်းပေါက်မှ အပူလွန်ကဲကာ ယာဉ်ရှေ့ခန်း မီးလောင်ကျွမ်းမှုဖြစ်ပွားခဲ့ခြင်း ဖြစ်သည်။
မီးလောင်ရာသို့ မြင်းမူမြို့မ ရဲစခန်းမှူး ဒုရဲမှူး စိုးမောင်မောင် ဦးစီးကာ တပ်ဖွဲ့ဝင်များ မြင်းမူမြို့နယ် မီးသတ်ဦးစီးဌာနမှ မြို့နယ်မီးသတ်ဦးစီးမှူးပါ တပ်ဖွဲ့ဝင် ၅ ဦး မီးသတ်ယာဉ် တစ်စီးဖြင့် ရောက်ရှိမီးငြှိမ်းသတ်ရာ နံနက် ၇ နာရီ ခွဲခန့်မီးငြှိမ်းခဲ့ကြောင်း သိရသည်။
အဆိုပါ ယာဉ်မီးလောင်မှုကြောင့် ထွန်းထွန်းနိုင်(ခ)မောင်ပြားအား မြင်းမူမြို့မရဲစခန်းက အမှုဖွင့်ထားရှိကြောင်း သိရသည်။
ကိုကိုနိုင် (မြင်းမူ)
