နေပြည်တော် ၂၃ ဖေဖော်ဝါရီ
တောင်ငူခရိုင်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဖေဖော်ဝါရီ ၂၂ ရက် မွန်းလွဲ ၁ နာရီက တောင်ငူမြို့၊ အမှတ်(၂၂)ရပ်ကွက်၊ ပေါက်လှကြီးလမ်းပေါ်တွင်တွေ့ရှိသူ မခင်လပြည့်ဝင်း (ခ)အိအိခိုင် အားရှာဖွေရာ စိတ်ကြွရူးသွပ်ဆေးပြား ၂၅,၃၅၀၊ လက်ကိုင်ဖုန်းတစ်လုံးတို့ကို သိမ်းဆည်းရမိခဲ့ပြီး ဆက်လက်၍ တောင်ငူမြို့၊ အမှတ်(၂)ရပ်ကွက်၊ သီရိမင်္ဂလာလမ်းရှိ ၎င်း၏ နေအိမ်အားရှာဖွေရာ နေအိမ်တွင် ရှင်းခန့်ကို နှင့် စိုင်းကွန်ခမ်း တို့အားတွေ့ရှိပြီး ၎င်းတို့၂ ဦးထံမှ စိတ်ကြွရူးသွပ်ဆေးပြား ၁၃,၇၂၀ ၊ MICRO BUS အမျိုးအစားမော်တော် ယာဉ်တစ်စီးနှင့် လက်ကိုင်ဖုန်း ၂ လုံး၊ စုစုပေါင်း ငွေကျပ်သိန်း ၁၁၇၂ ဒသမ ၁ တန်ဖိုးကို သိမ်းဆည်းရမိခဲ့သည်။
အလားတူ ဖေဖော်ဝါရီ ၂၁ ရက် ညနေပိုင်းက တပ်မတော်မှ မိုင်းဆတ်မြို့နယ်၊ မိုင်းခုတ်မြို့၊ တန့်ဆိုင် ကျေးရွာအုပ်စု၊ ကျဘိုရှီးကျေးရွာအနီးတွင် ဆာလာအိတ်လွယ်ထားသည့် မသင်္ကာဖွယ်လူ ၅ ဦးအား စစ်ဆေးရန် ရပ်တန့်ခိုင်းစဉ် အိတ်များအားပစ်ချပြီး ထွက်ပြေးသွားသဖြင့် ဖွင့်ဖောက်စစ်ဆေးရာ ငွေကျပ်သိန်း ၁၁၉၉၆ သိန်း တန်ဖိုးရှိ အိုက်စ် ၁၀ ကီလို၊ စိတ်ကြွရူးသွပ်ဆေးပြား ၉၉၉,၆၀ဝ သိမ်းဆည်းရမိခဲ့သဖြင့် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများ ဆိုင်ရာ ဥပဒေအရ အရေးယူထားကြောင်း ရဲပြန်ကြားမှ သိရသည်။
(သတင်းစဉ်)
