တိုင်းရင်းဆေးဝါးဥပဒေကြမ်း

ယမန်နေ့မှအဆက်
၃၁။ လိုင်စင်ရရှိသူသည်-
(က) မှတ်ပုံတင်ရရှိသော ဆေးဝါးကိုသာ ထုတ်လုပ်ရမည်၊
( ခ) မှတ်ပုံတင်ရရှိသော ဆေးဝါးကိုထုတ်လုပ်ရာတွင် ဗဟိုတိုင်းရင်း ဆေးဝါးကြီးကြပ်ရေးကော်မတီ၏ သတ်မှတ်ချက်နှင့်အညီ ဆောင်ရွက်ရမည်။
အခန်း (၈)
ပြည်ပတိုင်းရင်းဆေးဝါး၊ ကျန်းမာရေးဖြည့်စွက်ဓာတ်စာများ မှတ်ပုံတင်ခြင်းနှင့် လိုင်စင်လျှောက်ထားခြင်း
၃၂။ ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာ အတွက် မှတ်ပုံတင်လက်မှတ် လျှောက်ထားလိုသူသည် သတ်မှတ်ချက်နှင့် အညီ ဗဟိုတိုင်းရင်းဆေးဝါးကြီးကြပ်ရေး ကော်မတီသို့လျှောက်ထားရမည်။
၃၃။ ဗဟိုတိုင်းရင်းဆေးဝါးကြီးကြပ်ရေးကော်မတီသည် မှတ်ပုံတင်ခွင့်ပြုရန် လျှောက်ထားသော ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက် ဓာတ်စာကို လိုအပ်သလို စိစစ်စေခြင်း၊ စမ်းသပ်စေခြင်း၊ စစ်ဆေးစေခြင်း ပြုလုပ်ပြီး ယင်းပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက် ဓာတ်စာကို မှတ်ပုံတင်ခွင့်ပြုခြင်း သို့မဟုတ် မှတ်ပုံတင်ရန်ငြင်းပယ်ခြင်း ပြုနိုင်သည်။
၃၄။ မှတ်ပုံတင်ခွင့်ရရှိသူသည် မှတ်ပုံတင်ထားသည့် ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာကို သိုလှောင်ခြင်း၊ ဖြန့်ဖြူးခြင်း၊ ပြုပြင်ထုပ်ပိုးခြင်းလုပ်ငန်းများအတွက် သတ်မှတ်ချက်နှင့်အညီ လိုင်စင် လျှောက်ထားရမည်။
၃၅။ ဗဟိုတိုင်းရင်းဆေးဝါးကြီးကြပ်ရေးကော်မတီသည် လျှောက်ထားချက် အပေါ် စိစစ်၍ လိုင်စင်ထုတ်ပေးခြင်း သို့မဟုတ် လိုင်စင်ထုတ်ပေးရန် ငြင်းပယ်ခြင်း ပြုနိုင်သည်။
၃၆။ မှတ်ပုံတင်လက်မှတ်သက်တမ်း၊ မှတ်ပုံတင်ကြေး၊ မှတ်ပုံတင်လက်မှတ် သက်တမ်းတိုးမြှင့်ကြေးတို့နှင့် လိုင်စင်သက်တမ်း၊ လိုင်စင်ကြေး၊ လိုင်စင် သက်တမ်းတိုးကြေးတို့သည် အာဏာပိုင်အဖွဲ့က သတ်မှတ်သည့်အတိုင်း ဖြစ်သည်။
၃၇။ မှတ်ပုံတင်လက်မှတ်ရရှိသူသည် -
(က) ကျသင့်သောမှတ်ပုံတင်ကြေးကို ပေးဆောင်ရမည်၊
(ခ ) မှတ်ပုံတင်ခြင်းဆိုင်ရာ စည်းကမ်းချက်များကို လိုက်နာရမည့် အပြင် ဗဟိုတိုင်းရင်းဆေးဝါးကြီးကြပ်ရေးကော်မတီက အခါ အားလျော်စွာ ထုတ်ပြန်သောအမိန့် ညွှန်ကြားချက်များကို လိုက်နာရမည်၊
(ဂ) မှတ်ပုံတင်လက်မှတ် သက်တမ်းကုန်ဆုံးသည့်အခါ သတ်မှတ် ချက်များနှင့်အညီ စိစစ်မှုခံယူပြီး၊ သက်တမ်းတိုးမြှင့်ရန် မှတ်ပုံတင်လက်မှတ် သက်တမ်းတိုးမြှင့်ကြေးပေးဆောင်၍ လျှောက်ထားရမည်။
၃၈။ ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာ မှတ်ပုံတင်ခွင့်ရရှိသူက မှတ်ပုံတင်ခြင်းဆိုင်ရာ စည်းကမ်းချက်တစ်ရပ်ရပ် ကိုဖြစ်စေ၊ ဗဟိုတိုင်းရင်းဆေးဝါးကြီးကြပ်ရေးကော်မတီက အခါအားလျော်စွာ ထုတ်ပြန်သောအမိန့်၊ ညွှန်ကြားချက်တစ်ရပ်ရပ်ကို ဖြစ်စေ၊ ဖောက်ဖျက် ကြောင်း စစ်ဆေးတွေ့ရှိပါက ဗဟိုတိုင်းရင်းဆေးဝါးကြီးကြပ်ရေးကော်မတီ က မှတ်ပုံတင်ကို ကာလအကန့်အသတ်ဖြင့် ဆိုင်းငံ့ခြင်း၊ ရုပ်သိမ်းခြင်း သို့မဟုတ် ပယ်ဖျက်ခြင်းပြုနိုင်သည်။
၃၉။ မှတ်ပုံတင်ခွင့်ရရှိသူသည် ကာလအကန့်အသတ်ဖြင့် ဆိုင်းငံ့ခြင်း၊ ရုပ်သိမ်းခြင်းကာလ ကုန်ဆုံးသည့်အခါ မှတ်ပုံတင်ခွင့်ကို ပြန်လည် လျှောက်ထားနိုင်သည်။
၄၀။ မှတ်ပုံတင်လက်မှတ် ပယ်ဖျက်ခြင်းခံရသည့် ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာများနှင့်စပ်လျဉ်း၍ ဗဟိုတိုင်းရင်း ဆေးဝါးကြီးကြပ်ရေးကော်မတီ၏ ညွှန်ကြားချက်နှင့်အညီ ဆောင်ရွက်ရမည်။
၄၁။ လိုင်စင်ရရှိသူသည် ကျသင့်သော လိုင်စင်ကြေးပေးဆောင်၍ သိုလှောင် ခြင်း၊ ဖြန့်ဖြူးခြင်း၊ ပြုပြင်ထုပ်ပိုးခြင်းများကို နည်းဥပဒေ၊ အမိန့်၊ ညွှန်ကြား ချက်များနှင့်အညီ လိုက်နာဆောင်ရွက်ရမည်။
၄၂။ လိုင်စင်ရရှိသူသည် လိုင်စင်သက်တမ်းကုန်ဆုံးသည့်အခါ သတ်မှတ်ချက် များနှင့်အညီ သက်တမ်းတိုးမြှင့်ရန် လိုင်စင်သက်တမ်းတိုးမြှင့်ကြေး ပေးဆောင်၍ လျှောက်ထားရမည်။
၄၃။ ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာ လိုင်စင်ရရှိသူက လိုင်စင်ပါ စည်းကမ်းချက်တစ်ရပ်ရပ်ကိုဖြစ်စေ၊ တိုင်းရင်းဆေးဝါးကြီးကြပ်ရေးကော်မတီက အခါအားလျော်စွာ ထုတ်ပြန်သောအမိန့်၊ ညွှန်ကြားချက်တစ်ရပ်ရပ်ကိုဖြစ်စေ၊ ဖောက်ဖျက်ကြောင်း စစ်ဆေးတွေ့ ရှိပါက ဗဟိုတိုင်းရင်းဆေးဝါးကြီးကြပ်ရေးကော်မတီက လိုင်စင်ကိုကာလ အကန့်အသတ်ဖြင့် ဆိုင်းငံ့ခြင်း၊ ရုပ်သိမ်းခြင်း သို့မဟုတ် ပယ်ဖျက်ခြင်း ပြုနိုင်သည်။
၄၄။ ကာလအကန့်အသတ်ဖြင့် ဆိုင်းငံ့ခြင်း၊ ရုပ်သိမ်းခြင်း ကာလကုန်ဆုံးသည့် အခါ လိုင်စင်ကို ပြန်လည်လျှောက်ထားနိုင်သည်။
၄၅။ လိုင်စင်ပယ်ဖျက်ခြင်းခံရသူသည် လိုင်စင်ကို ထပ်မံလျှောက်ထားခြင်း မရှိစေရ။
၄၆။ လိုင်စင်ပယ်ဖျက်ခြင်းခံရသူ၏ လက်ဝယ်တွင်ရှိသော ပြည်ပတိုင်းရင်း ဆေးဝါး သို့မဟုတ် ကျန်းမာရေးဖြည့်စွက်ဓာတ်စာများကို ဗဟိုတိုင်းရင်းဆေးဝါးကြီးကြပ်ရေးကော်မတီက ညွှန်ကြားသည့်အတိုင်း လိုက်နာဆောင်ရွက်ရမည်။
အခန်း (၉)
အယူခံခြင်း
၄၇။ ဗဟိုတိုင်းရင်းဆေးဝါး ကြီးကြပ်ရေးကော်မတီက ဆေးဝါးနှင့်စပ်လျဉ်း၍ ချမှတ်သည့် အောက်ပါဆုံးဖြတ်ချက်တစ်ရပ်ရပ်ကို မကျေနပ်သူသည် ယင်းဆုံးဖြတ်ချက် ချမှတ်သည့်နေ့မှ ရက်ပေါင်း ၆ဝ အတွင်း အာဏာပိုင်အဖွဲ့သို့ အယူခံဝင်နိုင်သည်-
(က) မှတ်ပုံတင်လက်မှတ်ထုတ်ပေးရန်သို့မဟုတ် မှတ်ပုံတင်သက်တမ်း တိုးမြှင့်ပေးရန် ငြင်းပယ်ခြင်း၊
( ခ ) မှတ်ပုံတင်လက်မှတ်ကို ကာလအကန့်အသတ်ဖြင့် ရုပ်သိမ်းခြင်း သို့မဟုတ် ပယ်ဖျက်ခြင်း၊
( ဂ) လိုင်စင်ထုတ်ပေးရန် သို့မဟုတ် လိုင်စင်သက်တမ်းတိုးပေးရန် ငြင်းပယ်ခြင်း၊
(ဃ) လိုင်စင်ကို ကာလအကန့်အသတ်ဖြင့် ရုပ်သိမ်းခြင်း သို့မဟုတ် ပယ်ဖျက်ခြင်း။
၄၈။ အာဏာပိုင်အဖွဲ့သည် ပုဒ်မ ၄၈ အရ အယူခံမှုတွင် ဗဟိုတိုင်းရင်းဆေးဝါး ကြီးကြပ်ရေးကော်မတီက ချမှတ်သော အမိန့်တစ်ရပ်ရပ်ကို ပြင်ဆင်ခြင်း၊ ပယ်ဖျက်ခြင်း သို့မဟုတ် အတည်ပြုခြင်းပြုနိုင်သည်။
၄၉။ အာဏာပိုင်အဖွဲ့၏ ဆုံးဖြတ်ချက်သည် စီမံခန့်ခွဲရေးနည်းလမ်းအရ အပြီး အပြတ်ဖြစ်သည်။
အခန်း (၁၀)
တားမြစ်ချက်များ
၅၀။ မည်သူမျှ အောက်ဖော်ပြပါ တိုင်းရင်းဆေးဝါးကို ထုတ်လုပ်ခြင်း၊ ဖြန့်ဖြူး ခြင်းမပြုရ -
(က) မှတ်ပုံတင်ထားခြင်းမရှိသော တိုင်းရင်းဆေးဝါး၊
( ခ ) မှတ်ပုံတင်လက်မှတ် ကာလအကန့်အသတ်ဖြင့် ရုပ်သိမ်းခြင်း သိုမဟုတ် ပယ်ဖျက်ခြင်းပြုလုပ်ထားသော တိုင်းရင်းဆေးဝါး၊
( ဂ ) စံမညီဆေးဝါး၊
(ဃ) ဗဟိုတိုင်းရင်းဆေးဝါးကြီးကြပ်ရေးကော်မတီမှ ရောနှောဆေးဝါး ဖြစ်သည်ဟု ကြော်ငြာထားသောဆေးဝါး၊
( င ) သုံးစွဲရန်မသင့်ဟု ဝန်ကြီးဌာနက အမိန့်ကြော်ငြာစာထုတ်ပြန်၍ သတ်မှတ်ထားသော တိုင်းရင်းဆေးဝါး၊
၅၁။ မည်သူမျှ အောက်ဖော်ပြပါ တိုင်းရင်းဆေးဝါးကို ရောင်းချခြင်းမပြုရ -
(က) မှတ်ပုံတင်ထားခြင်းမရှိသော တိုင်းရင်းဆေးဝါး၊
( ခ ) မှတ်ပုံတင်လက်မှတ်ကို ပယ်ဖျက်ခြင်း သို့မဟုတ် ကာလအကန့် အသတ်ဖြင့် ရုပ်သိမ်းခြင်းပြုထားသော တိုင်းရင်းဆေးဝါး၊
( ဂ ) ပျက်စီးတိုင်းရင်းဆေးဝါး၊
(ဃ) ဗဟိုတိုင်းရင်းဆေးဝါးကြီးကြပ်ရေးကော်မတီမှ ရောနှောဆေးဝါး ဖြစ်သည်ဟု ကြော်ငြာထားသောဆေးဝါး၊
( င ) သုံးစွဲရန်မသင့်ဟု ဝန်ကြီးဌာနက အမိန့်ကြော်ငြာစာထုတ်ပြန်၍ သတ်မှတ်ထားသော မှတ်ပုံတင်တိုင်းရင်းဆေးဝါး။
၅၂။ မည်သူမျှ ဆေးဝါးထုတ်လုပ်ခွင့်လိုင်စင်မရှိဘဲ ဆေးဝါးကိုထုတ်လုပ်ခြင်း မပြုရ။
၅၃။ မည်သူမျှ မှတ်ပုံတင်ထားခြင်းမရှိသော ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာကို ပြည်ပမှတင်သွင်းခြင်းမပြုရ။
၅၄။ မည်သူမျှ လိုင်စင်မရှိဘဲ ပြည်ပတိုင်းရင်းဆေးဝါး သို့မဟုတ် ကျန်းမာရေး ဖြည့်စွက်ဓာတ်စာကို သိုလှောင်ခြင်း၊ ဖြန့်ဖြူးခြင်း၊ ပြုပြင်ထုပ်ပိုးခြင်း မပြုရ။
၅၅။ မှတ်ပုံတင်လက်မှတ်ကို ကာလအကန့်အသတ်ဖြင့် ဆိုင်းငံ့ခြင်း၊ ရုပ်သိမ်း ခြင်းပြုထားသည့် ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာများကို ကန့်သတ်ထားသည့် ကာလအတွင်း ဖြန့်ဖြူးခြင်း၊ ရောင်းချ ခြင်းမပြုရ။
၅၆။ မည်သူမျှ မှတ်ပုံတင်ထားခြင်းမရှိသော ပြည်ပတိုင်းရင်းဆေးဝါး သို့မဟုတ် ကျန်းမာရေးဖြည့်စွက်ဓာတ်စာကို ရောင်းချခြင်းမပြုရ။
၅၇။ မည်သူမျှ မှတ်ပုံတင်ရရှိပြီးဖြစ်သော ဆေးဝါးတစ်မျိုးမျိုးကို အတုအပ ပြုလုပ်ခြင်းမပြုရ။
အခန်း (၁၁)
ပြစ်မှုနှင့် ပြစ်ဒဏ်များ
၅၈။ မည်သူမဆို ပုဒ်မ ၅၀ ပါ တားမြစ်ချက်တစ်ရပ်ရပ်ကို ဖောက်ဖျက်ကျူးလွန် ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို သုံးနှစ်ထက်မပိုသော ထောင်ဒဏ် ချမှတ်ရမည့်အပြင် ကျပ်ငါးသိန်းထက်မပိုသော ငွေဒဏ် ချမှတ်ရ မည်။
၅၉။ မည်သူမဆို ပုဒ်မ ၅၁ ပါ တားမြစ်ချက် တစ်ရပ်ရပ်ကို ဖောက်ဖျက်ကျူးလွန် ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို နှစ်နှစ်ထက်မပိုသော ထောင်ဒဏ်ချမှတ်ရမည့်အပြင် ကျပ်သုံးသိန်းထက်မပိုသော ငွေဒဏ်ချမှတ် ရမည်။
၆၀။ မည်သူမဆို ပုဒ်မ ၅၂ ပါ တားမြစ်ချက်ကို ဖောက်ဖျက်ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင်-
(က) မှတ်ပုံတင်ထားခြင်းမရှိသော ဆေးဝါးနှင့်သက်ဆိုင်သည့် ပြစ်မှု ဖြစ်ပါက ထိုသူကို သုံးနှစ်ထက်မပိုသော ထောင်ဒဏ် ချမှတ်ရမည့် အပြင် ကျပ်ငါးသိန်းထက်မပိုသော ငွေဒဏ်ကျခံစေရမည်၊
( ခ) မှတ်ပုံတင်ထားသော ဆေးဝါးနှင့်သက်ဆိုင်သည့် ပြစ်မှုဖြစ်ပါက ထိုသူကို နှစ်နှစ်ထက် မပိုသော ထောင်ဒဏ်ချမှတ်ရမည့်အပြင် ကျပ်သုံးသိန်းထက်မပိုသော ငွေဒဏ်ကျခံစေရမည်၊
( ဂ) ပြစ်မှုနှင့်သက်ဆိုင်သော သက်သေခံပစ္စည်းများကိုလည်း ပြည်သူ့ ဘဏ္ဍာအဖြစ် သိမ်းယူခြင်းခံရမည်။
၆၁။ မည်သူမဆို ပုဒ်မ ၅၃၊ ၅၄ သို့မဟုတ် ၅၇ ပါ တားမြစ်ချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို သုံးနှစ်ထက်မပိုသော ထောင်ဒဏ်ချမှတ်ရမည့်အပြင် ကျပ်ငါးသိန်းထက် မပိုသော ငွေဒဏ်ချမှတ်ရမည်။
၆၂။ မည်သူမဆို ပုဒ်မ ၅၆ ပါ တားမြစ်ချက်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို နှစ်နှစ်ထက်မပိုသော ထောင်ဒဏ် ချမှတ်ရမည့်အပြင် ကျပ်သုံးသိန်းထက်မပိုသော ငွေဒဏ်ချမှတ်ရမည်။
၆၃။ မည်သူမဆို ပုဒ်မ ၅၅ ပါ တားမြစ်ချက်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင် ခြင်းခံရလျှင် ထိုသူကို သုံးနှစ်ထက်မပိုသော ထောင်ဒဏ် ချမှတ်ရမည့်အပြင် ကျပ်ငါးသိန်းထက် မပိုသော ငွေဒဏ်ချမှတ်ရမည်။
၆၄။ မည်သူမဆို ဤဥပဒေပါ ပြစ်မှုတစ်ရပ်ရပ်ကို ထပ်မံကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ငါးနှစ်ထက်မပိုသော ထောင်ဒဏ် ချမှတ်ရမည့်အပြင် ကျပ်ဆယ်သိန်းထက်မပိုသော ငွေဒဏ်ချမှတ်ရမည်။
အခန်း(၁၂)
အထွေထွေ
၆၅။ တည်ဆဲဥပဒေတစ်ရပ်ရပ်တွင် မည်သို့ပင်ပြဋ္ဌာန်းပါရှိစေကာမူ တိုင်းရင်း ဆေးဝါးကိစ္စရပ်နှင့် စပ်လျဉ်း၍ ဤဥပဒေပါပြဋ္ဌာန်းချက်များနှင့်အညီ လိုက်နာ ဆောင်ရွက်ရမည်။
၆၆။ နိုင်ငံ့ဝန်ထမ်းမဟုတ်သော အာဏာပိုင်အဖွဲ့ဝင်၏ ချီးမြှင့်ငွေနှင့်စရိတ်များ အတွက် ဝန်ကြီးဌာန၏ ဘဏ္ဍာရန်ပုံငွေမှ ကျခံရမည်။
၆၇။ ဤဥပဒေပါ ပြစ်မှုများကို ရဲအရေးယူပိုင်ခွင့်ရှိသော ပြစ်မှုအဖြစ် သတ်မှတ် သည်။
၆၈။ ဝန်ကြီးဌာနသည်အစိုးရဌာန သို့မဟုတ် အဖွဲ့အစည်းတစ်ခုခုအား တိုင်းရင်းဆေးဝါး၏ အရည်အသွေးနှင့် အာနိသင်အား ထိခိုက်မှုမရှိပါက ဤဥပဒေပါပြဋ္ဌာန်းချက် တစ်ရပ်ရပ်ကို လိုက်နာ ဆောင်ရွက်ခြင်းမှ ကင်းလွတ် ခွင့်ပြုနိုင်သည်။
၆၉။ တစ်ပိုင်တစ်နိုင် တိုင်းရင်းဆေးဝါးလုပ်ငန်းသည် ထုတ်လုပ်ခွင့်လိုင်စင် ကင်းလွတ်ခွင့်အတွက် သတ်မှတ်ထားသည့် နည်းလမ်းနှင့်အညီ အာဏာပိုင် အဖွဲ့သို့ လျှောက်ထားရမည်။
၇၀။ တိုင်းရင်းဆေးဝါးကို ပြည်ပသို့ တင်ပို့ရောင်းချလိုသူသည် တည်ဆဲဥပဒေ တစ်ရပ်ရပ်အရ သက်ဆိုင်ရာအစိုးရဌာန အဖွဲ့အစည်း၏ ခွင့်ပြုချက်ရယူရမည်။
၇၁။ ပြည်ပသို့တင်ပို့ရန် ခွင့်ပြုချက်ထုတ်ပေးခွင့်ရှိသော အစိုးရဌာန သို့မဟုတ် အဖွဲ့အစည်းသည် ဤဥပဒေအရ မှတ်ပုံတင်ထားသော တိုင်းရင်းဆေးဝါးကိုသာ တင်ပို့ခွင့်ပြုနိုင်သည်။
၇၂။ ဤဥပဒေအာဏာသက်ရောက်သည့်နေ့မှစ၍ တိုင်းရင်းဆေးဝါးထုတ်လုပ်ခြင်းလုပ်ငန်း လုပ်ကိုင်လိုသူသည် ဤဥပဒေနှင့်အညီ မှတ်ပုံတင်ခြင်း၊ လိုင်စင်ရယူခြင်းတို့ကို ဆောင်ရွက်ရမည်။
၇၃။ ဤဥပဒေအာဏာသက်ရောက်သည့်နေ့တွင် တိုင်းရင်းဆေးဝါးဥပဒေ (နိုင်ငံတော်ငြိမ်ဝပ် ပိပြားမှုတည်ဆောက်ရေးအဖွဲ့ ဥပဒေအမှတ် ၇/၉၆)အရ တိုင်းရင်းဆေးဝါးမှတ်ပုံတင်နှင့် တိုင်းရင်းဆေးဝါးထုတ်လုပ်ခွင့်လိုင်စင် ရရှိထားပြီးသူများသည် ဤဥပဒေနှင့် မဆန့်ကျင်ပါက သက်တမ်းကုန်သည် အထိ ဆက်လက်အတည်ဖြစ်၍ သက်တမ်းတိုးဆောင်ရွက်သောအခါ ပုဒ်မ ၁၄ ပုဒ်မခွဲ(ဂ)နှင့် ပုဒ်မ ၂၂ ပုဒ်မခွဲ(ဂ) တို့အရ ဆောင်ရွက်ရမည်။
၇၄။ ဤဥပဒေပါ ပြစ်မှုများကို အာမခံပေးနိုင်သော ပြစ်မှုအဖြစ် သတ်မှတ် သည်။
၇၅။ တည်ဆဲဥပဒေတစ်ရပ်ရပ်အရ ခွင့်ပြုချက် တစ်စုံတစ်ရာမရှိဘဲ ပြည်ပ သို့တင်ပို့သည့် တိုင်းရင်းဆေးဝါးများကို သက်ဆိုင်ရာအစိုးရဌာန သို့မဟုတ် အဖွဲ့အစည်းတစ်ခုခုက ဖမ်းဆီးရမိလျှင် သက်သေခံပစ္စည်းအား အာဏာ ပိုင်အဖွဲ့ သို့မဟုတ် အာဏာပိုင်အဖွဲ့က လွှဲအပ်ခြင်းခံရသော အဖွဲ့ အစည်းသည် သတ်မှတ်ထားသော နည်းလမ်းများနှင့်အညီ လွှဲပြောင်းနိုင်ရန် စီမံဆောင်ရွက် ရမည်။
၇၆။ အာဏာပိုင်အဖွဲ့နှင့် အာဏာပိုင်အဖွဲ့က တာဝန်လွှဲအပ်ခြင်းခံရသော အဖွဲ့အစည်း၏ ရုံးလုပ်ငန်းများကို တိုင်းရင်းဆေးပညာဦးစီးဌာနက ဆောင်ရွက်ရမည်။
၇၇။ ဝန်ကြီးဌာနသည် တိုင်းရင်းဆေးဝါးစိစစ်ရေးလုပ်ငန်းများကို ဆောင်ရွက် ရန် မိမိလက်အောက်ရှိ ဝန်ထမ်းများကို တိုင်းရင်းဆေးဝါးစစ်ဆေးရေးမှူး များအဖြစ် တာဝန်ပေးအပ်နိုင်သည်။
၇၈။ ဤဥပဒေပြဋ္ဌာန်းချက်များကို အကောင်အထည်ဖော်ဆောင်ရွက်ရာတွင်-
(က) ဝန်ကြီးဌာနသည် နည်းဥပဒေများ၊ စည်းမျဉ်းနှင့် စည်းကမ်းများကို ပြည်ထောင်စု အစိုးရအဖွဲ့၏ သဘောတူညီချက်ဖြင့် ထုတ်ပြန်နိုင် သည်၊
( ခ ) ဝန်ကြီးဌာနနှင့် ဗဟိုတိုင်းရင်းဆေးဝါးကြီးကြပ်ရေးကော်မတီတို့သည် အမိန့်ကြော်ငြာစာ၊ အမိန့်၊ ညွှန်ကြားချက်နှင့် လုပ်ထုံး လုပ်နည်းများကို ထုတ်ပြန်နိုင်သည်၊
( ဂ ) ဦးစီးဌာနသည် ဝန်ကြီးဌာန၏ သဘောတူညီချက်ဖြင့် အမိန့်နှင့် ညွှန်ကြားချက်များကို ထုတ်ပြန်နိုင်သည်။
၇၉။ တိုင်းရင်းဆေးဝါးဥပဒေ (နိုင်ငံတော် ငြိမ်ဝပ်ပိပြားမှု တည်ဆောက် ရေးအဖွဲ့ ဥပဒေအမှတ် ၇/၉၆) ကို ဤဥပဒေဖြင့် ရုပ်သိမ်းလိုက်သည်။