ငမြှောင်တောင်ပိုး ကာကွယ်နှိမ်နှင်းနည်းနှင့် အာလူးစိုက်ပျိုးရေးဆိုင်ရာ နည်းပညာပေးဆွေးနွေးပွဲကို ယနေ့ နံနက် ၉ နာရီတွင် ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ ပင်လောင်းမြို့နယ် ပေါ့အင်ကျေးရွာအုပ်စု ထီရယ်ဘုန်းတော်ကြီးကျောင်း၌ ကျင်းပခဲ့သည်။

နိုင်ငံတကာ ကျန်းမာရေးဆိုင်ရာ စောင့်ရှောက်မှုပြပွဲကြီးကို မေ ၃ ရက်မှ ၅ ရက်ထိ မန္တလေးမြို့ ချမ်းအေးသာစံမြို့နယ် (၂၆)လမ်းနှင့် (၇၁)လမ်းဒေါင့်ရှိ မြို့တော်ခန်းမတွင် ကျင်းပသွားမည်ဖြစ်ကြောင်း သိရသည်။ 

ပဲခူးတိုင်းဒေသကြီး သာယာဝတီခရိုင် ကြို့ပင်ကောက်မြို့ ဘန်းဘွေးကုန်းကျေးရွာတွင် နွေရာသီကာလအတွင်း သောက်သုံးရေ အခက်အခဲ မဖြစ်ပေါ်စေရန်နှင့် သန့်ရှင်းသော သောက်သုံးရေများ ရရှိသုံးစွဲနိုင်ရန် ရည်ရွယ်၍ မေ ၁ ရက် နံနက်ပိုင်းက တိုင်းဒေသကြီး ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနပိုင် ရွေ့လျားရေသန့်စင်ယာဉ်ဖြင့် ဘန်းဘွေးကုန်းကျေးရွာ ဘုန်းတော်ကြီးကျောင်း ရေကန်အတွင်းမှ ရေများကို စုပ်ယူသန့်စင်ပြီး ကျေးလက်နေပြည်သူများအား ဖြန့်ဝေပေးခဲ့ကြောင်း သိရသည်။

(၁၂၉)ကြိမ်မြောက် အပြည်ပြည်ဆိုင်ရာ အလုပ်သမားနေ့ အခမ်းအနားမှာ မန္တလေးမြို့ရှိ အလုပ်သမားများက လုပ်ခလစာကို တစ်နှစ်လျှင် တစ်ကြိမ် သုံးသပ်ပြင်ဆင်ပေးရေးအပါအဝင် အချက်ခြောက်ချက်ကို လမ်းလျှောက်ချီတက် တောင်းဆိုမှု ပြုလုပ်ခဲ့သည်။

မွန်ပြည်နယ် သထုံမြို့တွင် ယာဉ်အန္တရာယ် ကင်းရှင်းစေရေးအတွက် သထုံမြို့လယ်ခေါင်ရှိ သုဝဏ္ဏဈေးနှင့် မြို့မဈေးဝန်းကျင်၌ တစ်လမ်းမောင်းစနစ် ကျင့်သုံးခြင်းကို ယနေ့နံနက်ပိုင်းမှ စတင်ကာ တာဝန်ရှိသူများက ပူးပေါင်းဆောင်ရွက်လျက်ရှိကြောင်း သိရသည်။

လူမှုဖူလုံရေး အကျုံးဝင် အာမခံအလုပ်သမားများ အလုပ်တွင် ထိခိုက်သေဆုံးမှုအတွက် ကျန်ရစ်သူမိသားစုအား အကျိုးခံစားခွင့် ပေးအပ်ပွဲကို ဧပြီ ၃၀ ရက် မွန်းလွဲ ၁ နာရီက မကွေးတိုင်းဒေသကြီး မင်းဘူးမြို့နယ် မန်းရေနံမြေ စုပေါင်းရုံး၌ ကျင်းပသည်။