အိမ်မဲ ၁၂ အောက်တိုဘာ
ဧရာဝတီတိုင်းဒေသကြီး မြောင်းမြခရိုင် အိမ်မဲမြို့ မြို့မဈေးကြီးတွင် သတင်းကျွတ်ရုံးပိတ်ရက် အောက်တိုဘာလ ၁၂ ရက်နံနက် ၉ နာရီက ဈေးဝယ်သူများဖြင့် စည်ကားနေကြောင်း သိရသည်။
"ကျွန်မတို့က အိမ်မဲမြို့နယ် သဖန်းပင်ဆိပ်ကျေးရွာက ဈေးလာဝယ်တာပါ။ သီတင်းကျွတ်လပြည့်နေ့ကျရင် ရွာကဘုရားမှာ အလှူရှိလို့ ဘုရားမှာကပ်လှူဖို့ ဖရောင်းတိုင်၊ အမွှေးတိုင်၊ သစ်သီးမျိုးစုံနဲ့ တစ်ခြားလိုအပ်တာတွေ လာရောက်ဝယ်ယူတာပါလို့'' ဈေးလာဝယ်သူတစ်ဦးက ပြောသည်။
"အရင်ရက်တွေတုန်းကဆို ပုံမှန်အတိုင်းပဲရောင်းရတယ်။ ခုရက်တွေကတော့ အရောင်းအဝယ် ကောင်းတယ်လို့ဆိုရမယ်။ မြန်မာလူမျိုးတို့၏ ဓလေ့ထုံးတမ်းအတိုင်း ဝါကျွတ်တဲ့အခါ အလှူတွေလုပ်ကြ မိဘဆရာသမားတွေကို ပူဇော်ကန်တော့ကြနဲ့ အရမ်းစည်ကားတဲ့အချိန် ဖြစ်ပါတယ်လို့'' သစ်သီးရောင်းသူတစ်ဦးက ပြောသည်။
အိမ်မဲမြို့နယ်သည် အကျယ်အဝန်းအားဖြင့် ဧရိယာစတုရန်းမိုင် (၂၈၆.၆၅)ရှိပြီး ရပ်ကွက်(၅)ရပ်ကွက် ကျေးရွာအုပ်စု(၉၇)အုပ်စု ကျေးရွာခွဲ(၅၀၅)ရွာ လူဦးရေ(၂၁၁၂၅၇)ဦးရှိပြီး ယခုလို သတင်းကျွတ်ရုံးပိတ်ရက် ကာလရောက်တဲ့အခါ ကျေးရွာဒေသအသီးသီးမှ ပြည်သူများက အလှူအတန်းများ ပြုလုပ်ကြရန်အတွက် မြို့မဈေးကြီးအတွင်း ဈေးဝယ်ကြရာ စည်ကားများပြားလျက်ရှိကြောင်း သိရသည်။
ချစ်သက်လယ်(ပြန်/ဆက်)
