ထွန်းသစ်စ
လူဦးရေ ၁ ဒသမ ၃ ဘီလီယံရှိတဲ့ အိန္ဒိယနိုင်ငံမှာ ၂၁ ရက်ကြာ အသွားအလာ ကန့်သတ်မှုတွေ လုပ်ဆောင်တာကြောင့် ကိုရိုနာဗိုင်းရပ်စ် စိုးရိမ်ပူပန်စိတ် တွေမြင့်တက်နေတဲ့ အိန္ဒိယနိုင်ငံသားတွေဟာ အခြေခံမရှိမဖြစ် စားကုန်လိုအပ်ချက်တွေပြည့်စုံဖို့အတွက် သူ့ထက်ငါ အသည်းအသန် အလုအယက် ဝယ်ယူခဲ့ကြပါတယ်။ ကိုရိုနာဗိုင်းရပ်စ်ကူးစက်ပျံ့နှံ့မှုကို နှေးကွေးအောင် လုပ်ဆောင်ဖို့ ကမ္ဘာ့ဒုတိယလူဦးရေအများဆုံးဖြစ်တဲ့ အိန္ဒိယနိုင်ငံမှာ အသွား အလာကန့်သတ်မှုတွေလုပ်ဆောင်လိုက်တယ်ဆိုရင်ပဲ အိန္ဒိယနိုင်ငံရဲ့ မြို့ကြီး တွေဖြစ်တဲ့ နယူးဒေလီနဲ့ မွမ်ဘိုင်းလိုမျိုး တကယ့်ကြီးကျယ်ခမ်းနားတဲ့ မြို့ကြီးတွေမှာတောင် ဆန်နဲ့ ပဲနီလေးကဲ့သို့သော အခြေခံစားသောက်စရာတွေ ရောင်းချတဲ့စင်ပေါင်း မြောက်မြားစွာဟာ အခုတော့ ပြောင်တလင်းခါနေပြီ ဖြစ်ပါတယ်။
ဒဏ်ခတ်အရေးယူမယ်
တကယ့်ကို အခြေခံစားသောက်ကုန်တွေပြတ်လပ်ပြီး ခက်ခဲတဲ့အခြေ အနေတွေဟာလည်း တဖြည်းဖြည်းမြင့်တက်လာနေပါပြီလို့ မွမ်ဘိုင်းမှာ ဟင်းသီးဟင်းရွက်ရောင်းချသူတစ်ဦးဖြစ်တဲ့ အသက် ၃၅ နှစ်ရှိ ရာဖစ်အန်စာရီ က ပြောပါတယ်။ လာမယ့်ရက်တွေမှာ ဒီထက်ပိုမိုဆိုးရွားတဲ့ အခြေအနေတွေနဲ့ ရင်ဆိုင်ရနိုင်တယ်လို့ သူက ဆက်လက်ပြောပါတယ်။ ထို့အတူပဲ ကုန်ဈေးနှုန်း တွေဟာလည်း မြင့်တက်လာခဲ့ပါတယ်။ ခရမ်းချဉ်သီးရဲ့ ဈေးဟာလည်း ထက်ဝက်လောက် မြင့်တက်လာခဲ့ပါတယ်။
ပတ်ဝန်းကျင်ညစ်ညမ်းမှုမှာ အဆိုးရွားဆုံးဖြစ်နေတဲ့ အိန္ဒိယနိုင်ငံရဲ့ မြို့တော် နယူးဒေလီမှာတော့ တချို့ဘတ်စ်ကားတွေဟာ ပြေးဆွဲနေတုန်း ရှိပါသေးတယ်။ သို့သော်လည်း ကားတိုင်းတော့မဟုတ်ပါဘူး။ အစိုးရရဲ့ခွင့်ပြုချက်ရတဲ့သူတွေပဲ ကားမောင်းလို့ရတာ ဖြစ်ပါတယ်။ ရဲတပ်ဖွဲ့ဝင်တွေနဲ့ အရန်တပ်ဖွဲ့ဝင်တွေဟာ ပုဂ္ဂလိကမှောင်ခိုပြေးဆွဲနေတဲ့ကားတွေကို ရပ်နား စေခဲ့သလို မလိုအပ်တဲ့ကားတွေ ပြေးဆွဲမှုမရှိအောင်လည်း ဆောင်ရွက်လျက် ရှိပါတယ်။
ဒေလီအပြင်ဘက် ဂါဇီယာဘတ်မှာဆိုရင် ပြည်သူတွေဟာ ကိုရိုနာ ဗိုင်းရပ်စ်နဲ့ပတ်သက်တဲ့ အသစ်အသစ်သောဆောင်ရွက်မှုတွေအပေါ် စိုးထိတ် နေကြသလို အသွားအလာကန့်သတ်မှုဆိုင်ရာ စည်းမျဉ်းစည်းကမ်းတွေဟာ လည်း ရှင်းလင်းမြင်သာမှုမရှိဘူးဆိုပြီး စောဒကတက်နေကြပါတယ်။ တချို့ ကလည်း သူတို့အပြင်ဘက်ဆေးထွက်ဝယ်တဲ့အခါ ရဲတပ်ဖွဲ့ဝင်တွေရဲ့ နှောင့်ယှက်မှုတွေနဲ့ ကြုံတွေ့ရတယ်လို့လည်း ပြောပါတယ်။
အိန္ဒိယဝန်ကြီးချုပ် နာရိန်ဒရာမိုဒီရဲ့ ကြေညာချက်အရ လိုအပ်လို့ချမှတ် လိုက်တဲ့ စည်းမျဉ်းစည်းကမ်းတွေအပေါ် လေးစားလိုက်နာမှုမရှိရင် ထောင်ဒဏ်နှစ်နှစ်ဖြစ်စေ သို့မဟုတ် ငွေဒဏ်ဖြစ်စေ ဒဏ်ခတ်အရေးယူ သွားမှာဖြစ်ကြောင်း ဖော်ပြထားပါတယ်။
ရသလောက်တော့ပြန်ရောင်းမယ်
ကိုရိုနာဗိုင်းရပ်စ်ကူးစက်ပျံ့နှံ့မှုကြောင့် ကြောက်အားပိုပြီး အခြေခံ စားသောက်ကုန်တွေကို အလုအယက် တိုးဝှေ့ဝယ်ယူခြင်းဟာ နိုင်ငံကို နာရီ အတော်ကြာ ကျဉ်းထဲကျပ်ထဲရောက်စေနိုင်ကြောင်းနဲ့ အခြေခံစားကုန်များ ပြတ်လပ်သွားမှာကို စိုးရိမ်စိတ်မဖြစ်ဘဲ စိတ်အေးလက်အေးနေထိုင်ရန် ဝန်ကြီးချုပ် မိုဒီက တွစ်တာမှာ တိုက်တွန်းဖော်ပြထားပါတယ်။
အခြေခံစားသောက်ကုန်တွေ၊ ဆေးဝါးတွေမပြတ်လပ်ဘဲ အချိန်မရွေး ရရှိနိုင်ကြောင်း၊ ဒီလိုရရှိနိုင်အောင်လည်း သက်ဆိုင်ရာ အစိုးရအဖွဲ့အစည်းနဲ့ ဌာနဆိုင်ရာအဖွဲ့အစည်းတွေ ပူးပေါင်းဆောင်ရွက်နေကြကြောင်းလည်း မိုဒီက ဆက်လက်ပြောကြားပါတယ်။
သို့သော်လည်း မတ် ၂၅ ရက်မှာတော့ ဈေးသည်တွေဟာ သူတို့ရဲ့ ဆိုင်တွေကို ဆက်ဖွင့်ဖို့ရာ စိုးတထိတ်ထိတ်ဖြစ်နေကြပါတယ်။ ကုန်ပစ္စည်း များပြတ်လပ်နေသလို ကုန်ပစ္စည်းများ မြို့ထဲကိုမဝင်နိုင်အောင်တားဆီးမှုတွေလည်းရှိနေတယ်လို့ သူတို့က စောဒကတက်ပြောကြားကြပါတယ်။
“ကျွန်တော်တို့ နို့တွေလည်းရတယ်။ ကြက်ဥတွေနဲ့ပေါင်မုန့်တွေလည်းရတယ်။ ဒါပေမယ့် ပုံမှန်အားဖြင့်ဆိုရင်တော့ ကျွန်တော်တို့ ပေါင်မုန့်အထုပ် ၁၀၀ ရတယ်။ ဒါပေမယ့် ဒီနေ့တော့ ကျွန်တော်တို့ အထုပ် ၂၀ ပဲရတယ်”လို့ ဒေလီမှ ဈေးသည်တစ်ဦးက ပြောပါတယ်။
“ကျွန်တော်တို့ ရသလောက်တော့ ပြန်ရောင်းပေးနေပါတယ်။ ဒါပေမယ့် ဘယ်လောက်ကြာအောင် ကျွန်တော့်အနေနဲ့ ဆက်လုပ်ပေးနိုင်မလဲ ဆိုတာ မကျိန်းသေပါဘူး”လို့ သူကဆက်ပြောပါတယ်။
ခြောက်ကပ်တိတ်ဆိတ်သွား
လမ်းရှင်းလင်းရေးလုပ်သား အာဂျေးက သူနဲ့ သူ့အပေါင်းအဖော်တွေကို အလုပ်နေ့တိုင်းပြန်ဆင်းဖို့ပြောတယ်လို့ ပြောပါတယ်။ ဒါပေမယ့်လည်း အခုလို အချိန်မှာ ဝန်ထမ်းတွေ ပြတ်လပ်နေပါတယ်။ “ကျွန်တော်နဲ့တချို့လူတွေကတော့ ကိုယ်ပိုင်ယာဉ်လေးတွေရှိတော့ လာနိုင်ပါတယ်။ ဒါပေမယ့် ဝေးလံတဲ့နေရာမှာ ရှိနေသူတွေကတော့ ဘယ်လိုမှမလာနိုင်ဘူး”လို့လည်း အာဂျေးက ဆက်လက် ပြောပါတယ်။ သူ့အနေနဲ့ ကိုရိုနာဗိုင်းရပ်စ်ကူးစက်ခံရမှာ ကြောက်တဲ့အတွက် နှာခေါင်းစည်းကိုတော့ ကိုယ့်ဟာကိုယ်ဝယ်တပ်တယ်လို့ သူကပြောပါတယ်။
“ကျွန်တော်လိုပဲ အများစုလည်း ဒီလိုပါပဲ။ ကျွန်တော်တို့ ကိုရိုနာဗိုင်းရပ်စ် ကူးစက်ခံရနိုင်လား။ ကျွန်တော်တို့မှာ အကာအကွယ်ပစ္စည်းတွေ ဘာတစ်ခုမှ မရှိဘူး”လို့ အာဂျေးက စိတ်မကောင်းဖွယ် ဆက်လက်ပြောကြားပါတယ်။
ကိုရိုနာဗိုင်းရပ်စ်ရဲ့ ခြိမ်းခြောက်မှုကြောင့် အိန္ဒိယရဲ့တစ်ချိန်က ကြိတ်ကြိတ် တိုး စည်ကားခဲ့တဲ့ လမ်းတွေဟာဆိုရင် အခုတော့ အရင်ကလောက်စည်ကား မှုမရှိတော့ဘဲ ထီးတည်းကြီးဖြစ်နေပါပြီ။ စားသောက်တန်းတွေနဲ့စည်ကား လေ့ရှိတဲ့ မွမ်ဘိုင်းမှသည် အနောက်ဘက်မြို့တော်ဖြစ်တဲ့ အာမီတာဘတ်အထိလမ်းတစ်လျှောက်ဟာလည်း အခုတော့ ငြိမ်သက်တိတ်ဆိတ်လို့နေခဲ့ပါပြီ။
ကမ္ဘာပေါ်မှာ အစည်ကားဆုံးနေရာတစ်ခုဖြစ်တဲ့ အိန္ဒိယနိုင်ငံဟာ အခုတော့ လည်း ငှက်သံတွေကိုတောင် ကြားနေရပြီဖြစ်ပါတယ်။ ဘတ်စ်ကားတွေရဲ့ ဟွန်းသံတွေ၊ လန်ချားလှည်းတွေရဲ့ အဆက်မပြတ်အချက်ပေးသံတွေ၊ လူသူလေးပါးကြက်ပျံမကျစည်ကားတဲ့ နေရာတွေဟာ အခုလိုအချိန်မှာ ခြောက်ကပ်တိတ်ဆိတ်သွားခဲ့ပြီဖြစ်ပါတယ်။
အောင်မြင်စွာတွန်းလှန်နိုင်မယ်
မြို့တွေထဲမှာတောင် မကပါဘူး။ မြို့ပြင်တွေမှာတောင် ၂၁ ရက်ကြာ ကန့်သတ်မှုတွေဟာ သက်ရောက်မှုကြီးကြီးမားမားရှိနေပါတယ်။ အချို့ ရွာလေးတွေမှာဆိုရင်လည်း ဝါးနဲ့ပြုလုပ်ထားတဲ့ အတားအဆီးတွေနဲ့တောင် လူဝင်လူထွက်တွေမပြုလုပ်ဖို့၊ ကိုယ့်အိမ်ထဲမှာကိုယ်နေဖို့ ဆော်ဩထား ကြပါတယ်။
လတ်တလောမှာ အိန္ဒိယနိုင်ငံရဲ့ အခြေအနေဟာ မချင့်မရဲဖြစ်နေ သော်လည်း ဝန်ကြီးချုပ် မိုဒီရဲ့ လှုပ်ရှားဆောင်ရွက်မှုကိုတော့ ထောက်ခံနေ ကြပါတယ်။ အခုလိုမျိုး မိုဒီရဲ့ ကိုရိုနာဗိုင်းရပ်စ်အန္တရာယ်ကိုကာကွယ်ဖို့ အသွားအလာကန့်သတ်လိုက်ခြင်းဟာလည်း အိန္ဒိယနိုင်ငံကို ဥရောပနိုင်ငံ တွေနဲ့ အမေရိကန်နိုင်ငံရဲ့ တချို့အစိတ်အပိုင်းများလို တစ်ပြေးညီဖြစ်စေတဲ့ဆောင်ရွက်ချက်လည်း ဖြစ်ပါတယ်။
အသွားအလာကန့်သတ်ခြင်းဟာ ကိုရိုနာဗိုင်းရပ်စ်ကူးစက်ပျံ့နှံ့မှုကို စောင့်ကြည့်ထိန်းချုပ်နိုင်မယ့် နည်းလမ်းပဲဖြစ်တယ်လို့ လက်ခ်နောင်းမြို့က အငြိမ်းစားရှေ့နေတစ်ဦးဖြစ်သူ ဒိုင်ရန်တရာကူမားက ပြောပါတယ်။ ဘယ်လိုပဲဖြစ်ဖြစ် မိမိတို့အနေနဲ့ ဝန်ကြီးချုပ် မိုဒီရဲ့ ဆောင်ရွက်ချက်ကို အကောင်းဆုံး ပံ့ပိုးလိုက်ပါလုပ်ဆောင်ရမှာပဲ ဖြစ်ပါတယ်။ ထို့အတူပဲ ဈေးကွက်မှာ ကုန်ပစ္စည်းပြတ်လပ်မှုမရှိအောင်လည်း သက်ဆိုင်ရာအဖွဲ့ အစည်းတွေ တစ်ခုနဲ့တစ်ခုပူးပေါင်းပြီး အကောင်အထည်ဖော်ဆောင်ရွက်ရမှာပဲဖြစ်ပါတယ်။ သို့မှသာ ဝယ်လိုအားနဲ့ ရောင်းလိုအားကို ဟန်ချက်ညီ ထိန်းကြောင်းနိုင်ပြီး ကိုရိုနာဗိုင်းရပ်စ်အန္တရာယ်ကို အောင်မြင်စွာ တွန်းလှန် နိုင်မှာပဲ ဖြစ်ပါတယ်။
အေအက်ဖ်ပီ
