ဧပြီ ၃၀
ဘရာဇီးနိုင်ငံတွင် ၂၀၂၄ ခုနှစ်တွင် သွေးလွန်တုပ်ကွေးရောဂါဖြစ်ပွားသူလေးသန်းကျော်ဖြင့် စံချိန်တင်ခဲ့ကြောင်း ကျန်းမာရေးဝန်ကြီးဌာနက ယမန်နေ့ကပြောကြားသည်။ ယခုနှစ်ပထမ ၁၆ ပတ်အတွင်း သွေးလွန်တုပ်ကွေး ရောဂါဖြစ်ပွားသူဦးရေ ၄၁၂၇၅၇၁ ကို တွေ့ရှိခဲ့ကြောင်း ထိုဝန်ကြီးဌာန၏ စာရင်းအင်းဖော်ပြချက်အရ သိရသည်။ လွန်ခဲ့သောနှစ် အလားတူကာလက သွေးလွန်တုပ်ကွေးရောဂါဖြစ်ပွားသူ ၉၀၂၁၇၄ ဦးရှိပြီး ၂၀၂၃ ခုနှစ် သွေးလွန်တုပ်ကွေးရောဂါဖြစ်ပွားသူပေါင်း ၁ ဒသမ ၆၅၈ သန်းရှိကြောင်းဖော်ပြထားသည်။ ဇန်နဝါရီလနောက်ပိုင်း သွေးလွန်တုပ်ကွေးရောဂါဖြစ်ပွားမှုကြောင့် ၁၉၃၇ ဦး သေဆုံးပြီး စုံစမ်းစစ်ဆေးမှုလုပ်ဆောင်နေစဉ်အတွင်း သွေးလွန်တုပ်ကွေးရောဂါဖြင့်သေဆုံးသည်ဟု သံသယရှိသူ ၂၃၄၅ ဦး ရှိကြောင်း ထိုဝန်ကြီးဌာနကပြောကြားသည်။ လူဦးရေ ၁၃ သန်းနီးပါးနေထိုင်သော အကြီးဆုံးမြို့ဖြစ်သည့်ဆောပေါ်လိုမြို့ရှိ ရပ်ကွက်တိုင်းတွင် သွေးလွန်တုပ်ကွေးရောဂါများ ဖြစ်ပွားလာသည်။
ကိုးကား-ဆင်ဟွာ
ဘာသာပြန်-မြင့်မြင့်ချို