ဆိပ်ဖြူ ၂၇ မေ
မကွေးတိုင်းဒေသကြီး ဆိပ်ဖြူမြို့နယ်၌ ယနေ့ ညနေပိုင်းက လေပြင်းတိုက်ခတ်မှုကြောင့် မြင်က၀ကျေးရွာအုပ်စု အောက်ဆိပ်ကျေးရွာတွင် လူနေအိမ်တစ်လုံးပေါ် သစ်ပင်ပိခြင်းနှင့် ကိုးတောင့်ကျေးရွာတွင် ထန်းပင်လဲကျ၍ လျှပ်စစ်ဓာတ်တိုင်နှစ်တိုင် ကျိုးကျပျက်ဆီးမှုများရှိခဲ့ကြောင်း သိရသည်။
လေပြင်းတိုက်ခတ်မှုကြောင့် မြင်က၀ကျေးရွာအုပ်စု၊ အောက်ဆိပ်ကျေးရွာမှ ဦးနိုင်ဝင်း၏ နေအိမ်ပေါ်သို့ လုံးပတ် ၅ ပေ၊ အမြင့် ၁၈ ပေရှိ ဇောင်ချမ်းပင် လဲကျခဲ့သဖြင့် မြို့နယ်မီးသတ်တပ်ဖွဲ့ဝင်များက ကူညီဆောင်ရွက်ပေးခဲ့သည်။
အလားတူ ကိုးတောင့်ကျေးရွာတွင် ထန်းပင်လဲကျ၍ ကျေးရွာအတွင်း (၄၀၀) ဗို့အားလိုင်း လျှပ်စစ်ဓာတ်တိုင် နှစ်တိုင် ကျိုးကျခဲ့သဖြင့် မြို့နယ်လျှပ်စစ်ဦးစီးမှူး ဦးစန်းဦးနှင့် လျှပ်စစ်ဝန်ထမ်းများက လျှပ်စစ်အန္တရာယ် ကင်းရှင်းရေး လုပ်ငန်းများ ဆောင်ရွက်ပေးခဲ့ကြောင်း သိရသည်။
ကိုဇွဲ (အညာမြေ)
