ရန်ကုန် နိုဝင်ဘာ ၂၃
မြန်မာ့လက်ရွေးစင်အသင်းသည် ၂၀၂၀ အာဆီယံဆူဇူကီးဖလားပြိုင်ပွဲ ကျင်းပမည့် စင်ကာပူနိုင်ငံသို့ ငါးရက်ကြိုတင် သွားရောက်မည်ဖြစ်သည်။
နိုဝင်ဘာ ၃၀ ရက်တွင် ရောက်ရှိမည်
မြန်မာ့လက်ရွေးစင်အသင်းသည် လက်ရှိတွင် တူရကီနိုင်ငံ၌ လေ့ကျင့်မှုပြုလုပ်နေပြီး နိုဝင်ဘာ ၃၀ ရက်တွင် စင်ကာပူနိုင်ငံသို့ ရောက်ရှိမည်ဖြစ်သည်။
မြန်မာ့လက်ရွေးစင်အသင်းသည် အုပ်စု ပထမပွဲကို ဒီဇင်ဘာ ၅ ရက်တွင် ကစားရမည်ဖြစ်ကာ ယင်းပွဲမတိုင်မီ ငါးရက် ကြိုတင်သွားရောက်ခြင်းဖြစ်ပြီး ဒီဇင်ဘာ ၁ ရက်တွင် စင်ကာပူနိုင်ငံ၌ လေ့ကျင့်မှု စတင်ပြုလုပ်ဖွယ်ရှိနေသည်။ မြန်မာ့လက်ရွေးစင်အသင်းသည် တူရကီနိုင်ငံတွင် ခြေစမ်းပွဲများကစားနေပြီး လက်ရှိအချိန်ထိ သုံးပွဲကစားထားပြီးဖြစ်ကာ နှစ်ပွဲနိုင် တစ်ပွဲရှုံးနိမ့်ထားသည်။ မြန်မာ့ လက်ရွေးစင်အသင်းသည် နိုဝင်ဘာ ၂၅ ရက်တွင် အင်ဒိုနီးရှားလက်ရွေးစင်အသင်း နှင့် ထပ်မံခြေစမ်းမည်ဖြစ်သည်။
မြန်မာအသင်းသည် ဆူဇူကီးဖလားပြိုင်ပွဲတွင် ထိုင်း၊ ဖိလစ်ပိုင်၊ စင်ကာပူ၊ တီမောအသင်းတို့နှင့် တစ်အုပ်စုတည်း ကျရောက်နေပြီး အုပ်စုပထမပွဲအဖြစ် ဒီဇင်ဘာ ၅ ရက်တွင် အိမ်ရှင် စင်ကာပူ အသင်းနှင့် စတင်ကစားရမည်ဖြစ်သည်။
သတင်း-ကိုညီလေး၊ ဓာတ်ပုံ-MFF
