COVID-19 ရောဂါ ဖြစ်ပွားကူးစက်ပျံ့နှံ့မှု မရှိစေရန် ရခိုင်ပြည်နယ်သို့ (၁၀-၈-၂၀၂၀) ရက်နေ့ နောက်ပိုင်းခရီးသွားလာမှုများရှိခဲ့ပါက မဖြစ်မနေသတင်းပေးပို့ကြပါရန် သတိပေးနှိုးဆော်ချက်

(၂၀၂၀ ပြည့်နှစ်၊ သြဂုတ်လ ၂၈ ရက်)
 

(လက်ကိုင်စပီကာဖြင့် ပြောကြားရန် အခြေခံအချက်များ)


(၁) ရခိုင်ပြည်နယ်အတွင်း ‌ဒေသတွင်းကူးစက်မှုများအဖြစ် လတ်တလောတွေ့ရှိနေရသည့် (COVID-19) ရောဂါ သည် အလွန်ကူးစက်မှုမြန်ဆန်သည်ကို တွေ့ရှိရပြီး ကူးစက်ခံရသူများ၏ (၇၉) ရာခိုင်နှုန်း (လူ ၁၀၀ လျှင် ၇၉ ဦး) ၌ ရောဂါလက္ခဏာ တစ်စုံတစ်ရာပြသခြင်းမရှိပါ။ ပိုးရှိသူများသည် အမြင်အားဖြင့် နေကောင်းကျန်းမာ စွာရှိသော်လည်း ထိတွေ့မှုရှိသူများကို လျင်မြန်စွာ ဆက်လက်ကူးစက်နိုင်သည်ကို တွေ့ရပါသည်။

 

(၂) (၁၀-၈-၂၀၂၀)ရက်နေ့ နောက်ပိုင်းရခိုင်ပြည်နယ်အတွင်းသို့ ခရီးသွားလာမှုရှိခဲ့ပါက သင်ကိုယ်တိုင် ရောဂါပိုး သယ်ဆောင်ဖြန့်ဖြူးသူ ဖြစ်နေနိုင်ပါသဖြင့် သင်ချစ်ခင်ရသော မိသားစုများနှင့် ပတ်ဝန်းကျင်ရှိ မိတ်ဆွေများထံ ဆက်လက်ရောဂါပြန့်ပွားမှု မရှိစေရန်အတွက် နီးစပ်ရာကျန်းမာရေးဌာနနှင့် အုပ်ချုပ်‌ရေးမှူးရုံးသို့ ချက်ချင်း သတင်းမှန်ပေးပို့ပါ။

 

(၃) ခရီးသွားလာခဲ့သူ သင်ကိုယ်တိုင်နှင့် သင်နှင့်ထိတွေ့ခဲ့သူများတွင် ဖျားနာခြင်း၊ ချောင်းဆိုးခြင်း၊ အသက်ရှူ ခက်ခဲခြင်း၊ ရုတ်တရက် အနံ့အရသာပျောက်ဆုံးခြင်း စသည့် ရောဂါသံသယလက္ခဏာများ ခံစားရပါက နီးစပ်ရာ ကျန်းမာရေးဌာနနှင့် အုပ်ချုပ်‌ရေးမှူးရုံးသို့ ချက်ချင်း သတင်းမှန်ပေးပို့ပါ၊ စောစီးစွာ ဆေးကုသမှု ခံယူပါ။

(၄) တစ်နိုင်ငံလုံးရှိ ပြည်သူအားလုံးအနေဖြင့် (COVID-19) ရောဂါသည် ဒေသအများအပြားသို့ အရှိန်အဟုန်ဖြင့် ကူးစက်ပြန့်ပွားလာနိုင်မှုကို ထိရောက်စွာကာကွယ်ရန် အောက်ပါအချက်များကို အထူးဂရုပြု၍ အတိအကျ လိုက်နာပေးပါ -

 

• မိမိအိမ်မှာသာ နေပါ၊

• မဖြစ်မနေ အပြင်ထွက်ရလျှင် ပါးစပ်နှင့်နှာခေါင်းစည်း (Mask) ကို စနစ်တကျ မပျက်မကွက် တပ်ဆင်ပါ၊

• တစ်ဦးနှင့်တစ်ဦး (၆) ပေ အကွာ ခပ်ခွာခွာ နေထိုင်ပြောဆိုပါ၊

• လက်တွင် ကပ်ပါလာနိုင်သော ဗိုင်းရပ်စ်ပိုးကို ပျက်စီးစေရန်အတွက် လက်ကို ဆပ်ပြာနှင့်ရေ အသုံးပြု၍ အနည်းဆုံးစက္ကန့် (၂၀) ကြာအောင် မကြာခဏ စနစ်တကျ ဆေးကြောပါ၊

• ရောဂါပိုးရှိသူအတည်ပြုလူနာနှင့် ဆက်စပ်ထိတွေ့မှုရှိသူများကို ရှာဖွေဖော်ထုတ်ခြင်းလုပ်ငန်းစဉ်များ တွင် အပြည့်အဝ ပူးပေါင်းပါဝင်ပေးပါ၊

• အသွားအလာကန့်သတ်ခြင်း (Quarantine) လုပ်ငန်းများကို သတင်းပို့လာသူများ၏ ခရီးသွားရာဇဝင် အပေါ် မူတည်၍ သတ်မှတ်ကာလအတွင်းသာ နေထိုင်စေရေး စီစဉ်ထားပါသဖြင့် ပူးပေါင်းကူညီပေးပါ၊ ရခိုင်ပြည်နယ်အတွင်းသို့ ခရီးသွားခဲ့ခြင်းရှိသူများအားလည်း သတင်းပို့ရန် တိုက်တွန်းပေးပါ၊

• ယခု နှိုးဆော်ချက်ပါ အချက်များကို သင့်မိသားစုဝင်များ၊ မိတ်ဆွေများထံ ဆက်လက်ဖြန့်ဝေပေးပါ။


ကျန်းမာရေးနှင့်အားကစားဝန်ကြီးဌာန