ပိုလန်တင်းနစ်မယ် ဆွီယာတက်ခ်သည် စတုဂတ်အိုးပင်းတင်းနစ် ပြိုင်ပွဲတွင် ဘယ်လာရုစ် တင်းနစ် မယ် ဆာဘယ်လင်ကာကို အနိုင်ရရှိပြီး လေးကြိမ်ဆက် ဖလားဆွတ်ခူးနိုင်ခဲ့ကြောင်း သိရသည်။ အဆိုပါ တင်းနစ်မယ်သည် ယခု ဖလားမဆွတ်ခူးမီ ဒိုဟာဖလား၊ အင်ဒီးယန်းဝဲလ်ဖလားနှင့် မီယာမီ ဖလားတို့ကို ဆွတ်ခူးထားသည်။
ကမ္ဘာ့နံပါတ်တစ် ပိုလန်တင်းနစ်မယ် ဆွီယာတက်ခ်သည် ပြိုင်ဘက် ဆာဘယ်လင်ကာကို ၆-၂၊၆-၂ ဖြင့် အနိုင်ရရှိကာ ဖလားဆွတ်ခူးနိုင်ခဲ့ခြင်းဖြစ်သည်။ ဗိုလ်လုပွဲတွင် ဆာဘယ်လင်ကာကို ၁ နာရီနှင့် ၂၅ မိနစ်ကြာ ယှဉ်ပြိုင်ကစားခဲ့ရသော ဆွီယာတက်ခ်သည် လာမည့်လတွင် ပြင်သစ်အိုးပင်းတင်းနစ်ပြိုင်ပွဲကို ဆက်လက် ယှဉ်ပြိုင်ကစားမည် ဖြစ်သည်။
ဆွီယာတက်ခ်သည် စတုဂတ် အိုးပင်းတင်းနစ်ပြိုင်ပွဲ ဆီမီးဖိုင်နယ်တွင် ရုရှားတင်းနစ်မယ် ဆမ်ဆွန်နိုဗာကို ၆-၇(၄-၇)၊ ၆-၄၊ ၇-၅ ဖြင့် အနိုင်ရရှိကာ ဗိုလ်လုပွဲသို့ တက်လှမ်းလာနိုင်ခဲ့သည်။ ပြိုင်ဘက် ဆာဘယ်လင်ကာက ဆီမီးဖိုင်နယ်အဆင့်တွင် စပိန်တင်းနစ်မယ် ဘာဒိုဆာကို ၇-၆ (၇-၅)၊ ၆-၄ ဖြင့် အနိုင်ရရှိကာ ဗိုလ်လုပွဲသို့ တက်လှမ်းလာနိုင်ခြင်း ဖြစ်သည်။
အောင်ဇော်
