မော်လမြိုင် ၂၅ ဩဂုတ်
ဒုတိယအကြိမ် မွန်ပြည်နယ်လွှတ်တော် (၁၇)ကြိမ်မြောက် ပုံမှန်အစည်းအဝေး (ဒုတိယနေ့)ကို ယနေ့ နံနက် ၁၀ နာရီက မော်လမြိုင် မွန်ပြည်နယ်လွှတ်တော်ရုံး အစည်းအဝေး ခန်းမ၌ကျင်းပသည်။
အစည်းအဝေးတွင် ပြည်နယ်လွှတ်တော်ကိုယ်စားလှယ်(၅)ဦးက ကြယ်ပွင့်ပြမေးခွန်း(၅)ခု မေးမြန်းရာ သက်ဆိုင်ရာ မွန်ပြည်နယ်အစိုးရအဖွဲ့ဝန်ကြီးများက ပြန်လည်ဖြေကြားသည်။
ဆက်လက်၍ မွန်ပြည်နယ်အစိုးရအဖွဲ့၏ (၂၀၁၉-၂၀၂၀) ဘဏ္ဍာရေးနှစ်၊ အောက်တိုဘာလမှ မတ်လအထိ (၆)လပတ်အစီရင်ခံစာကို အမည်စာရင်းတင်သွင်းထားသော ပြည်နယ်လွှတ်တော် ကိုယ်စားလှယ် ဦးအောင်ကျော်သူ၊ ပြည်နယ်လွှတ်တော် ကိုယ်စားလှယ် ဒေါ်ကြည်ကြည်မြ၊ ပြည်နယ်လွှတ်တော် ကိုယ်စားလှယ် ဒေါက်တာဦးအောင်နိုင်ဦး တို့က ထောက်ခံဆွေးနွေးခြင်းအပေါ် စီမံကိန်းနှင့်ဘဏ္ဍာရေးဝန်ကြီး ဦးဝဏ္ဏကျော် ကပြန်လည်ရှင်းလင်းပြောကြားပြီး ပြည်နယ်လွှတ်တော်ဥက္ကဌ က လွှတ်တော်တွင်မှတ်တမ်းတင် ထားရှိမည်ဖြစ်ကြောင်း ကြေညာခဲ့သည်။
ထို့နောက် မွန်ပြည်နယ်လွှတ်တော် တိုင်ကြားစာနှင့် အသနားခံစာ၊ တင်ပြစာနှင့်အထွေထွေကိစ္စ ရပ်များလေ့လာသုံးသပ်ရေးကော်မတီ၏ လုပ်ငန်းဆောင်ရွက်ချက်အစီရင်ခံစာကို ၎င်းကော်မတီ ဥက္ကဌ ဦးအောင်ကျော်သူ က ဆွေးနွေးတင်ပြခြင်း၊ မွန်ပြည်နယ်လွှတ်တော် တိုင်းရင်းသား လူမျိုးများအရေး ဆိုင်ရာကော်မတီ၏ လုပ်ငန်းဆောင်ရွက်ချက် အစီရင်ခံစာကို ၎င်းကော်မတီ ဥက္ကဌ ဦးဇော်ဇော်ထူး က ဆွေးနွေးတင်ပြခြင်းတို့ကို မွန်ပြည်နယ်လွှတ်တော် ဥက္ကဌ က အစီရင်ခံစာနှင့်စပ်လျဉ်း၍ ဆွေးနွေးလို သည့် ပြည်နယ်လွှတ်တော် ကိုယ်စားလှယ်များက ပြည်နယ်လွှတ်တော်ရုံး ညွှန်ကြားရေးမှူးထံ အမည်စာရင်း တင်သွင်းနိုင်ကြောင်း ကြေညာသည်။ ထို့နောက် မွန်ပြည်နယ်လွှတ်တော်(၁၇) ကြိမ်မြောက် ပုံမှန်အစည်းအဝေးကို ရပ်နားခဲ့ပြီး သြဂုတ်(၂၆)ရက် နံနက်(၁၀)နာရီတွင် ဆက်လက် ကျင်းပသွားမည် ဖြစ်ကြောင်းသိရသည်။
ပြည်နယ်(ပြန်/ဆက်)
