ပွင့်ဖြူ စက်တင်ဘာ ၂၈
မကွေးတိုင်းဒေသကြီး၊ ပွင့်ဖြူမြို့နယ်ရှိ ကြီးအုံကြီးဝတမံ ရေပိုလွှဲမှ ရေကျော်ကျလျက်ရှိရာ စက်တင်ဘာ ၂၈ ရက် မွန်းတည့် ၁၂ နာရီ တိုင်းထွာချက်အရ တမံရေပိုလွှဲမှ ၈ ဒသမ ၁ ပေခန့် ဆက်လက် ရေကျော်ကျလျက် ရှိနေကြောင်း တမံတာဝန်ခံ (AE) ဦးစိုးတင့်ထံမှ သိရသည်။
ကြီးအုံကြီးဝတမံသည် စက်တင်ဘာ ၂၃ ရက်မှ၂၇ ရက် ညပိုင်းအထိ မိုးသည်းထန်စွာ ရွာသွန်းမှုကြောင့် တမံအတွင်း မိုးရေဝင်ရောက်မှုများ ရှိခဲ့ပြီး စက်တင်ဘာ ၂၈ ရက် နံနက် ၆ နာရီ တိုင်းထွာရာတွင် တမံရေပြည့်မှတ်ဖြစ်သည့် ပေ ၃၄၀ အထက် ၈ ဒသမ ၄ ပေခန့် ရေကျော်ကျမှုရှိခဲ့ရာမှ မွန်းတည့် ၁၂ နာရီ ထပ်မံတိုင်းထွာရာတွင် တမံရေပိုလွှဲမှ ၈ ဒသမ ၁ ပေခန့်သာ ရေကျော်ကျမှုရှိ၍ သုံးလက်မခန့် ရေကျော်ကျမှု ကျဆင်းလာခဲ့ကြောင်း သိရသည်။
တမံရေပိုလွှဲမှ ရေကျော်မှုအခြေအနေအား တမံအောက်ဘက်ရှိ ဒေသခံပြည်သူများ ကြိုတင်သိရှိနိုင်ရန် အစိမ်းရောင်အလံများ စိုက်ထူ၍ အသိပေးနှိုးဆော်ခြင်းများ ဆောင်ရွက်ထားရှိကြောင်းနှင့် တမံရေပိုလွှဲမှ ရေကျော်ကျမှုမှာ စိုးရိမ်ဖွယ် အခြေအနေမရှိကြောင်း တမံတာဝန်ခံ (AE) ဦးစိုးတင့်က ပြောပြသည်။
ရဲဝင်းနိုင်(ညောင်ဦး)
