ကျိုင်းတုံ ဇူလိုင် ၁၂
ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်တွင် ကိုဗစ်-၁၉ ရောဂါ အတည်ပြုလူနာများ ထပ်မံတွေ့ရှိနေခြင်းကြောင့် ကျိုင်းတုံမြို့မဈေးကြီအပါအဝင် စျေးများအား ဇူလိုင် ၁၃ ရက်မှ ၂၂ ရက်အထိ ယာယီပိတ်သွားမည်ဖြစ်ကြောင်း မြို့နယ်စည်ပင်သာယာရေးဌာနမှ သိရသည်။
ထိုသို့ မြို့မဈေးကြီး ယာယီပိတ်ရခြင်းမှာ ကျိုင်းတုံမြို့နယ်အတွင်း ကိုဗစ်-၁၉ ရောဂါ ကာကွယ်ထိန်းချုပ်ရေးလုပ်ငန်းများ ပိုမိုထိရောက်စွာ ဆောင်ရွက်နိုင်ရေးအတွက် ကျိုင်းတုံခရိုင်/မြို့နယ် ကိုဗစ်-၁၉ ရောဂါ ကာကွယ်ကုသရေးလုပ်ငန်းကော်မတီ၊ စည်ပင်သာယာရေးဌာန၊ ဈေးအကျိုးတော်ဆောင်အဖွဲ့များ၏ စီစဉ်မှုအရ ကျိုင်းတုံမြို့မဈေးကြီး၊ နောင်ကွမ်ဈေး၊ ယန်းခမ်းဈေးတို့အား ဇူလိုင် ၁၃ ရက်မှ ၂၂ ရက်အထိ ယာယီပိတ်သွားမည်ဖြစ်သည်။
အဆိုပါ ကျိုင်းတုံမြို့မဈေးကြီး ပိတ်ထားစဉ် ဈေးအနောက်ဘက်ရှိ ကုန်စိမ်းသည်များ၊ ပျံကျသည်များ၊ ဈေးအတွင်း သား/ငါး ဆိုင်များ၊ ဆေးဝါးနှင့် စားသောက်ကုန် ရောင်းချသည့်ဆိုင်များအား ကျန်းမာရေးနှင့် အားကစားဝန်ကြီးဌာနမှ ညွှန်ကြားထားသည့် လမ်းညွှန်ချက်များနှင့်အညီ ဖွင့်လှစ်ရောင်းချခွင့် ပြုမည်ဖြစ်ကြောင်း သိရသည်။
အောင်ဇင်မြင့်(ပြန်/ဆက်)
