ပြင်ဦးလွင် ၁၆ ဧပြီ
မန္တလေးတိုင်းဒေသကြီး၊ ပြင်ဦးလွင်မြို့နယ်၌ ကိုရိုနာဗိုင်းရပ်စ်ရောဂါ ကာကွယ်ကုသရေးလုပ်ငန်းများတွင် အသုံးပြုနိုင်ရေး အလှူငွေနှင့် စားသုံးကုန်ပစ္စည်းများကို ယနေ့နံနက် ၈ နာရီက ရောဂါကာကွယ် ကုသ၊ ထိန်းချုပ်ရေးကော်မတီရုံးခန်းမ၌ ကျင်းပပြုလုပ်ရာ တာဝန်ရှိသူများနှင့် အလှူရှင်များ တက်ရောက်ကြသည်။
ရှေးဦးစွာ ကိုဗစ် - ၁၉ ရောဂါ ကြိုတင်ကာကွယ်ထိန်းချုပ်ကုသရေးကော်မတီ ဥက္ကဋ္ဌ မြို့နယ်အုပ်ချုပ်ရေးမှူး မှ ကိုရိုနာဗိုင်းရပ်စ်ရောဂါ ကာကွယ်ကုသရေး လုပ်ငန်းများတွင် အသုံးပြုနိုင်ရေး အလှူငွေနှင့် စားသုံးကုန်ပစ္စည်းများ လှူဒါန်းပွဲ ကျင်းပရခြင်းအကြောင်းအား အသေးစိတ် ရှင်းလင်းပြောကြားခဲ့ပြီး အလှူရှင်များဖြစ်သည့် ဦးဇော်မင်းဦး + ဒေါ်မီမီထွေး ( ဇော်မင်းဦးရွှေဆိုင်) မိသားစုမှ ဆန် အိတ် ၁၀ဝ၊ မက်မန်းနေကြာလုပ်ငန်းရှင်များမှ ဆီ ၁၀ ပိဿာဝင် ၅၃ ပုံးနှင့် ဆား ၂၅ ပိဿာဝင် ၂၁ အိတ်၊ မချို+ မီးမီး (ဆီဆိုင်) မိသားစုမှ ကြက်သွန်နီ အချိန် ၁၀ဝဝ တို့အား တာဝန်ရှိသူများထံ ပေးအပ်လှူဒါန်းကြပြီး ကိုရိုနာဗိုင်းရပ်စ်ရောဂါ ကာကွယ်ကုသရေး လုပ်ငန်းများတွင် အသုံးပြုနိုင်ရေး အလှူငွေနှင့် လုပ်ငန်းသုံးပစ္စည်းများအတွက် ထပ်မံလှူဒါန်းလိုပါက ရောဂါကာကွယ်ထိန်းချုပ်ရေး မြို့နယ်ကော်မတီ ရုံးခန်းသို့ ဆက်သွယ်လှူဒါန်းနိုင်ကြောင်း သိရသည်။
ဇော်မျိုးထိုက်(ပြန်/ဆက်)
