ကိုယ်လက်လှုပ်ရှား လေ့ကျင့်ခန်း လုပ်ရမည့်အတိုင်းအတာ

နေပြည်တော် ၅ မေ

ကလေးနှင့် လူငယ်များ

• ပြင်းထန်မှုအတော်အသင့်အတင့်ရှိသည့် ကိုယ်လက်လှုပ်ရှား လေ့ကျင့်ခန်း (သို့) ပြင်းထန်သော ကိုယ်လက်လှုပ်ရှားလေ့ကျင့်ခန်းကိုနေ့စဉ် (၆၀)မိနစ်ခန့် ပြုလုပ်သင့်ပါသည်။

• ပြင်းထန်သော ကိုယ်လက်လှုပ်ရှား လေ့ကျင့်ခန်းကို တစ်ပတ်လျှင် (၃)ရက် ခန့်ပါသင့်ပါသည်။

• တစ်နေ့ (၆၀)မိနစ်ပြုလုပ်သည့်အထဲတွင် ကြွက်သားအင်အား သန်မာမှုအတွက် ကြွက်သားအုပ်စုများစွာ ပါဝင်သော လေ့ကျင့်ခန်းနှင့် အရိုးသန်မာစေသော လေ့ကျင့်ခန်း ဥပမာ- ကြိုးခုန်ခြင်းကို အနည်းဆုံး တစ်ပတ်လျှင်(၃)ရက် ပါဝင်သင့်ပါသည်။

လူကြီး

• ပြင်းထန်မှု အတော်အသင့်ရှိသည့် ကိုယ်လက်လှုပ်ရှား လေ့ကျင့်ခန်း (ဥပမာ - တစ်နာရီ ၃မိုင်နှုန်း လမ်းလျှောက်ခြင်း)ကို တစ်ပတ်လျှင် ၁၅၀ မိနစ်ခန့်ပြုလုပ်ပါ။

• ကြွက်သားအင်အားသန်မာမှုအတွက် ကြွက်သား အုပ်စုများစွာပါဝင်သော လေ့ကျင့်ခန်းကို တစ်ပတ်လျှင် (၂)ရက်နှင့်အထက် ပြုလုပ်သင့်ပါသည်။

• ပြင်းထန်သော ကိုယ်လက်လှုပ်ရှား လေ့ကျင့်ခန်း (ဥပမာ- ရွရွပြေးခြင်း၊ တစ်နာရီ ၅မိုင်နှုန်းနှင့် အထက်ပြေးခြင်း)ကို တစ်ပတ်လျှင် ၇၅မိနစ်ခန့်ပြုလုပ်ပါ။

• ပြင်းထန်မှုအတော်အသင့်ရှိသည့် ကိုယ်လက်လှုပ်ရှား လေ့ကျင့်ခန်းကို တစ်နေ့ (၃၀)မိနစ် တစ်ပတ်လျှင် (၃)ရက် ပြုလုပ်နိုင်ပါသည်။

• ပြင်းထန်သော ကိုယ်လက်လှုပ်ရှား လေ့ကျင့်ခန်းကို တစ်နေ့ (၁၅)မိနစ် တစ်ပတ်လျှင် (၂)ရက် ပြုလုပ်နိုင်ပါသည်။

အသက် (၆၅)နှစ်နှင့် အထက် လူကြီးများ

• လူကြီး အတိုင်းအတာအတိုင်း ဆောင်ရွက်နိုင်ပါသည်။

• သို့သော် ကိုယ်လက်လှုပ်ရှား အလေ့အကျင့် မရှိသူများနှင့် ပိုမိုအိုမင်းလာပါက ချင့်ချိန်ဆောင်ရွက်ရပါမည်။

• အသက်(၅၀)ကျော်လာပါက ဆရာဝန်နှင့် ပြသတိုင်ပင်ပြီး ဆောင်ရွက်ပါက ပိုကောင်းပါသည်။

• ကိုယ်လက်လှုပ်ရှားလေ့ကျင့်ခန်းကို သွေးချိုဆီးချိုရောဂါ၊ နှလုံးရောဂါရှိသူများပင်လျင် ဆရာဝန်နှင့် တိုင်ပင်ပြသဆောင်ရွက်နိုင်ပါသည်။

ကိုယ်ဝန်ဆောင်မိခင်

ကိုယ်ဝန်ဆောင်စဉ်အတွင်းနှင့်မွေးဖွားပြီးချိန်တွင်

• ပြင်းထန်မှုတော်အသင့်ရှိသည့် ကိုယ်လက်လှုပ်ရှားလေ့ကျင့်ခန်း(ဥပမာ- တစ်နာရီ၃မိုင်နှုန်း လမ်းလျှောက်ခြင်း) ကို တစ်ပတ်လျှင် ၁၅၀ မိနစ်ခန့် ဆောင်ရွက်သင့်ပါသည်။

• လေ့ကျင့်ခန်း ဆောင်ရွက်ခြင်းကို ပုံမှန်ဆောင်ရွက်သင့်ပါသည်။

• ပြင်းထန်သော ကိုယ်လက်လှုပ်ရှား လေ့ကျင့်ခန်း ဆောင်ရွက်နေကျဖြစ်ပါက ဆက်လက်ဆောင်ရွက်နိုင်ပါသည်။ သို့သော် ဆရာဝန်နှင့် တိုင်ပင်ဆောင်ရွက်သင့်ပါသည်။

ကိုယ်ဝန်ဆောင်စဉ် ကာလတွင်

• ကိုယ်လက်လှုပ်ရှားလေ့ကျင့်ခန်း စတင်ပြုလုပ်မည် ဆိုပါက ပြင်းထန်မှု နည်းနည်းနှင့်စ၍ ဖြေးဖြေးချင်းတိုး၍သာ ဆောင်ရွက်သင့်ပါသည်။

• ကိုယ်ဝန်ဆောင်စဉ်ကာလတွင် ပက်လက် လဲလျောင်း ဆောင်ရွက်ရသော၊ ချော်လဲနိုင်သော၊ ဝမ်းဗိုက်ထိခိုက်နိုင်သော လေ့ကျင့်ခန်းများ ရှောင်ကြဉ်သင့်ပါသည်။

ကိုယ်ဝန်ဆောင်စဉ်ကာလတွင် ကိုယ်လက်လှုပ်ရှား လေ့ကျင့်ခန်းများပြုလုပ်ခြင်းကြောင့် အချိန်မကျမီ ကလေး စောမွေးခြင်း၊ ပေါင်မပြည့်သော ကလေးမွေးခြင်း၊ ကိုယ်ဝန်ပျက်ကျခြင်း၊ ကလေးကြီးထွားမှု ထိခိုက်ခြင်း၊ မိခင်နို့ထွက်ပြောင်းလဲခြင်းတို့မဖြစ်ပါ။

လေ့ကျင့်ခန်းပြင်းထန်မှုကို ခန့်မှန်းခြင်း

သတိမူမိသောပင်ပန်းမှုနှုန်း

ပြင်းထန်မှုအတော်အသင့်

• အင်အားစိုက်ထုတ်လုပ်ကိုင်ရပြီး အသက်ရှူနှုန်းနှင့် နှလုံးခုန်နှုန်းမြန်စေနိုင်သော အတိုင်းအတာ

ပြင်းထန်

• အင်အားပိုမိုစိုက်ထုတ်လုပ်ကိုင်ရပြီး အသက်ရှူနှုန်း အလွန်မြန်ကာ ရင်(နှလုံး) တဒိန်းဒိန်း ခုန်စေနိုင်သော အတိုင်းအတာ

သတိပြုရန်အချက်များ

• ကိုယ်လက်လှုပ်ရှား လေ့ကျင့်ခန်း စတင်ပြုလုပ်မည်ဆိုပါက ပြင်းထန်မှု နည်းနည်းနှင့်စ၍ ဖြေးဖြေးချင်းတိုး၍သာ ဆောင်ရွက်သင့်ပါသည်။ (အထူးသဖြင့် မူလက ကိုယ်လက်လှုပ်ရှားမှု နည်းသူဖြစ်ပါက)

• ကြွက်သားအင်အားသန်မာမှုအတွက် လေ့ကျင့်ခန်းပြုလုပ်စဉ် အသက်အောင့်မထားပါနှင့်။ သွေးပေါင်ချိန် တက်စေနိုင်ပါသည်။

• ထိခိုက်မှုကာကွယ်သော အားကစားအထောက်အကူပစ္စည်းများ သုံးစွဲပါ။ (ဥပမာ - စက်ဘီးစီဦးထုပ်)

• ရေ များများသောက်ပေးပါ။

• ခါးကွေးဆန့်မှုပါဝင်သော လှုပ်ရှားမှုများအတွက် တင်ပါးနေရာမှ ကွေးဆန့်ပါ။ ခါးမှကွေးဆန့်ခြင်း မပြုလုပ်ပါနှင့်။

• ကိုယ်လက်လှုပ်ရှား လေ့ကျင့်ခန်း မစတင်မီ သွေးပူလေ့ကျင့်ခန်းနှင့် လေ့ကျင့်ခန်းအပြီး သွေးအေးလေ့ကျင့်ခန်းပြုလုပ်ပါ။

• ပြုလုပ်သော ကိုယ်လက်လှုပ်ရှား လေ့ကျင့်ခန်းသည် လေ့ကျင့်ခန်းသည် အလွန်မောပမ်းနွမ်းနယ်စေပြီး ခန္ဓာကိုယ်နာကျင်စေသည့် အတိုင်းအတာ မဖြစ်ရပါ။

အောက်ပါအခြေအနေများတွင် ဆရာဝန်နှင့်တိုင်ပင်ဆွေးနွေးပါ

ကိုယ်လက်လှုပ်ရှား လေ့ကျင့်ခန်းပြုလုပ်စဉ်ကာလတွင်

• ယခင်မရှိခဲ့သော ဝေဒနာ တစ်ခုခု ခံစားရခြင်း

• ခေါင်းမူးဝေခြင်း

• အသက်ရှူ မဝခြင်း၊ အသက်ရှူကြပ်ခြင်း

• ရင်ဘတ်အောင့်ခြင်း

• ကိုယ်အလေးချိန်ကျလာခြင်း

• ကိုယ်လက်ကိုက်ခဲဖျားနာခြင်း

• အဆစ်အမြစ်ယောင်ခြင်း

• ခြေဖဝါး၊ ခြေကျင်းဝတ်နာခြင်း

• အူကျရောဂါဖြစ်လာခြင်း

မူလကတည်းက နာတာရှည်ရောဂါ (နှလုံးရောဂါ)၊ သွေးချိုဆီးချိုရောဂါ၊ အဆစ်အမြစ်ရောင်ရောဂါရှိသူများ) သည် မိမိတို့နှင့် သင့်လျော်သော ပြုလုပ်ရမည့်လေ့ကျင့်ခန်း အမျိုးအစားနှင့် ပြင်းထန်မှု အတိုင်းအတာတို့ကို သက်ဆိုင်ရာဆရာဝန်နှင့် တိုင်ပင်ဆွေးနွေးပြီးမှ ဆောင်ရွက်သင့်ပါသည်။

• ပျော်ရွှင်ကျန်းမာသော ဘဝရရန် ခန္ဓာကိုယ်လှုပ်ရှားမှု မရှိခြင်းထက် ခန္ဓာကိုယ်လှုပ်ရှား ဆောင်ရွက်မှုမရှိခြင်းက ပေးစွမ်းနိုင်ပါသည်။ ခန္ဓာကိုယ်လှုပ်ရှားဆောင်ရွက်မှုများရှိခြင်းထက် ကိုယ်လက်လှုပ်ရှားလေ့ကျင့်ခန်းလုပ်ဆောင်ခြင်းက ပို၍ပေးစွမ်းနိုင်ပါသည်။

• ကိုယ်လက်လှုပ်ရှားလေ့ကျင့်ခန်းလုပ်ခြင်းသည် ပျော်ရွှင်ကျန်းမာသောဘဝ ရရှိနိုင်ရန် လူတိုင်းအတွက် ကောင်းမွန်စိတ်ချရသော နည်းလမ်းကောင်းဖြစ်ပါသည်။

• နှလုံးရောဂါ၊ သွေးချိုရောဂါ၊ အဆစ်အမြစ်ရောဂါရှိသူများပင် ကိုယ်လက်လှုပ်ရှား လေ့ကျင့်ခန်းပြုလုပ်ခြင်းဖြင့် ရောဂါကုသရာတွင် အထောက်အကူပေးပါသည်။

အကြံပြုချက်

• ကိုယ်လက်လှုပ်ရှား လေ့ကျင့်ခန်းကို ယနေ့မှစပြီး စတင်ပါ။

• ကိုယ်လက်လှုပ်ရှား လေ့ကျင့်ခန်းကို တစ်ပိုင်တစ်နိုင် ကြိုးစားဆောင်ရွက်ပါ။

ယခုဖော်ပြချက်အား ပြည်သူ့ကျန်းမာရေးဦးစီးဌာန၊ ကျန်းမာရေး အသိပညာ မြှင့်တင်ရေးဌာနနှင့် ကုလသမဂ္ဂကလေးများ ရန်ပုံငွေအဖွဲ့တို့ ပူးပေါင်းထုတ်ဝေသည့် ကျန်းမာရေးဆိုင်ရာ စံပြုအချက်အလက်များ စာအုပ်မှ ကူးယူဖော်ပြပါသည်။

MDN