ကန့်ဘလူ ၈ သြဂုတ်
စစ်ကိုင်းတိုင်းဒေသကြီး ကန့်ဘလူမြို့နယ်တွင် သြဂုတ် ၇ ရက် မွန်းလွဲ ၁၂ နာရီခွဲက ကန့်ဘလူမြို့နယ် မီးသတ်စခန်း၏ တောင်ဘက် ၉ မိုင်ကျော်အကွာ ထန်းကုန်းကျေးရွာ၏ အနောက်ဘက် ကင်းတပ်ဆည် လက်ဝဲတူးမြောင်းအတွင်း လူတစ်ဦး ရေဆင်းချိုးရာမှ ရေနစ်သေဆုံးခဲ့ကြောင်း ကန့်ဘလူခရိုင်မီးသတ်ဦးစီးမှူး လက်ထောက်ညွှန်ကြားရေးမှူး ဦးအောင်ဌေးဝင်းထံမှ သိရသည်။
ဖြစ်စဉ်မှာ စစ်ကိုင်းတိုင်းဒေသကြီး ကန့်ဘလူမြို့နယ်တွင် သြဂုတ် ၇ ရက် မွန်းလွဲ ၁၂ နာရီခွဲက ကန့်ဘလူမြို့နယ်မီးသတ်စခန်း၏ တောင်ဘက် ၉ မိုင်ကျော်အကွာ ထန်းကုန်းကျေးရွာ၏ အနောက်ဘက် ကင်းတပ်ဆည် လက်ဝဲတူးမြောင်းအတွင်း လူတစ်ဦး ရေနစ်သေဆုံးကြောင်း သတင်းရသဖြင့် ကန့်ဘလူမြို့နယ် မီးသတ်စခန်းမှ ဒုမီးသတ်ဦးစီးမှူး ဦးမြင့်သိန်းဦး ခေါင်းဆောင်၍ လူနာတင်ယာဉ်တစ်စီး မီးသတ်တပ်ဖွဲ့ဝင် ၁၂ ဦးနှင့် ထန်းကုန်းနယ်မြေ ရဲစခန်းမှ နယ်ထိန်းခေါင်းဆောင် ဒုရဲအုပ်လှိုင်မင်းထွန်းနှင့် တပ်ဖွဲ့ဝင် ၂ ဦး တို့ပူးပေါင်း၍ သက်သေများနှင့်အတူ သွားရောက်စစ်ဆေးရာ မောင်ဝေဖြိုးကျော် (ခ) ဝေဠုကျော်သည် လက်ဝဲတူးမြောင်းအတွင်း သူငယ်ချင်းဖြစ်သူနှင့် ရေဆင်းချိုးရာမှ ရေနစ်ပျောက်ဆုံး ခဲ့ခြင်းဖြစ်ကြောင်း သိရသည်။
အဆိုပါ ရေနစ်ပျောက်ဆုံးခဲ့သော မောင်ဝေဖြိုးကျော် (ခ) ဝေဠုကျော် (သ) ၂၆ နှစ် ၏ ရုပ်အလောင်းအား ကန့်ဘလူမြို့နယ် ရှာဖွေကယ်ဆယ်ရေးအဖွဲ့က သြဂုတ် ၇ ရက် မွန်းလွဲ ၁ နာရီ ၅၅ မိနစ်တွင် ရှာဖွေတွေ့ရှိခဲ့ပြီး ကန့်ဘလူမြို့ ကုတင် ၁၀ဝ ပြည်သူ့ဆေးရုံ သို့ ကူညီပို့ဆောင် ပေးခဲ့ကြောင်း သိရသည်။
ဖြစ်စဉ်နှင့်စပ်လျဉ်း၍ ရေနစ်သေဆုံးခဲ့သော မောင်ဝေဖြိုးကျော် (ခ) ဝေဠုကျော် သေဆုံးမှုအား ဓမ္မတာအတိုင်း သေဆုံးခြင်းဟုတ် မဟုတ် စစ်ဆေးနိုင်ရန် ကန့်ဘလူမြို့မရဲစခန်းက သေမှုသေခင်းအမှတ်စဉ် ဖြင့် အမှုဖွင့်အရေးယူ ဆောင်ရွက်လျှက်ရှိကြောင်း သတင်းရရှိသည်။
မိုးသောက် (ရွှေဘို)
