လှိုင်မြို့နယ်တွင် သား၊ ငါးနှင့် မီးဖိုချောင်သုံး စားသောက်ကုန်များအား Mobile Market စျေးရောင်းယာဉ်များဖြင့်လာရောက်ရောင်းချပေးလျက်ရှိ

ရန်ကုန် ၂ ဒီဇင်ဘာ

ရန်ကုန်အနောက်ပိုင်းခရိုင် လှိုင်မြို့နယ်တွင် ရန်ကုန်တိုင်းဒေသကြီးအစိုးရ ရန်ကုန်မြို့တော် စည်ပင်သာယာရေးကော်မတီနှင့် မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်တို့ ကြီးမှူး၍ သန့်ရှင်းလတ်ဆတ်သော သား၊ ငါး၊ ဟင်းသီးဟင်းရွက် စားသောက်ကုန်များကို ပြည်သူများ အလွယ်တကူဝယ်ယူရရှိနိုင်ရန် အတွက် ယနေ့ နံနက် ၇ နာရီက အမှတ်(၁၀) ရပ်ကွက် ကန်လမ်း လှိုင်မြင့်မိုရ်အိမ်ရာတွင် ကားရှစ်စီးဖြင့် လာရောက်ရောင်းချပေးခဲ့ကြောင်း သိရသည်။

ထိုသို့ ရောင်းချရာတွင် လှိုင်မြို့နယ်အတွင်း အမှတ်(၁၀)ရပ်ကွက်ရှိ လှိုင်မြင့်မိုရ်အိမ်ရာနေ ပြည်သူများကို စျေးနှုန်းချိုသာစွာ ရောင်းချပေးခဲ့ပြီး နောက်ရက်များတွင် စျေးနှင့်ဝေး၍ အိမ်ထောင်စုများသော ရပ်ကွက်များသို့လည်း အလှည့်ကျသွားရောက် လှည့်လည်ရောင်းချပေးသွားမည်ဖြစ်သည်။

အဆိုပါ Mobile Market အား မြို့နယ်စည်ပင်သာယာရေးကော်မတီနှင့်သက်ဆိုင်ရာ ရပ်ကွက်အုပ်ချုပ်ရေးမှူးများက ကြီးကြပ်ဆောင်ရွက်ပေးခဲ့ပြီးမြို့နယ်အတွင်းရှိ လွှတ်တော်ကိုယ်စားလှယ် များ၊ မြို့နယ်စည်ပင်သာယာရေးကော်မတီဝင်များ၊ မြို့နယ်အုပ်ချုပ်ရေးမှူးနှင့် အဖွဲ့များက အားပေးကူညီပေးခဲ့ကြကြောင်း သိရသည်။ ယခုကဲ့သို့ သား၊ ငါးနှင့် မီးဖိုချောင်သုံး စားသောက်ကုန် များကို ရပ်ကွက်များအရောက် Mobile Market စျေးရောင်းယာဉ်များဖြင့် လှည့်လည်ရောင်းချပေးမှုကို ရပ်ကွက်နှင့်အိမ်ရာများသို့ အလှည့်ကျ ဆက်လက်ဆောင်ရွက်ပေးသွားမည်ဖြစ်ကြောင်း သိရသည်။

ကြည်ဇေသော်(ပြန်/ဆက်)