မကွေး ၁၃ ဒီဇင်ဘာ
ဒီဇင်ဘာ ၁၄ ရက်မှ ၁၆ ရက်အထိ ကျင်းပပြုလုပ်မည့် လူငယ်ဘက်စုံဖွံ့ဖြိုးရေးပွဲတော် (မကွေး) တွင် သာသနာရေးနှင့်ယဉ်ကျေးမှုဝန်ကြီးဌာနက ပွဲတော်လာ ဧည့်ပရိသတ်များမှ မြန်မာ့ရိုးရာ ယဉ်ကျေးမှု အက ကို စိတ်ပါဝင်စားသူများအား သင်ကြားပေးမည်ဖြစ်ကြောင်း သိရသည်။
"လူငယ်ဘက်စုံပွဲတော်ကို လာရောက်ကြတဲ့သူတွေကို မြန်မာအက သင်ပေးဖို့ ပြင်ဆင်ထားပါတယ်။ လာရောက်တဲ့ပရိသတ်တွေထဲက မြန်မာအကသင်ချင်တယ်ဆိုရင် သင်ပေးမှာပါ။ ဒီလိုပွဲတွေ လုပ်ပေးခြင်း အားဖြင့် လူငယ်တွေကလည်း မြန်မာရိုးရာယဉ်ကျေးမှု အမွေအနှစ်တွေအပေါ်မှာ စိတ်ဝင်စားမှုရှိလာပြီးတော့ တိုးတက်ပြန့်ပွားအောင်၊ ထိန်းသိမ်းလိုစိတ်ဖြစ်လာအောင် ဆောင်ရွက်တာဖြစ်ပါတယ်" ဟု သာသနာရေးနှင့် ယဉ်ကျေးမှုဝန်ကြီးဌာန အနုပညာဦးစီးဌာနမှ ဒုတိယညွှန်ကြားရေးမှူး ဒေါ်ကြူကြူဝင်းက ပြောကြားသည်။
လူငယ်ဘက်စုံဖွံ့ဖြိုးရေးပွဲတော်(မကွေး) တွင် သာသနာရေးနှင့်ယဉ်ကျေးမှုဝန်ကြီးဌာနမှ မြန်မာ့ရိုးရာ ယဉ်ကျေးမှုအက ကပြခြင်း၊ ရုပ်သေးအက ကပြခြင်း၊ ပန်းချီပြခန်း၊ လက်အလှပန်းချီ၊ ရုပ်ပြောင်ပန်းချီနှင့် ပုံတူ ပန်းချီရေးဆွဲခြင်းများကို လက်တွေ့ပြုလုပ် ပြသသွားမည်ဖြစ်ကြောင်း သိရသည်။
ဝေလျှံ
