မြစ်သား ၂၀ ဧပြီ
မန္တလေးတိုင်းဒေသကြီး၊ ကျောက်ဆည်ခရိုင်၊ မြစ်သားမြို့နယ်အတွင်းရှိ ကျေးလက်ဒေသများတွင် ဒေသခံတောင်သူများက ပန်းလောင်မြစ်မှ မြစ်ရေတင်ခြင်းဖြင့် နှမ်းဖြူများကို စိုက်ပျိုးလုပ်ကိုင်ကြပြီး ယခုနှစ် တွင် နှမ်းဖြူများ အောင်မြင်ဖြစ်ထွန်းလျက်ရှိကြောင်း သိရသည်။
မြစ်သားမြို့နယ်တွင် စိုက်ပျိုးရေး ကောင်းမွန်လာမှုကြောင့် သီးနှံစိုက်ပျိုးရေးလုပ်ငန်းများ အောင်မြင်လာသဖြင့် ဒေသခံတောင်သူများက သီးနှံများကို တစ်နှစ်ပတ်လုံး စိုက်ပျိုးလုပ်ကိုင်လျက်ရှိသည်။ ယခုအခါ နှမ်းဖြူစိုက်တောင်သူများသည် ဘောင်ကန့်ရေသွင်းစနစ်ဖြင့် မျိုးစေ့ချ စိုက်ပျိုးခြင်းဖြစ်ပြီး တစ်ဧကလျှင်( ၁ )ပြည်နှင့်( ၄ )ဗူး သာကုန်ကျ၍ နှစ်လခန့်အကြာတွင် နှမ်းဖြူစိုက်ခင်းများ၌ အပွင့်၊ အသီးများ စတင်ဖူးပွင့်ပြီး လေးလခန့်အကြာတွင် စတင်ရိတ်သိမ်း၍ ရပါကြောင်း၊ ယခင်နှစ်များတွင် နှမ်းဖြူတစ်တင်းကို (၁၅၀,၀၀၀)ကျပ်ရှိပြီး ယခုနှစ်တွင်နှမ်းဖြူ တစ်တင်းကို (၁၆၀,၀၀၀) ကျပ်စျေးနှုန်းရှိကြောင်း သိရှိရပြီး ဘောင်ကန့်ရေသွင်းစနစ်ဖြင့် နှမ်းဖြူစိုက်ပျိုးသော တောင်သူများ အဆင်ပြေလျက်ရှိကြောင်း သိရသည်။
ယခုနှစ်တွင် မြစ်သားမြို့နယ်ဒေသအတွင်းရှိ လက်ပံဆိပ်ကျေးရွာ၊ ကူဖြူကျေးရွာ၊ နီပါးကုန်းကျေးရွာ၊ နှဲဝဲကျေးရွာ၊ ကဆွန်ကျေးရွာ၊ လမ်းခွကျေးရွာ၊ ပေါမောကျေးရွာ၊ ကြောင်ပန်းကုန်းကျေးရွာ၊ အုပ်ရှစ်ကုန်းကျေးရွာ၊ တလိုင်းကုန်း ကျေးရွာ၊ ထနောင်းကုန်းကျေးရွာ၊ သမတန်းကျေးရွာ၊ ငါးဆူကျေးရွာ၊ ရွှေပေါ်ကျွန်းကျေးရွာ၊ ကျန်တောကျေးရွာ၊ ကုက္ကိုကုန်းကျေးရွာ၊ ရွှေကြာအင်းကျေးရွာနှင့် ကုက္ကိုစုကျေးရွာတို့တွင် နှမ်းဖြူအများဆုံး စိုက်ပျိုးလျက်ရှိကြောင်း သိရသည်။
ဝင်းမင်းထွန်း