သံတွဲ ဇူလိုင် ၁၂
ရန်ကုန် အောင်မင်္ဂလာအဝေးပြေးကားဂိတ်မှ ဇူလိုင် ၁၁ ရက်တွင် သံတွဲမြို့သို့ ခရီးသည် ၃၁ ဦး တင်ဆောင် ထွက်ခွာလာသည့် မျိုးဆက်သစ် မော်တော်ယာဉ်သည် ဗေဒါစစ်ဆေးရေးဂိတ်အရောက်တွင် အသက်(၆၀)ခန့် ခရီးသည် အမျိုးသားတစ်ဦး သတိလစ်မေ့မျောသွားဖြင့် ဂွမြို့ပြည်သူ့ဆေးရုံသို့ ပို့ဆောင်စစ်ဆေးရာ သေဆုံးနေကြောင်း သိရှိရသည်။
အဆိုပါသေဆုံးသူ ခရီးသည်အား ကိုဗစ်-၁၉ ရောဂါပိုးရှိ/မရှိ စစ်ဆေးခဲ့ရာ ရောဂါပိုးတွေ့ရှိသဖြင့် မော်တော်ယာဉ်ပေါ်တွင် လိုက်ပါလာသည့်ခရီးသည် ၁၇ ဦးအား ဇူလိုင် ၁၂ ရက်တွင် သံတွဲ သီတဂူမျက်စိဆေးရုံ Quarantine Centre တွင်ထားရှိပြီး ခရိုင်ဆရာဝန်ကြီး ဒေါက်တာရဲဝင်းထွန်း ဦးဆောင်သည့်အဖွဲ့မှ ရောဂါပိုးရှိ/မရှိ စစ်ဆေးခဲ့ရာ ၂ ဦးတွင် ရောဂါပိုးတွေ့ရှိခဲ့သဖြင့် ငပလီဆေးရုံတွင်ထားရှိ၍ ဆေးကုသမှုခံယူလျက်ရှိကြောင်း သိရှိရသည်။
မျိုးဆက်သစ်မော်တော်ယာဉ်သည် ဂွမြို့မှ သံတွဲမြို့သို့ ထွက်ခွာလာရာတွင် သံတွဲမြို့နယ် ကျောက်ကြီးကျေးရွာတွင် (၂)ဦး၊ ဇလွန်ကျေးရွာတွင် (၁၃)ဦး၊ သရက်ပင်ကွင်း ဆရာတော်တစ်ပါးတို့ ဆင်းကျန်ခဲ့ကြောင်း ယာဉ်မောင်း၏ ပြောကြားချက်အရ သိရှိရသဖြင့် သက်ဆိုင်ရာ ကျေးရွာအုပ်ချုပ်ရေးမှူး၊ ကျန်းမာရေးမှူးများနှင့် ချိတ်ဆက်ပြီး ၎င်းတို့အား Home Quarantine ထားရှိလျက်ရှိကြောင်း သတင်းရရှိသည်။
ခရိုင်(ပြန်/ဆက်)
