ဧပြီ ၈
မိုဇမ်ဘစ်နိုင်ငံမြောက်ပိုင်း နမ်ပူလာပြည်နယ် မိုဇမ်ဘစ်ကျွန်းအနီးတွင် ယမန်နေ့က ဝန်ပိုတင်ဆောင်လာသော သင်္ဘောတစ်စင်း တိမ်းမှောက်မှုဖြစ်ပွားသဖြင့် ၉၁ ဦးထက်မနည်းသေဆုံးကြောင်း နိုင်ငံပိုင်မိုဇမ်ဘစ်ရေဒီယိုက ပြောကြားသည်။ အဆိုပါသင်္ဘောတိမ်းမှောက်မှုကြောင့် သေဆုံးသူများတွင် ကလေးများပါဝင်ပြီး အခြား ၃၄ ဦး ပျောက်ဆုံးနေဆဲဖြစ်ကြောင်းနှင့် အသက်ရှင်ကျန်ရစ်သူငါးဦးကို တွေ့ရှိခဲ့ကြောင်း ထပ်လောင်းဖော်ပြထားသည်။ ထိုသင်္ဘောပေါ်သည် Mossuril ခရိုင်မှထွက်ခွာလာပြီး ခရီးသည် ၁၃၀ တင်ဆောင်လာသည်ဟု သိရသည်။ အာဏာပိုင်များက မတော်တဆမှုဖြစ်ပွားခြင်းနှင့်ပတ်သက်ပြီးစုံစမ်းစစ်ဆေးမှုလုပ်ဆောင်ရန်နှင့် ပျောက်ဆုံးနေသူများအား ရှာဖွေကယ်ဆယ် မှုများ ဆက်လက်လုပ်ဆောင်ရန် ကဏ္ဍပေါင်းစုံပါဝင်သောအဖွဲ့တစ်ဖွဲ့ ဖွဲ့စည်းခဲ့သည်။
ကိုးကား-ဆင်ဟွာ
ဘာသာပြန်-မြင့်မြင့်ချို
