မြို့သစ် ၂၀ ဇူလိုင်
မကွေးခရိုင် မြို့သစ်မြို့နယ် ညောင်ဇင်ကျေးရွာအုပ်စု၊ မကြီးကန်ကျေးရွာအနီးရှိ နတ်ကွန်းရိုးချောင်းတွင် ကျင်စက်ဖြင့်ငါးဖမ်းသည့် လူတစ်ဦး ကျင်စက်ရှော့ဖြစ်ကာ ဓာတ်လိုက်သေဆုံးကြောင်း မြို့သစ် မြို့မရဲစခန်းမှ သိရသည်။
ဖြစ်စဉ်မှာ မကြီးကန်ကျေးရွာနေ အောင်ကိုလင်းသည် ရွာ၏အရှေ့တောင်ဘက်ရှိ နတ်ကွန်းရိုးချောင်းသို့ ငါးရှော့တိုက်ဖမ်းဆီးရန်အတွက် ဇူလိုင် ၁၉ ရက် ညနေ ၆ နာရီက ငါးရှော့တိုက်ဖမ်းဆီးသည့် (၁၂)ဗို့ဘက်ထရီအိုးတစ်လုံး၊ ကျင်စက်တစ်ခု၊ ခပ်ခွက်နှစ်ချောင်း၊ ပုလိုင်းတို့ကိုယူ၍ ထွက်သွားခဲ့ပြီး ည ၉ နာရီအထိ ပြန်မလာသဖြင့် သွားရောက်ရှာဖွေရာ သားဖြစ်သူအောင်ကိုလင်းအား ချောင်းအလယ်ရှိ ကျောက်ဆောင် ကျောက်ခဲများကြားတွင် ငါးဖမ်းသည့်ပစ္စည်းများနှင့်အတူ ဓာတ်လိုက်ပြီး မှောက်လျက် အနေအထား ဒဏ်ရာများဖြင့် သေဆုံးနေသည်ကို တွေ့ရကြောင်း သိရသည်။
ဖြစ်စဉ်နှင့်ပတ်သက်၍ အောင်ကိုလင်း သေဆုံးမှုအား ဓမ္မတာအတိုင်း သေဆုံးခြင်းဟုတ်/မဟုတ် စစ်ဆေးပေးရန် ဒုရဲအုပ်အောင်မျိုးသန့်မှ တရားလိုပြုလုပ် တိုင်တန်းသဖြင့် မြို့သစ်မြို့မရဲစခန်းမှ အမှုရေးဖွင့် စစ်ဆေးဆောင်ရွက်လျက်ရှိကြောင်း သိရသည်။
သန်းဝင်းထွန်း (ပြန်/ဆက်)
