မကွေး ၃၀ ဧပြီ
မကွေးတိုင်းဒေသကြီးအတွင်း ဆေးရုံများ၌ စောင့်ရှောက်မှုခံယူခဲ့သည့် စောင့်ကြည့်သံယလူနာ(၁၄၈)ဦးထဲမှ (၁၉) ဦး သေဆုံးခဲ့သည့်အပေါ် ဒေသခံများက စိုးရိမ်မှုရှိနေပြီး သေဆုံးသူများ၌ ကိုဗစ်-၁၉ ရောဂါပိုး ရှိ၊မရှိ စစ်ဆေးခဲ့ရာ Negative (ပိုးမတွေ့) အဖြေထွက်ရှိခဲ့ကြောင်း တိုင်းပြည်သူ့ကျန်းမာရေးဦးစီးဌာနမှ သိရသည်။
“သေဆုံးသူအားလုံးကို ကိုဗစ်-၁၉ပိုး ရှိ၊မရှိ စစ်ပြီးသားပါ။ အားလုံး Negative အဖြေထွက်ထားတယ်။ ၁၉ ဦး ဆိုတာကလည်း ဖေဖော်ဝါရီထဲက ခုချိန်ထိ သုံးလလောက်အတွင်းမှာ ရောဂါပိုးစစ်ဆေးတဲ့လူတွေထဲကပါ။ သူတို့မှာ ပြင်းထန်တဲ့ နောက်ခံရောဂါတွေရှိတယ်။ အခြားရောဂါတွေကြောင့် သေဆုံးခဲ့ကြတာပါ” ဟု မကွေးတိုင်း ပြည်သူ့ကျန်းမာရေးဦးစီးဌာန ၊ လက်ထောက်ညွှန်ကြားရေးမှူး ဒေါက်တာခင်မောင်သန်းက ရှင်းပြသည်။
အခြားရောဂါဆိုသည်မှာ အရက်သောက်၍ အသည်းခြောက်ခြင်း၊ နှလုံးရောဂါရှိခြင်း စသည့် ပြင်းထန်သော နောက်ခံရောဂါများ ရှိနေခြင်းကို ဆိုလိုခြင်းဖြစ်ပြီး သေဆုံးသူအများစုမှာလည်း အသက်(၆၀)ဝန်းကျင် အသက်ကြီးသူများ ဖြစ်ကြောင်း ဒေါက်တာခင်မောင်သန်း က ရှင်းပြသည်။
“တချို့ မီဒီယာတွေက ထင်ယောင်ထင်မှား ဖြစ်စေတဲ့ သတင်းတွေ တင်နေကြတယ်။ ဒီလိုမဖြစ်အောင် တိုင်းအစိုးရအနေနဲ့ ကိုဗစ်သတင်းတွေ သီးသန့်ထုတ်ပြန်တဲ့ အစီအစဉ်မျိုး၊ မေးရင်လည်း ဖြေကြားပေးမယ့်ဟာမျိုး လုပ်ပေးစေချင်ပါတယ် ” ဟု မကွေးဒေသခံ ဒေါ်သီတာ က သူ့အမြင်ကို ပြောသည်။
ကိုဗစ်ပိုး စစ်ဆေးမှုကို နိုင်ငံရပ်ခြား ခရီးသွားရာဇဝင်ရှိသူများ၊ ၎င်းတို့နှင့် ထိတွေ့ခဲ့သူများကို အဓိကထား စစ်ဆေးခဲ့ခြင်းဖြစ်ကြောင်း၊ မကွေးတိုင်း၌ ကိုဗစ်ပိုးတွေ့သူ(၁)ဦးသာ ရှိသေးပြီး ယင်းလူနာအား ဒုတိယအကြိမ် ပြန်စစ်ခဲ့ရာ ပိုးမတွေ့ အဖြေထွက်ခဲ့သည့်အတွက် နောက်တစ်ကြိမ် ထပ်စစ်၍ ပိုးမတွေ့တော့လျှင် တိုင်းအတွင်း၌ ရောဂါပိုးတွေ့လူနာ မရှိတော့ကြောင်း ပြည်သူ့ကျန်းမာရေးဦးစီးဌာနမှ သိရသည်။
ဇေယျတု(မကွေး)
