မင်းဘူး ၂၀ ဇန်နဝါရီ
မကွေးတိုင်း ဒေသကြီး ၊ မင်းဘူး(စကု)မြို့နယ် စည်ပင်သာယာရေးအဖွဲ့မှ ၂၀၁၉ - ၂၀၂၀ ဘဏ္ဍာနှစ်တွင် ငွေလုံးငွေရင်း ရန်ပုံငွေကျပ် ၇၂၇ ဒသမ ၁၀ သန်းဖြင့် မြို့ပြဖွံ့ဖြိုးရေးလုပ်ငန်း ၆၅ ခု အကောင်အထည်ဖော် ဆောင်ရွက်ပေးသွားမည်ဖြစ်ကြောင်း မင်းဘူး(စကု)မြို့နယ် စည်ပင်သာယာရေး အဖွဲ့မှ သိရသည်။
မင်းဘူး (စကု)မြို့နယ် စည်ပင်သာယာရေးအဖွဲ့အနေဖြင့် မြို့ပြအင်္ဂါရပ်နှင့် အညီ သန့်ရှင်း သာယာလှပရေးအတွက် ဘဏ္ဍာနှစ်အလိုက် ခွင့်ပြုငွေလုံးငွေရင်း ရန်ပုံငွေများဖြင့် မြို့တွင်းရှိ ရေနုတ်မြောင်းများ တူးဖော်ခြင်း ၊ ကတ္တရာလမ်းများ ချဲ့ထွင်ပြုပြင်ခြင်း ၊ ဈေးတွင်းလမ်းများ ကောင်းမွန်အောင် ပြုပြင်ခြင်းနှင့် မြို့တွင်း ရေပြတ်လပ်မှုမရှိစေရေး ရေပေးဝေရေးလုပ်ငန်းများ အဆင့်မြှင့်တင် ဆောင်ရွက်ခြင်း၊ မြို့ပြသာယာလှပစေရေး လမ်းဘေးပလက်ဖောင်းများ ပြုပြင်မွမ်းမံခြင်း၊ ပန်းအလှပင်များနှင့် အရိပ်ရသစ်ပင်များ စိုက်ပျိုးခြင်း ၊ ရပ်ကွက်များအတွင်း အမှိုက်များ စနစ်တကျ သိမ်းဆည်းခြင်းလုပ်ငန်းများကို အကောင်အထည်ဖော် ဆောင်ရွက် လျက်ရှိရာ ယခု ၂၀၁၉ - ၂၀၂၀ ဘဏ္ဍာရေးနှစ်တွင်လည်း ဌာန၏ ခွင့်ပြုငွေလုံးငွေရင်းရန်ပုံငွေဖြင့် မြို့ပြအင်္ဂါရပ်နှင့် အညီ သန့်ရှင်းသာယာလှပရေးအတွက် မြို့ပြဖွံ့ဖြိုးရေးလုပ်ငန်းများကို ဆက်လက် အကောင်အထည်ဖော် ဆောင်ရွက်ပေးသွားမည် ဖြစ်ကြောင်း သိရသည်။
“ ယခု ၂၀၁၉ - ၂၀၂၀ ဘဏ္ဍာရေးနှစ်မှာ မင်းဘူး(စကု)မြို့နယ်စည်ပင်သာယာရေးအဖွဲ့အနေဖြင့် ဌာနခွင့်ပြုငွေ လုံးငွေရင်း ရန်ပုံငွေနဲ့ မြို့ပြဖွံ့ဖြိုးရေးလုပ်ငန်း (၆၅)ခု အကောင်အထည်ဖော် ဆောင်ရွက်ပေးသွားမှာ ဖြစ်ပါတယ်။ အကောင်အထည်ဖော် ဆောင်ရွက်မည့် မြို့ပြဖွံ့ဖြိုးရေး လုပ်ငန်းတွေကတော့ မြို့တွင်းရပ်ကွက်နေ ပြည်သူများ ရာသီမရွေး သွားလာမှုအဆင်ပြေစေရန် လမ်းအဆင့်မြှင့်တင်ခြင်း လုပ်ငန်း(၂၅)ခု စုစုပေါင်း လမ်းအရှည်ပေ ၂ မိုင် ၊ ၅ ဒသမ ၈၅ ဖာလုံ အား ခွင့်ပြုငွေကျပ် ၄၈၃ ဒသမ ၁၂ သန်းဖြင့် ပြုပြင်ဆောင်ရွက်ခြင်း ၊ ခွင့်ပြုငွေကျပ် ၂၃ ဒသမ ၅၇ သန်းဖြင့် ကွန်ကရစ်တံတား (၁၀)စင်း တည်ဆောက်ခြင်း ၊ ခွင့်ပြုငွေကျပ် ၃၀ ဒသမ ၇၅ သန်းဖြင့် ရေပေးဝေရေးလုပ်ငန်း (၁၁)ခု အဆင့်မြှင့်တင် ဆောင်ရွက်ခြင်း ၊ ခွင့်ပြုငွေကျပ် ၁၆၄ ဒသမ ၆၆ သန်းဖြင့် အုတ်ရေနုတ်မြောင်း (၁၁)ခု တူးဖော်ဆောင်ရွက်ခြင်း ၊ ခွင့်ပြုငွေကျပ် ၂၅ သန်းဖြင့် အခြားလုပ်ငန်း(၈)ခု ဆောင်ရွက်ခြင်း ၊ စုစုပေါင်း မြို့ပြဖွံ့ဖြိုးရေးလုပ်ငန်း(၆၅)ခုကို ဌာနခွင့်ပြုငွေလုံးငွေရင်းရန်ပုံငွေကျပ် ( ၇၂၇ ဒသမ ၁၀ ) သန်းဖြင့် ဆောင်ရွက် ပေးသွားမှာဖြစ်ပါတယ်။ ယခုလက်ရှိမှာတော့ အကောင်အထည်ဖော် ဆောင်ရွက်မည့် မြို့ပြဖွံ့ဖြိုးရေး လုပ်ငန်းတွေအတွက် အမြန်ဆုံး လုပ်ဆောင် နိုင်အောင် စီစဉ်ဆောင်ရွက်နေပါတယ်” ဟု မင်းဘူး(စကု)မြို့နယ် စည်ပင်သာယာရေးအဖွဲ့ အမှုဆောင်အရာရှိ ဦးဝင်းနိုင် က ပြောသည်။
ရဲဝင်းနိုင် ( ညောင်ဦး )
