ညောင်တုန်း ၁၉ ဇန်နဝါရီ
ညောင်တုန်းမြို့မှ ပြည်သူတို့၏ အသက်အိုးအိမ်စည်းစိမ်ကို ကာကွယ်ပေးထားသော ရေကာတာမှာ ၂၂ လမ်းမြစ်ကမ်းတွင်၊ ဇန်နဝါရီ ၈ ရက်နေ့မှစတင်၍ ဆိုးဆိုးရွားရွား ပြိုကျပျက်စီးခဲ့သော မြစ်ကမ်းနှင့်ရေကာတာကို မိုးမကျမီ၊ မြစ်ရေမတက်မီ အမြန်ပြီးစီးအောင် ကာကွယ်တည်ဆောက်နိုင်ရေးအတွက် ပြည်ထောင်စုဝန်ကြီး ဦးသန့်စင်မောင်နှင့်အဖွဲ့ဝင်များသည် ဇန်နဝါရီ ၁၉ နံနက် ၉ နာရီက ညောင်တုန်းမြို့သို့ ရောက်ရှိလာပြီး မြစ်ကမ်းပြိုနေရာများကို ကြည့်ရှုစစ်ဆေးသည်။
ပြည်ထောင်စုဝန်ကြီးနှင့်အဖွဲ့အား ပြည်သူ့လွှတ်တော် ကိုယ်စားလှယ်ဦးအုန်းလွင်၊ အမျိုးသားလွှတ်တော်ကိုယ်စားလှယ် ဒေါ်အိအိပြုံး၊ တိုင်းဒေသကြီးလွှတ်တော် ကိုယ်စားလှယ်များဖြစ်သော ဒေါ်နီနီမိုး၊ ဦးကျော်ဆန်း၊ မြို့နယ်အုပ်ချုပ်ရေးမှူး ဦးသွင်ကိုကိုမင်းနှင့် ဌာနဆိုင်ရာတာဝန်ရှိသူများက ကြိုဆိုကြပြီးမြစ်ကမ်းပြိုအနေများကို ရှင်းလင်းပြသခဲ့ကြသည်။
ဆက်လက်၍ မြစ်ကမ်းအနီးရှိ သွန်းဘုရားအမကခန်းမတွင် ပြည်ထောင်စုဝန်ကြီးအား တာဝန်ရှိသူများက မြစ်ကမ်းပြိကျပျက်စီးခဲ့မှု အခြေအနေများနှင့်ပြုပြင် ထိန်းသိမ်းမှုအခြေအနေများကို မြေပုံကားချပ်များဖြင့်ရှင်းလင်း တင်ပြခဲ့ကြသည်။
ညောင်တုန်းမြို့သည် ဧရာဝတီမြစ်နှင့် ပန်းလှိုင်မြစ်ဆုံတွင်တည်ရှိသော မြို့တစ်မြို့ဖြစ်ရာ ၁၉၈၅ ခုနှစ်မတိုင်မီ နှစ်များက ညောင်တုန်းတစ်ဖက်ကမ်း ရန်ကင်းစံရာဘက်ခြမ်းတွင် သောင်ထွန်းပြီး ညောင်တုန်းမြို့ဘက်အခြမ်း ကျွန်းထိပ်ပိုင်းတွင်ကမ်းပြိုမှုများကြောင့် ၁၉၈၆/၁၉၈၇ ခုနှစ်က ညောင်တုန်းမြို့၁၂ လမ်းတည့်တည့်တွင် ဧရာဝတီမြစ်နှင့် ပန်းလှိုင်မြစ်ဖြတ်ရေခေါ် တူးမြောင်းဖေါက်လုပ်ခဲ့ရာမှ မြို့တည့်တည့်ရေကြောင်းထိုးမှုကြောင့် ၁၉၈၈ ခုနှစ်မှစတင်၍ ညောင်တုန်းမြို့မှာ မြစ်ကမ်းပြိုမှု ဆိုးဆိုးရွားရွားဖြစ်ခဲ့ရသည်။
ညောင်တုန်းမြို့တွင်းနေ ပြည်သူများ ရေဘေးအန္တရာယ်ကင်းဝေးစေရေးအတွက် ညောင်တုန်းမြို့မြစ်ကမ်းရေကာတာကို စနစ်တကျအခိုင်အမာ ရေရှည်တည်တန့်ရေးအတွက် မြစ်ကမ်းနှင့်ရေကာတာ တည်ဆောက်ရေးလုပ်ငန်းများတွင် နိုင်ငံတော်အစိုးရနှင့်အတူ နယ်သာလန်နိုင်ငံမှပါ ပါဝင်ကူညီဆောင်ရွက်သွားမည်ဖြစ်ကြောင်းလည်း သိရှိရသည်။
နေလင်း(ညောင်တုန်း)
