နေပြည်တော် ၁၈ ဇူလိုင်
ပဲခူးတိုင်းဒေသကြီး၊ ကဝမြို့နယ်၊ စစ်တောင်းမြစ်ဝအတွင်း သောင်တင်နေသော စက်လှေကြီးပေါ်ရှိ တရားမဝင်ကျွန်းသစ်များ သယ်ဆောင်မှုနှင့်ပတ်သက်၍ ငွေကြေးတောင်းခံ၍ လွှတ်ပေးပြီး ကျေးရွာ အုပ်ချုပ်ရေးအဖွဲ့ဝင်များက ခွဲဝေယူခဲ့ကြခြင်းအပေါ် အရေးယူပေးပါရန် အဂတိလိုက်စားမှု တိုက်ဖျက်ရေးကော်မရှင်သို့ တိုင်ကြားခဲ့သည်။
တိုင်ကြားစာအရ အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်း စစ်ဆေးခဲ့ရာ စစ်တောင်းမြစ်ဝအတွင်း သစ်တင် စက်လှေကြီး သောင်တင်နေသည့် သတင်းအရ နယ်မြေခံတပ်နှင့် ကဝမြို့နယ်၊ ဝါးတောကျေးရွာ အုပ်ချုပ်ရေးမှူး ဦးဇော်မိုးသည် ရွာသားအချို့နှင့် အတူ စက်လှေပေါ်သို့ တက်ရောက်ခဲ့ကြပြီး တရားမဝင်သစ်များအား ဖမ်းဆီးခြင်းမပြုဘဲ သစ်ပိုင်ရှင် ထံမှ ငွေကြေးတောင်းခံရယူခဲ့ကြကြောင်း စစ်ဆေးပေါ်ပေါက်ခဲ့သည်။ ဦးဇော်မိုးသည် တာဝန်ရှိသူ အဆင့်ဆင့်အား ဆက်လက်တင်ပြခြင်းမရှိဘဲ ငွေကျပ် (၂၄၅)သိန်းကို လက်ခံရယူခဲ့ခြင်းဖြင့် ရာထူးတာဝန်ကို အလွဲသုံးစားပြု၍ အဂတိလိုက်စားမှု ကျူးလွန်ခဲ့ကြောင်း စစ်ဆေးပေါ်ပေါက်သဖြင့် ၎င်းအပေါ် အဂတိလိုက်စားမှုတိုက်ဖျက်ရေး ဥပဒေပုဒ်မ ၅၆ အရ ပဲခူးတိုင်းဒေသကြီး၊ ကဝမြို့မ ရဲစခန်းတွင် ဇူလိုင် ၁၇ ရက်၌ ပထမသတင်းပေးတိုင်ကြားချက် ဖွင့်လှစ်၍ တရားစွဲဆိုအရေးယူ နိုင်ရေး ဆောင်ရွက်လျက်ရှိသည်။ အဆိုပါကိစ္စတွင် ပါဝင်ပတ်သက်ခဲ့သော စစ်မှုထမ်းနှစ်ဦးအား ကော်မရှင်၏ ညှိနှိုင်းအကြောင်းကြားချက်အရ ကာကွယ်ရေးဝန်ကြီးဌာနမှ အကျဉ်းစစ်တရား ရုံးချုပ်ဖြင့် စစ်ဆေးခဲ့ပြီး တပ်မတော်အက်ဥပဒေပုဒ်မ ၅၁(စ)အရ အပြစ်ဒဏ်အား မတ် ၃၁ ရက်တွင် ချမှတ်ခဲ့ကြောင်းနှင့် သစ်ပိုင်ရှင် ဦးမင်းမင်းဆိုသူမှာ ၂၀၁၉ ခုနှစ် ဒီဇင်ဘာ ၁၁ ရက်တွင် ကွယ်လွန်ပြီး ဖြစ်ကြောင်း စစ်ဆေးပေါ်ပေါက်သဖြင့် ၎င်းအား အမှုတွင်ထည့်သွင်း စွဲဆို၍မရနိုင်တော့ကြောင်း အဂတိ လိုက်စားမှုတိုက်ဖျက်ရေးကော်မရှင်မှ သိရသည်။
(သတင်းစဉ်)
