ပေါင် ၁၈ ဒီဇင်ဘာ
မွန်ပြည်နယ် ပေါင်မြို့နယ် မိုးနိုင်းရပ် ကျောက်မိုင်းတစ်ခုတွင် ဒီဇင်ဘာ ၁၇ ရက် ညနေ ၅ နာရီက wheel loader တစ်စီး ချောက်ထဲထိုးကျခဲ့ပြီး ယာဉ်မောင်းသေဆုံးခဲ့ကြောင်း သိရသည်။
"ဝုန်းကနဲကျသံကိုတစ်ချက် ကြားလိုက်တာနဲ့ ကြည့်လိုက်တော့ wheel loader ကားထိုးကျသွားတာ မြင်လိုက်ရတယ်။ ကျွန်တော်လည်း နီးစပ်ရာကိုဖုန်းဆက်ပြီး အကြောင်းကြားလိုက်တယ်။ မြင်လိုက်ရတာကတော့ ကားမောင်းသူက သေဆုံးသွားပါပြီ"ဟု စက်ပြင်ဆရာကိုမိုးဆွေက ပြောသည်။
သေဆုံးသူမှာ စက်ကြီးယန္တရားယာဉ်မောင်း ကိုလင်းလင်း (၃၇)နှစ် မိုးနိုင်းရပ်ကွက်နေ မိုင်းလုပ်သားဖြစ်သည် ဟုသိရသည်။
အခင်းဖြစ်ပွားခဲ့သော ကျောက်မိုင်းမှာ မဟာအောင်ပွင့်ကောင်း ကျောက်မိုင်းဖြစ်ပြီး ၎င်းယာဉ်မှာ လွန်ခဲ့သော ၃ ရက်ခန့်တည်းက စက်ချွတ်ယွင်းပြီး တောင်စောင်းတွင် ရပ်ထားခဲ့ကာ ယနေ့ညနေမှ ဟိုက်ဒေါလစ်ပြင်ဆင်၍ ပြန်လည်မောင်းချခဲ့ရာမှ ယခုလိုဖြစ်ခဲ့သည်ဟု သိရှိသူများကဆိုသည်။
အဆိုပါဖြစ်စဉ်နှင့်ပတ်သက်ပြီး ပေါင်မြို့မရဲစခန်းမှ အရေးယူဆောင်ရွက်ထားကြောင်း သိရသည်။
ဇင်မျိုးသူ