ဒီပဲယင်း ၁၈ ဒီဇင်ဘာ
စစ်ကိုင်းတိုင်းဒေသကြီး၊ ရွှေဘိုခရိုင်၊ ဒီပဲယင်းမြို့နယ် ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ ကျေးရွာ မြစိမ်းရောင်စီမံကိန်းရန်ပုံငွေ ကျပ် (၅၆၁) သိန်းကို ဒီဇင်ဘာလ ၁၇ ရက်နေ့က ပေါင်းတောင်ကူးကျေးရွာတွင် ပဉ္စမအကြိမ် ထုတ်ချေးပေးခဲ့သည်။
ရှေးဦးစွာ မြို့နယ်ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၊ ဒုတိယဦးစီးမှူးဒေါ်စန်းစန်းလွင်က ကျေးရွာ ပြည်သူများနှင့်တွေ့ဆုံပြီး မြစိမ်းရောင်စီမံကိန်းလေးနှစ်အတွင်း တွေ့ကြုံခဲ့ရသည့် အားသာချက်၊ အားနည်းချက်များ၊ လုပ်ငန်းတိုးတက်မှုအခြေအနေများကို ဆွေးနွေးခဲ့ပြီး ကျေးရွာမြစိမ်းရောင်စီမံကိန်း၊ အရင်းမပျောက်လည်ပတ် ရန်ပုံငွေ ကျပ် သိန်း(၃၀၀)နှင့် အတိုးရငွေကျပ် (၂၆၁) သိန်း၊ စုစုပေါင်းငွေကျပ် (၅၆၁) သိန်းကို ကျေးရွာမြစိမ်းရောင်စီမံကိန်း ရန်ပုံငွေ ကြီးကြပ်မှုကော်မတီထံ လွှဲပြောင်းပေးအပ်ခဲ့သည်။
အဆိုပါကျေးရွာသည် ၂၀၁၅-၂၀၁၆ ခု ဘဏ္ဍာရေးနှစ်တွင် ကျေးရွာမြစိမ်းရောင်စီမံကိန်းကို အကောင်အထည်ဖော်ဆောင်ရွက်ခဲ့ပြီး ပဉ္စမအကြိမ်တွင် ရန်ပုံငွေကျပ် (၅၆၁) သိန်းကို စိုက်ပျိုးရေးလုပ်ငန်းအတွက် (၁၀၄) ဦး၊ မွေးမြူရေးလုပ်ငန်းအတွက် (၂၂) ဦး၊ အရောင်းအဝယ်လုပ်ငန်းအတွက် (၇) ဦး၊ အသက်မွေးဝမ်းကျောင်း လုပ်ငန်းအတွက် (၂) ဦး တို့ကို ထုတ်ချေးပေးခဲ့ကြောင်း သိရသည်။
စိုးဝေအောင်(ခင်ဦး)
