ဖားကန့် ၁ ဩဂုတ်
ကချင်ပြည်နယ်၊ ဖားကန့်မြို့နယ်၊ အေးမြသာယာရပ်ကွက်၊ တောင်ပြိုမှော်ရွာ၌ ထမင်းဟင်းချက်ပြုတ်ပြီး မီးဖိုမီးကြွင်းမီးကျန်မှတစ်ဆင့် အနီးရှိဘေးထရံကိုမီးစွဲကာ နေအိမ်(၄)လုံး မီးလောင်ဆုံးရှုံးမှု ယနေ့နံနက် ၉ နာရီခွဲခန့်က ဖြစ်ပွားခဲ့ကြောင်း မြို့နယ်မီးသတ်ဦးစီးဌာနမှ သိရသည်။
"မီးစတာက မီးဖိုကြွင်းမီးကျန်ပေါ့၊ စလောင်တာက ၉ နာရီခွဲလောက်ကပါ၊ စလောင်တဲ့အိမ် က (၈)ပေပတ်လည် နှစ်ခန်းတွဲ နှစ်ထပ်၊ သွပ်မိုး ထရံကာပါ၊ ဘေးက အိမ်သုံးလုံးက တစ်ထပ်၊ (၆)ပေပတ်လည် နှစ်ခန်းတွဲ၊ သွပ်မိုး ထရံကာတွေပဲ"ဟု မြို့နယ်မီးသတ်ဦးစီးဌာနမှ ဦးစီးမှူး ဦးပြေငြိမ်းက ပြောသည်။
မီးလောင်မှုဖြစ်စဉ်ကို ရပ်ကွက်/ကျေးရွာအုပ်ချုပ်ရေးအဖွဲ့များ၊ သန္ဓေနှင့်အရန်မီးသတ် တပ်ဖွဲ့ဝင်များ၊ ကြက်ခြေနီတပ်ဖွဲ့ဝင်များ၊ ရဲတပ်ဖွဲ့ဝင်များနှင့် ကျေးရွာနေပြည်သူများက မီးသတ်ကား (၅)စီး၊ ကျေးရွာအနီးရှိ ယူနတီကုမ္ပဏီနှင့် KNDPC ကုမ္ပဏီတို့မှ ဘက်ဟိုးတစ်စီးစီနှင့် ရေသယ်ယာဉ် နှစ်စီးစီတို့ဖြင့် ဝိုင်းဝန်းငြိမ်းသတ်ရာ ၁၀ နာရီခန့်တွင် မီးငြိမ်းသတ်နိုင်ခဲ့ကြောင်း သိရသည်။
မီးလောင်မှုဖြစ်စဉ်မှ မီးစတင်လောင်ကျွမ်းသည့် နေအိမ်အမှတ်(၁၄၇)ရှိ အိမ်ပိုင်ရှင် ဦးထွန်းအေး(၄၃)နှစ်ကို မီးပေါ့ဆမှုဖြင့် အရေးယူဆောင်ရွက်လျက်ရှိနေကြောင်း သိရသည်။
မီးလောင်မှုကြောင့် နေအိမ်(၄)လုံးမှ မိသားစုဝင် စုစုပေါင်း(၁၆)ဦးတို့တွင် အချို့က နီးစပ်ရာ ဆွေမျိုးများအိမ်တွင် မှီခိုလျက်ရှိပြီး အချို့ကို အဆိုပါကျေးရွာရှိ ဗုဒ္ဓယာဉ်ကျေးမှု မူကြိုကျောင်းတို့တွင် ခေတ္တနေရာချထားပေးထားကြောင်း မြို့နယ်အထွေထွေအုပ်ချုပ်ရေးဦးစီးဌာနမှ သိရသည်။
တာလင်းမောင်(ပြန်/ဆက်)
