ဖာပွန် ၂၁ ဩဂုတ်
ကရင်ပြည်နယ်၊ ဖာပွန်ခရိုင် အားကစားနှင့်ကာယပညာဦးစီးဌာနမှ ကြီးမှူး၍ အားကစားဆိုင်ရာ အသိပညာပေး ဟောပြောပွဲနှင့် သရုပ်ပြပွဲကို ယမန်နေ့ ညနေပိုင်းက ဖာပွန်မြို့နယ် အခြေခံပညာ အထက်တန်းကျောင်း ပညာရတနာခန်းမ၌ ကျင်းပခဲ့သည်။
အခမ်းအနားတွင် ခရိုင် အမျိုးသမီးရေးရာအဖွဲ့ဥက္ကဋ္ဌ ဒေါက်တာစောမြင့်ထူးက အဖွင့်အမှာစကား ပြောကြားပြီး ခရိုင် အားကစားနှင့် ကာယပညာဦးစီးဌာန လက်ထောက်ညွှန်ကြားရေးမှူး ဒေါ်သီတာအေးက ကျောင်းသား ကျောင်းသူများ ကာယ၊ ဉာဏ ဖွံ့ဖြိုးတိုးတက်စေရန်၊ ဘက်စုံထူးချွန်ထက်မြတ်သော အားကစားသမားကောင်းများ မွေးထုတ်ပေးနိုင်ရန်နှင့် အားကစား ပြုလုပ်ခြင်းဖြင့် ကိုယ်ခန္ဓာကျန်းမာဖွံ့ဖြိုးပြီး ဉာဏ်ရည် ထက်မြက်လာစေရန်အတွက် စက်တင်ဘာ ၄ ရက်တွင် အေရိုးဗစ်သင်တန်း ဖွင့်လှစ်ပေးသွားမည်ဖြစ်ကြောင်း ရှင်းလင်းပြောကြားသည်။
ထို့နောက် Myanmar Fitness Dance ဆရာမ ဒေါ်နဒီအောင်က အေရိုးဗစ်အကဖြင့် သရုပ်ပြသခဲ့သည်။
ဟောပြောပွဲသို့ ခရိုင် အားကစားနှင့် ကာယပညာဦးစီးဌာန လက်ထောက်ညွှန်ကြားရေးမှူး၊ ခရိုင် အမျိုးသမီးရေးရာအဖွဲ့ဥက္ကဋ္ဌ၊ ခရိုင်/မြို့နယ်အဆင့် ဌာနဆိုင်ရာများ၊ ဆရာ၊ ဆရာမများနှင့် ကျောင်းသား ကျောင်းသူများ စုစုပေါင်း (၂၈၄)ဦးခန့် တက်ရောက်ခဲ့သည်။
ကျော်ဝဏ္ဏ(ပြန်/ဆက်)
