ဂျီနီဗာ ဒီဇင်ဘာ ၂၀
မကြာသေးမီက လေ့လာထားချက်များအရ ဖိုက်ဇာ ကိုဗစ်-၁၉ ကာကွယ်ဆေးကို တတိယအကြိမ် ထိုးပေးခြင်းဖြင့် ဒယ်လ်တာ မျိုးကွဲကဲ့သို့ပင် အိုမီခရွန် ကူးစက်မှုကိုလည်း ကာကွယ်ရာတွင် ထိရောက်နိုင်ဖွယ်ရှိသည်ဟု ကမ္ဘာ့ကျန်းမာရေးအဖွဲ့ကြီးက ပြောသည်။
ကုလသမဂ္ဂ ကျန်းမာရေး အဖွဲ့အစည်းကြီးသည် အဖွဲ့ဝင် နိုင်ငံများအတွက် နောက်ဆုံး ရရှိထားသော အချက်အလက်များကို ထုတ်ပြန်ခဲ့သည်။ အင်္ဂလန်မှ ရရှိထားသောတွေ့ရှိချက်များအရ ဖိုက်ဇာကာကွယ်ဆေး သို့မဟုတ် အက်စထရာဇနီကာ ကာကွယ်ဆေး နှစ်ကြိမ်ထိုးပြီးနောက် ဒယ်လ်တာမျိုးကွဲကို ကာကွယ်နိုင်မှုနှင့် နှိုင်းယှဉ်လျှင် ကာကွယ် ဆေးသက်ရောက်မှုမှာ အိုမီခရွန် ကူးစက်မှုကြောင့် ရောဂါလက္ခဏာများကို တိုက်ဖျက်ရာတွင် အကျိုးသက်ရောက်မှု လျော့နည်းသွားသည်ဟု ကမ္ဘာ့ကျန်းမာရေးအဖွဲ့ကြီးက ဖော်ပြခဲ့သည်။
သို့သော်လည်း ဖိုက်ဇာ ကာကွယ်ဆေးကိုတတိယအကြိမ် ထိုးပြီးပါက ကာကွယ်ဆေး၏ စွမ်းဆောင်ရည် မြင့်လာသည်ကို တွေ့ရှိရကြောင်း ဖော်ပြခဲ့သည်။
သို့သော်လည်း အချက်အလက်ရရှိမှုမှာ အကန့်သတ်များ ရှိနေသေးသည့်အတွက် လုံလောက်သည့်သက်သေပြချက်မျိုး မရှိသေးပေ။ အိုမီခရွန်မျိုးကွဲ ကူးစက်မှုမှာ နိုင်ငံပေါင်း ၈၉ နိုင်ငံတွင် တွေ့ရှိရသည်ဟုလည်း ကမ္ဘာ့ကျန်းမာရေးအဖွဲ့ ကြီးကပြောသည်။ အိုမီခရွန်ပျံ့နှံ့မှုမှာ ဒယ်လ်တာကူးစက်မှုထက် ပို၍ လျင်မြန်ကြောင်း ပြောခဲ့သည်။
အင်န်အိတ်ချ်ကေ
