နေပြည်တော် ၂၇ ဇူလိုင်
ပြန်ကြားရေးဝန်ကြီးဌာန ဝန်ကြီးရုံးနှင့် ပြန်ကြားရေးနှင့် ပြည်သူ့ဆက်ဆံရေးဦးစီးဌာန မိသားစု၏ (၁၃) ကြိမ်မြောက် ဝါဆိုသင်္ကန်းဆက်ကပ်လှူဒါန်းပွဲ အခမ်းအနားကို ဇူလိုင် ၂၇ ရက် နံနက် ၉ နာရီခွဲက ပျဉ်းမနားမြို့ ရတနာသိဒ္ဓိ ကျောင်းတိုက်၌ ကျင်းပရာ ပြည်ထောင်စုဝန်ကြီး၊ ဒုတိယဝန်ကြီးနှင့် ဌာနဆိုင်ရာ အကြီးအကဲများ တက်ရောက်ကြသည်။
အခမ်းအနားကို နမောတဿ သုံးကြိမ်ရွတ်ဆို ဖွင့်လှစ်ပြီး ရတနာ သိဒ္ဓိ ပရိယတ္တိ စာသင်တိုက် ပဓာန နာယက ဆရာတော် ဘဒ္ဒန္တ ကုသလ အရှင်သူမြတ်ထံမှ ငါးပါးသီလခံယူဆောက်တည်ပြီး ပရိတ်တရားတော် နာယူကြသည်။
အခမ်းအနားတွင် ပြည်ထောင်စုဝန်ကြီး ဒေါက်တာဖေမြင့်နှင့် ဇနီး ဒေါ်ခိုင်နွယ်ဦးတို့က ပဓာနနာယက ဆရာတော်ထံ ဝါဆိုသင်္ကန်းနှင့် လှူဖွယ်ဝတ္ထုပစ္စည်းတို့ကို ဆက်ကပ်လှူဒါန်းပြီး ဒုတိယဝန်ကြီး ဦးအောင်လှထွန်းနှင့် ဇနီး ဒေါ်ခင်ညွန့်တို့က သံလမ်းကျောင်းတိုက် ဆရာတော် ဘဒ္ဒန္တ ဉာဏဝံသ အရှင်သူမြတ်ထံ ဝါဆိုသင်္ကန်းနှင့် လှူဖွယ်ဝတ္ထုများ ဆက်ကပ်လှူဒါန်းကြသည်။
ဆက်လက်ပြီး အမြဲတမ်းအတွင်းဝန်၊ ဌာနဆိုင်ရာ အကြီးအမှူးများက ပင့်သံဃာများအား ဝါဆိုသင်္ကန်း ဆက်ကပ်လှူဒါန်းပြီး တိုင်းသံဃာ့ဝန်ဆောင်၊ သံလမ်းကျောင်းတိုက်ဆရာတော်ထံမှ အနုမောဒနာတရား နာယူ၊ ရေစက်သွန်းချ အမျှပေးဝေခဲ့ကြောင်း သိရသည်။
MDN