နေပြည်တော် ၁၇ ဒီဇင်ဘာ
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးသည် ကုလသမဂ္ဂ မြို့ရွာနှင့် အိုးအိမ်ဖွံ့ဖြိုးတိုးတက်ရေးအဖွဲ့ (UN – Habitat)မှ အာရှနှင့် ပစိဖိတ်ဒေသဆိုင်ရာ ညွှန်ကြားရေးမှူး Mr. Atsushi Koresawa နှင့်အဖွဲ့အား ယနေ့မွန်းလွဲပိုင်းတွင် ဝန်ကြီးရုံး မေခလာခန်းမ၌ တွေ့ဆုံသည်။
တွေ့ဆုံစဉ် သဘာဝဘေးအန္တရာယ်ကြောင့် ထိခိုက်ဆုံးရှုံးနိုင်ခြေလျော့ပါးရေးနှင့် ဘေးဒဏ်ကြံ့ကြံ့ခံနိုင်မှုမြင့်မားရေးအတွက် နည်းပညာဆိုင်ရာ၊ ကျွမ်းကျင်မှုပိုင်းဆိုင်ရာနှင့် ဝန်ထမ်းများစွမ်းဆောင်ရည်မြှင့်တင်ရေးတို့တွင် ပူးပေါင်းဆောင်ရွက်နေမှုများနှင့် ဆက်လက် တိုးချဲ့ဆောင်ရွက်နိုင်မည့်အခွင့်အလမ်းများ၊ ကမ္ဘာမြေစောင့်ကြည့်လေ့လာရေးနှင့် အာကာသ အခြေပြု နည်းပညာများအသုံးပြု၍ သဘာဝဘေးအန္တရာယ်ဆိုင်ရာ သတင်းအချက်အလက် ရယူခြင်း၊ ဂြိုလ်တုပုံရိပ်သုံးနည်းပညာနှင့် ပထဝီဝင်သတင်းအချက်အလက်စနစ် တို့ကို ပေါင်းစပ်အသုံးပြု၍ သဘာဝဘေးအန္တရာယ် စီမံခန့်ခွဲမှုဆိုင်ရာများတွင် အသုံးပြုနိုင်ရေး ပူးပေါင်းဆောင်ရွက်နေမှုများ၊ ရခိုင်ပြည်နယ်တွင် နေရပ်စွန့်ခွာသူများ ပြန်လည်လက်ခံရေး အတွက် လိုအပ်သော အဆောက်အဦများ တည်ဆောက်ရာတွင် ပါဝင်ကူညီပေးနိုင်မည့် ကိစ္စ ရပ်များ၊ ပြည်တွင်းနေရပ်စွန့်ခွာသူများ ပြန်လည်နေရာချထားရေးနှင့် IDP စခန်းများ ပိတ်သိမ်းရေးဆိုင်ရာ အမျိုးသားအဆင့် မဟာဗျူဟာ လမ်းညွှန်ချက်များ နှင့်အညီ Conflict Sensitive ချဉ်းကပ်မှုဖြင့် ဆောင်ရွက်သွားမည့်အခြေအနေများ၊ ပြန်လည်နေရာချထားရေးတွင် အရေးပါသည့် လူမှုသဟဇာတမျှတရေးကို ဦးတည်ဆောင်ရွက်သွားမည့် အစီအစဉ်များ၊ UN - Habitat အဖွဲ့အစည်းနှင့် ပူးပေါင်းဆောင်ရွက်သွားမည့်အစီအစဉ်များကို ဆွေးနွေးကြသည်။
(သတင်းစဉ်)
