ပုစွန်ကဏန်းဟင်းဆိုတာက ရေချိုပုစွန်တုပ်ကြီးတွေကို ကဏန်းမဆလာချက်သလို အခွံမသင်ဘဲ ချက်ရတဲ့ဟင်းလျာပါ။ ကဏန်း မဆလာချက်နဲ့ ကွဲပြားတာက မဆလာလို အသင့်ဖော်စပ်ထားတဲ့ ဟင်းခတ်အမွှေးအကြိုင်မျိုးတွေမသုံးဘဲ သဘာဝဟင်းခတ် အရွက်များနဲ့သာ သောက်ဆမ်းပုံစံမျိုး ချက်ရပါတယ်။ ပုစွန်ကို ခြေလက်တွေသာဖြုတ်ပြီး ပဉ္စငါးပါးလုံးလိုလိုကို အရည်သောက်ချက်တာမို့ ပင်ကိုဟင်းအရသာကိုက အလွန်ချိုပါတယ်။
ပုစွန်ကဏန်းဟင်းချက်ပြီဆိုရင် မပါမဖြစ် သုံးရတာက ပင်စိမ်းလို၊ ရှမ်းနံနံလိုမျိုး ဟင်းခတ်အရွက်တွေပါ။ ပုစွန်ကဏန်းဟင်းကို ချောင်းမြောင်းပေါပြီး ပုစွန်တုပ်အများအပြား ထွက်တဲ့ ဧရာဝတီတိုင်းဒေသကြီး၊ ပဲခူးတိုင်း ဒေသကြီးတွေမှာ ချက်လေ့ရှိပါတယ်။ ရေချိုပုစွန်တုပ်ဆိုရင် အများအားဖြင့် အခွံသင်ပြီး ဆီပြန်ဟင်းသာ အချက်များကြတာပါ။ အခုလို ရေချိုသောက်ဆမ်း ချက်တဲ့အခါမှာလည်း ပုစွန်တုပ်ရဲ့အရသာကို တစ်နည်းတစ်ဖုံ ထူးခြားစေတယ်လို့ ဆိုရပါမယ်။
ပုစွန်တုပ်ပေါတဲ့ဒေသတွေမှာက ကြော်စား၊ လှော်စား၊ ပြုတ်စား၊ မီးဖုတ်စားတာတွေအပြင် ပုစွန်တုပ်ကို အစိမ်းတောင်သုပ်စားကြပါတယ်။ ပုစွန်တုပ်ဟာ တန်ဖိုးကြီးမားပြီး အရသာကောင်းတဲ့ ဟင်းဖြစ်တာကြောင့် ဧည့်ခံတဲ့ပွဲတွေမှာ အထူးဟင်းလျာအဖြစ် ထည့်သွင်းလေ့ရှိကြပါတယ်။ ပုစွန်တုပ်ရဲ့ အကျိုးဂုဏ်ကို ဥတုဘောဇနသင်္ဂဟကျမ်းမှာ ပုစွန်တုပ်သည် ဆိမ့်၏။ ကြေခဲ၏။ အားကို ပွားစေတတ်၏။ အဆီနာ၊ သည်းခြေနာ၊ သွေးနာတို့ကိုနိုင်၏။ သုက်ကိုပွားစေတတ်၏။ နှုတ်ကိုမြိန်စေ၏။ လေ၊ သလိပ်တို့ကို ပျက်စေတတ်၏လို့ ဖော်ပြထားပါတယ်။
ပုစွန်ကဏန်းဟင်းချက်မယ်ဆိုရင် လက်မနဲ့ခြေချောင်းတွေကို ဖယ်ရပါမယ်။ ပုစွန်တုပ်ကြီးခဲ့ရင်တော့ ပုစွန်လက်မကြီးတွေမှာ အသားတွေပါလို့ ကြေသွားအောင် အနည်းငယ်ထုပြီး ဟင်းထဲထည့်ချက်ကြပါတယ်။ ပြီးရင် ဦးခေါင်းပိုင်းက လွှသွားပါတဲ့ ဦးချိုအရင်း လောက်ကနေ ကတ်ကြေးနဲ့ဖြတ်ပြီးရင် ဦးချိုထိပ်အချွန်နဲ့ ဖြတ်ထားတဲ့နေရာမှာ တစ်ပိုင်းတစ်စပေါ်နေတဲ့ အစာဟောင်းအိမ်ကို အသာကော်ယူပြီး ထုတ်လိုက်ပါ။ အားလုံးပြီး သွားရင် ဦးခေါင်းထဲကအဆီတွေ မထွက်ရအောင် ရေပေါပေါမှာ အသာလှုပ်ဆေးပြီး ရေစစ်ထားပါ။
ဆီအိုးတည်ပြီးလို့ ဆီသေရင် ငရုတ်၊ ကြက်သွန်ဖြူ၊ ကြက်သွန်နီထောင်းပြီးသား အရောကို ဆီသတ်၊ ရွှေရောင်သမ်းလာပြီဆိုရင် သန့်စင်ထားတဲ့ ပုစွန်တုပ်များထည့်ပြီး ဆား၊ နနွင်း၊ ငံပြာရည်သင့်ရုံဖျန်းပြီး အသာမွှေပါ။ ပုစွန်အကွေး ငါးအနွေးဆိုတဲ့အတိုင်း အိုးထဲက ပုစွန်တုပ်တွေ ကွေးသွားတာနဲ့ ပုစွန်အခွံတွေ ဟာ စားချင့်စဖွယ် အနီရောင်ရဲရဲကို ချက်ချင်းပြောင်းသွားပါတယ်။ ပြီးရင်ပုစွန်တွေ မြုပ်အောင်ရေထည့်ပြီး ဟင်းအိုးဆူအောင်စောင့်ပါ။ ဟင်းရေဆူလာရင်တော့ အပေါ့၊ အငန်မြည်း အသင့်ပြင်ထားတဲ့ ပင်စိမ်း (သို့မဟုတ်) ရှမ်းနံနံခတ်၊ ငရုတ်သီးစိမ်းသုံးလေး တောင့်လောက် ထက်ခြမ်းခွဲပြီး အုပ်ပါ။ မကြာခင်မှာပဲ ပင်စိမ်းနံ့တသင်းသင်းနဲ့ ပုစွန်ကဏန်းရေချိုဟင်းရနံ့တွေ သင်းပျံ့လာပါတော့မယ်။
စံလွင် (ငါးဦးစီး)
