နေပြည်တော် ၃၀ ဇန်နဝါရီ
မုံရွာမြို့ ဒေါနခြံရပ်ကွက်ရှိ ရှေးဟောင်းမြန်မာစာပေ ရေးရာဌာနကို နိုင်ငံတော်နှင့် ကျောင်းသူ၊ ကျောင်းသားများအတွက် အကျိုးရှိစွာ ဆောင်ရွက်နိုင်ရန် စစ်ကိုင်းတိုင်းဒေသကြီး အစိုးရအဖွဲ့နှင့် ပညာရေးဝန်ကြီးဌာနတို့ ညှိနှိုင်းပြီး ဆက်လက်ဆောင်ရွက်သွားမယ်လို့ ပညာရေးဝန်ကြီးဌာန ဒုတိယဝန်ကြီး ဦးဝင်းမော်ထွန်းက ပြောပါတယ်။
မုံရွာမြို့ ဒေါနခြံရပ်ကွက်ရှိ ရှေးဟောင်းမြန်မာစာပေ ရေးရာဌာနကို ကျောင်းသား၊ ကျောင်းသူတို့၏ အကျိုး၊ နိုင်ငံတော်၏ အကျိုးအတွက် ပြန်လည်ဖွင့်လှစ်ရန် အစီအစဉ်ရှိ၊ မရှိ သိလိုကြောင်း မုံရွာမဲဆန္ဒနယ်မှ ဦးညွန့်အောင်၏ မေးမြန်းမှုကို ဒုတိယဝန်ကြီး ဦးဝင်းမော်ထွန်းက ယနေ့ကျင်းပတဲ့ ပြည်သူ့လွှတ်တော် အစည်းအဝေးမှာ ပြန်လည်ဖြေကြားခဲ့တာ ဖြစ်ပါတယ်။
ရှေးဟောင်း မြန်မာစာပေရေးရာဌာနကို ၁၅-၇-၂၀၁၄ တွင် စတင်ဖွင့်လှစ်ခဲ့ပြီး ရှေးဟောင်း မြန်မာစာပေရေးရာနဲ့ ပတ်သက်တဲ့ တန်ဖိုးရှိ ပုရပိုက်များ၊ ပေစာများ၊ ကျောက်စာချပ်များ၊ ရှေးဟောင်း စာပေအထောက်အထားများ၊ ရှေးဟောင်း ပန်းချီကားချပ်များနဲ့ ဓာတ်ပုံများကို စနစ်တကျ သိမ်းဆည်းထားရှိခဲ့တယ်လို့ ဒုတိယဝန်ကြီးက ပြောပါတယ်။
အဆိုပါ ရှေးဟောင်းပစ္စည်းများကို မူလပိုင်ရှင်များမှ ပြန်လည်တောင်းခံလာတဲ့အတွက် ပြန်လည်ပေးအပ်ရန် တိုင်းဒေသကြီး အစိုးရအဖွဲ့မှတစ်ဆင့် မုံရွာတက္ကသိုလ်သို့ ၂၃-၅-၂၀၁၆ ရက်နေ့က စာဖြင့် ညွှန်ကြားခဲ့ပြီး ၁-၇-၂၀၁၆ ရက်နေ့တွင် မူလပိုင်ရှင်များထံ ပြန်လည်လွှဲပြောင်းရန် ဆောင်ရွက်ခဲ့တယ်လို့ ဆိုပါတယ်။
ရှေးဟောင်းမြန်မာစာပေ ရေးရာဌာနတွင် ယခင်က မြန်မာ့လူမှုရေးနှင့် စာပေယဉ်ကျေးမှု စွမ်းရည်သင်တန်းများ ပို့ချခြင်း၊ ရှေးဟောင်းပစ္စည်း လေ့လာခြင်းများ ဆောင်ရွက်ခဲ့သော်လည်း ယခုအချိန်မှာတော့ မည်သည့် သင်တန်းမှ ဖွင့်လှစ် ဆောင်ရွက်နိုင်ခြင်း မရှိတော့ဘူးလို့ ဒုတိယဝန်ကြီး ဦးဝင်းမော်ထွန်းက ပြန်လည် ဖြေကြားရာတွင် ထည့်သွင်း ပြောကြားခဲ့ပါတယ်။
မျိုးထက်ဦး (MDN)
