တောင်ကြီး ၂၂ မေ
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ရှမ်းပြည်နယ် လူမှုဝန်ထမ်း ဦးစီးဌာနနှင့် ကျန်းမာရေးဦးစီးဌာနတို့ ပူးပေါင်း၍ ရှမ်းပြည်နယ်တောင်ပိုင်းအတွင်းရှိ စေတနာ့ဝန်ထမ်းများအား စေတနာ့ဝန်ထမ်းနည်းပြများ (TOT) ဆင့်ပွားသင်တန်း ဖွင့်လှစ်ပို့ချခြင်းကို ယနေ့ နံနက် ၉ နာရီတွင် တောင်ကြီးမြို့ မြို့တော်ခန်းမ ကျင်းပသည်။
ရှေးဦးစွာ ရှမ်းပြည်နယ်အစိုးရအဖွဲ့ဝင် ဗမာတိုင်းရင်းသားလူမျိုးရေးရာဝန်ကြီး ဒေါက်တာအောင်သန်းမောင်က သင်တန်းဖွင့်လှစ်ရခြင်းနှင့် စပ်လျဉ်း၍ အဖွင့်အမှာစကားပြောကြားပြီး ရှမ်းပြည်နယ် အမျိုးသမီးရေးအဖွဲ့ဥက္ကဋ္ဌ ရှမ်းပြည်နယ်အစိုးရအဖွဲ့ အတွင်းရေးမှူး၏ ဇနီး ဒေါ်စိမ်းစိမ်းစိုးနှင့် တာဝန်ရှိသူများက စေတနာ့ဝန်ထမ်းအဖွဲ့များအား ကျန်းမာရေးအထောက်အကူပြုပစ္စည်းများ ပေးအပ်သည်။
အဆိုပါသင်တန်းသို့ ရှမ်းပြည်နယ်တောင်ပိုင်းမြို့နယ်များမှ စေတနာ့ဝန်ထမ်း(၆၀)ဦး တက်ရောက်ကြပြီး သင်တန်းတွင် ဝန်ဆောင်မှုပေးခြင်း၊ ရောဂါကာကွယ်ခြင်း နည်းလမ်းများ၊ ပတ်ဝန်းကျင် သန့်ရှင်းရေးအကြောင်း၊ စိတ်ဓာတ်မြှင့်တင်ရေးနှင့် လူမှုပိုင်းဆိုင်ရာ ပံ့ပိုးမှုပေးခြင်း၊ အမျိုးသမီးများအပေါ် အကြမ်းဖက်မှုများ၊ ခွဲခြားနှိမ့်ချဆက်ဆံခြင်း၊ ပြောဆိုဆက်သွယ် ဆောင်ရွက်မှုဆိုင်ရာ ကျွမ်းကျင်မှုဘာသာရပ်များအား မြန်မာနိုင်ငံဆရာဝန်များအသင်းမှ ကလေးအထူးကုဆရာဝန်ကြီး (အငြိမ်းစား) ဒေါက်တာသန်းထိုက်၊ ဒေါက်တာဇော်လင်းဖေနှင့် တာဝန်ရှိသူများက ဘာသာရပ်အလိုက် သင်တန်းပို့ချခဲ့ကြကြောင်း သိရသည်။
စိုးညွန့်ရွှေ(ပြန်/ဆက်)
