ရန်ကုန်၊ ၁၈ ဒီဇင်ဘာ
ရန်ကုန်တောင်ပိုင်းခရိုင် သန်လျင်မြို့နယ် ကြက်ခြေနီအသင်းခွဲ၏ လူမှုကရုနာလုပ်ငန်းများ ပိုမို လုပ်ဆောင်နိုင်ရန်အတွက် နှစ်ဖက်မိဘများအား အမှုထား၍ သန်လျင်မြို့နယ်၊ ဗိုလ်ချုပ်ကျေးရွာ၊ နယ်မြေ (၁၅)၊ တောရကျောင်းလမ်းနေ အလှူရှင် ဦးဇော်ဝင်း (ဇနီး) ဒေါ်ချောစုလှိုင်၊ (သား) မောင်ဇော်ပိုင်ထက် (သမီး) မအိမ့်ချစ်ပိုင် မိသားစုမှ သားဖြစ်သူ မောင်ဇော်ပိုင်ထက် (၁၉) နှစ်ပြည့် မွေးနေ့အလှူအဖြစ် မြို့နယ်ကြက်ခြေနီအသင်းခွဲအား အသက်ကယ် အောက်စီဂျင်အိုးနှင့် AMBULANCE လူနာတင်ယာဉ် တစ်စီး ပေးအပ်လှူဒါန်းပွဲ အခမ်းအနားကို ဒီဇင်ဘာ ၁၈ ရက် နံနက် ၁၀ နာရီက သန်လျင်မြို့နယ်၊ ထန်းပင်ကုန်းရပ်ကွက်၊ စတုဘုမ္မိက မဟာသတိပဌာန်ကျောင်းတိုက်၌ ကျင်းပသည်။
လှူဒါန်းပွဲအခမ်းအနားတွင် သန်လျင်မြို့နယ် ကြက်ခြေနီအသင်းခွဲ ဥက္ကဋ္ဌ ဦးဆန်းလင်းနိုင်က မြို့နယ်ကြက်ခြေနီအသင်းခွဲ၏ လူမှုကရုနာလုပ်ငန်း ဆောင်ရွက်နေမှုများအား ရှင်းလင်းလျှောက်ထား၍ အလှူရှင်မိသားစုမှ အသက်ကယ် အောက်စီဂျင်အိုးများနှင့် လူနာတင်ယာဉ်တစ်စီးအား ကြက်ခြေနီအသင်းခွဲထံသို့ ပေးအပ်လှူဒါန်းရခြင်းအား လျှောက်ထားခဲ့ကြသည်။
ဆက်လက်၍ အလှူရှင်မိသားစုမှ ဆရာတော်ကြီးများအား ဆွမ်းဆန်တော်၊ ဆီနှင့် နဝကမ္မ အလှူ ငွေများအား ဆက်ကပ်လှူဒါန်းပြီး သန်လျင်မြို့နယ် ကြက်ခြေနီအသင်းခွဲသို့ အသက်ကယ် အောက်စီဂျင်အိုး ၆ လုံး၊ လူနာတင်ယာဉ်နှင့် သက်ဆိုင်သော ပိုင်ဆိုင်မှုစာရွက်စာတမ်းများအား လွဲပြောင်းပေးအပ်ရာ သန်လျင်မြို့နယ် ကြက်ခြေနီအသင်းခွဲဥက္ကဋ္ဌ ဦးဆန်းလင်းနိုင်က လက်ခံရယူပြီး အလှူရှင် မိသားစုအား ဂုဏ်ပြုမှတ်တမ်း ပြန်လည်ပေးအပ်ခဲ့သည်။
ထို့နောက် ဆရာတော်ကြီးများထံမှ အလှူရှင်မိသားစုနှင့် ဧည့်ပရိတ်သတ်များက လှုဒါန်းမှုအစုစုအတွက် ရေစက်သွန်းချ တရားတော်နာယူခဲ့ကြပြီး အခမ်းအနားအား ဗုဒ္ဓသာသနာ စိရံတိဋ္ဌတု သုံးကြိမ်ရွတ်ဆို ရုပ်သိမ်း၍ ဆရာတော်ကြီးများအား နေ့ဆွမ်းနှင့်အချိုပွဲများ ဆက်ကပ်လှူဒါန်းခဲ့ကြောင်း သိရသည်။
အဆိုပါ အသက်ကယ် အောက်စီဂျင်အိုးနှင့် လူနာတင်ယာဉ်တစ်စီး ပေးအပ်လှူဒါန်းခြင်းအား ကျန်းမာရေးနှင့်အားကစားဝန်ကြီးဌာနမှ ကိုဗစ် (၁၉) ကာလ ထုတ်ပြန်ထားသော စည်ကမ်းများနှင့်အညီ ပြုလုပ်ခဲ့ကြောင်း သိရသည်။
သက်ခိုင် (သန်လျင်)
