နေပြည်တော် ၁ မေ
သန့်ရှင်းသောသောက်သုံးရေသည်
• အနည်အမှုန်ကင်းရမည်။
• ကျန်းမာရေးထိခိုက်စေသော ပိုးမွှားကင်းစင်ရမည်။
• အရောင်အဆင်း အနံ့အရသာကင်းရမည်။
• ဓါတ်သတ္တုများ ပါဝင်သင့်သည့် ပမာဏထက်မပိုရ။
ရောဂါပိုးပါသည့်ရေကိုသောက်သုံးမိသည့်အတွက်
ဝမ်းပျက်၊ဝမ်းလျှောရောဂါ၊ ကာလဝမ်းရောဂါ၊ အူရောင်ငန်းဖျားရောဂါ၊ အသည်းရောဂါ၊ အသည်းရောင် အသားဝါးရောဂါ၊ပိုလီယိုရောဂါ စသည့် ဝမ်းနှင့်ပတ်သက်သည့်ရောဂါများ ဖြစ်ပွားနိုင်ပါသည်။
သောက်သုံးရေကို ညစ်ညမ်းစေသော ကြောင်းအရင်းများ
• သောက်သုံးရေကန် စတင်တည်ဆောက်စဉ်က စနစ်တကျ မရှိခဲ့ခြင်း
• သောက်သုံးရေကန်မှ ရေယူသုံးစွဲပုံစနစ် မှန်ကန်မှုမရှိခြင်း
• သောက်သုံးရေကန် သန့်ရှင်းမှုရှိစေရန် သတိပေးနှိုးဆော်ချက်များကို လိုက်နာကျင့်သုံးမှု မရှိခြင်း
• သောက်သုံးရေကန် အနီးဝန်းကျင်တွင် မစင်၊ အညစ်အကြေးနှင့် စွန့်ပစ်ပစ္စည်းများရှိနေခြင်း
• စနစ်တကျတည်ဆောက်ပြီးသော သောက်သုံးရေကန်များကို ရေရှည်ထိန်းသိမ်းပြုပြင်မှုမရှိခြင်း
• သန့်ရှင်းစနစ်ကျသော သောက်သုံးရေတွင်းဖြစ်စေရန်အတွက် ရေတွင်းတူးရန် မြေနေရာကို ရွေးချယ်ရာ၌ မှန်ကန်မှုမရှိခြင်း
• အညစ်အကြေးစွန့်ပစ်သောနေရာနှင့် ပေ(၅၀) ဝေးကွာပြီး မြင့်သောအပိုင်းတွင်ရှိရမည်။ အထူးသဖြင့် အိမ်သာ၊ အမှိုက်သရိုက်နှင့် ရေဆိုးများစွန့်ပစ်သည့်နေရာထက် မြင့်သော အပိုင်းတွင်ရှိရမည်။
• ရေဝပ်ရေလျှံသောနေရာ လုံးဝ(လုံးဝ) မဖြစ်စေရ။
သောက်သုံးကန်သန့်ရှင်းရေးလုပ်ငန်းများ
ရေ ရယူသုံးစွဲပုံစနစ်
• ရေကန်အတွင်းမှ ရေကို ရယူသုံးစွဲရန် ကန်ဘောင်ပြင်ပတွင် လက်နိုပ်တုံကင် တပ်ဆင်၍ ရေကန်အတွင်းသို့ ရေပိုက်ဆက်သွယ်ကာ ရယူသုံးစွဲနိုင်ပါသည်။
• ရေကန်အတွင်းသို့ လူကိုယ်တိုင်ဝင်ရောက်၊ ခပ်ယူ၊ သယ်ဆောင်ခြင်း လုံးဝ မပြုလုပ်ရပါ။
ကလိုရင်ဆေးခပ်ခြင်း
ကလိုရင်းဓါတ်ငွေ့ကို ရေထဲသို့ပျံ့နှံ့သွားအောင် ပြုလုပ်ခြင်းသည် ရောဂါဖြစ်စေသည့် ပိုးမွှားများအား သေကြေပျက်စီးစေနိုင်သည့် နည်းလမ်းဖြင့် ထိန်းချုပ်ခြင်းဖြစ်သောကြောင့် သောက်သုံးရန် သင့်လျော်သော ရေကောင်းရေသန့် ရရှိခံစားရန်အတွက် ဆောင်ရွက်ပေးသော ရေသန့်စင်ရေး နည်းလမ်းကောင်းတစ်ရပ်ဖြစ်ပါသည်။
• ရေတွင်းအသစ်တူးပြီးလျှင်၊ ရေတွင်းဆေးကြောပြီးလျှင်၊ ပြင်ပရေဝင်လျှင်၊ ဒေသအခြေအနေအရ ယခင်နှစ်များတွင် ဝမ်းပျက်၊ ဝမ်းလျှောရောဂါဖြစ်ပွားသည့် ကာလမတိုင်မီ၊ ဝမ်းလျှောရောဂါဖြစ်ပွားသည်/ ဖြစ်ပွားနိုင်သည်ဟု သံသယရှိသောအခါ၊ ရေတွင်းထဲသို့ ညစ်ညမ်းသော ရေဝင်ရောက်သည့်အချိန်နှင့် မိုးရွာပြီးသည့်အချိန်များတွင် ကလိုရင်းခပ်ပေးရပါမည်။
• ရေအရည်အသွေးနှင့် ရေပမာဏကိုလိုက်၍ ဆေးခပ်ပေးရပါမည်။ နီးစပ်ရာ ကျန်းမာရေးဦးစီးဌာနနှင့် ဆက်သွယ်ဆောင်ရွက်နိုင်ပါသည်။
• မြေသားကန်အတွင်းသို့ တိုက်ရိုက်ဆေးမခပ်ရပါ။ သိုလှောင်ထားသော ရေသိုလှောင်ကန်၊ စဉ့်အိုး၊ ရေပုံး စသည်များသို့ ဆေးခပ်ပေးရပါမည်။ လက်တူးရေတွင်းသို့ တိုက်ရိုက်ဆေးခပ်နိုင်ပါသည်။
ကလိုရင်းဆေးခပ်နည်း
• ရေကန်ရှိ ရေဂါလန်ပေါင်း တွက်ချက်နိုင်ရန် ရေကန်၏ အလျား၊ အနံ(အချင်း)နှင့် ရေအနက်ကို ပေဖြင့် တိုင်းတာပါ။ ရေဂါလန်ပေါင်းကို လေးထောင့်ကန်အတွက် အလျား × အနံ × ရေအနက် × ၆.၂၅ ဖြင့်လည်းကောင်း၊ အဝိုင်းကန်အတွက် ၅ × အချင်း × အချင်း × ရေအနက်ဖြင့်လည်းကောင်း တွက်ရမည်။
• ကလိုရင်း (၂၅-၃၅) ရာခိုင်နှုန်းပါသော ဘလိတ်ချင်းပေါင်ဒါကို အသုံးပြုပါက ရေဂါလံတစ်ထောင်လျှင် ဆေးမှုန့် အောင်စဝက်မှ တစ်အောင်စ (ဟင်းစတီးစားဇွန်း တစ်ဇွန်းမှ နှစ်ဇွန်း) နှုန်းဖြင့်လည်းကောင်း၊ ကလိုရင်း (၆၅-၇၀) ရာခိုင်နှုန်းပါသော ဘလိချင်းပေါင်ဒါကို အသုံးပြုပါက ရေဂါလံတစ်ထောင်လျှင် ဆေးမှုန့် ၄ပုံ၁ပုံ အောင်စမှ အောင်စဝက် (ဟင်းစားစတီးဇွန်း ဇွန်းဝက်မှ တစ်ဇွန်း)နှုန်းဖြင့် လည်းကောင်း ဆေးပမာဏကို တွက်ရမည်။
• ထို့နောက် ရေပုံးတွင် လက်နှစ်လုံးခန့်လျှော့၍ ရေဖြည့်ပါ။ ခွက်ငယ်တစ်ခုတွင် လိုအပ်သောဆေးပမာဏကို ချိန်ထည့်ပြီး ရေအနည်းငယ်ကိုထည့်၍ မုန့်နှစ်ရည်ကဲ့သို့ ဖြစ်အောင်မွှေပါ။ ၎င်းဆေးဖျော်ရည်အား ရေဖြည့်ထားသော ရေပုံးထဲသို့ထည့်၍ သမအောင်မွှေပါ။
• ရေပုံးကို ရေကန်ထဲသို့ (၂) ပေခန့် မြုပ်အောင်နှစ်ပြီး နေရာအနှံ့ နိမ့်ချည်မြင့်ချည်ပြုလုပ်ပါ။ ရေပုံးကို ပြန်ဆွဲတင်ပြီး ရေပုံးထဲမှရေကို ရေကန်ထဲသို့ ဖြေညှင်းစွာလောင်းချပါ။
• ဆေးခပ်ပြီး မိနစ် (၃၀) အကြာတွင် ကလိုရင်းအကြွင်းအနံ့ရှိ၊ မရှိ စမ်းသပ်ပါ။ အကယ်၍ ကလိုရင်း အကြွင်းအနံ့မရှိပါက ပထမဆေးခပ်သည့်အတိုင်း ဆေးပမာဏတစ်ဝက်ခန့်ကို ထပ်ခပ်ပါ။ ကလိုရင်းအကြွင်း/အနံ့ရှိကြောင်း သိရှိပါက ကလိုရင်းဆေးခပ်ခြင်းပြီးမြောက်၍ အသုံးပြုနိုင်ပြီဖြစ်သည်။
သောက်ရေအိုးများတွင် အသင့်ဖျော်ထားသော ကလိုရင်းဆေးခပ်နည်း
ဘလိချင်းပေါင်ဒါဆေးမှုန့် ဟင်းစားဇွန်း(၂) ဇွန်းကို ရေတစ်လီတာဘူးနှင့် ဖျော်ပါ။
ရေတစ်ဂါလံတွင် ၎င်းဆေးဖျော်ရည်ကြည် လက်ဖက်ရည်ဇွန်း(၁) ဇွန်းနှုန်းဖြင့် သောက်ရေအိုးထဲသို့ ခပ်၍ သုံးပါ။ ဆေးရည်ခပ်ပြီး အနည်းဆုံး (၃၀)မိနစ်ကြာပြီးမှ သောက်သုံးသင့်ပါသည်။
ကလိုရင်းအကြွင်း(Chlorine residual)ရှိ/မရှိ စမ်းသပ်နည်း
နည်း(၁) အနံ့ခံနည်း - ဆေးအသုံးမပြုသော ပုံး၊ ခွက်၊ လက်ဖြင့် ရေကိုယူ၍ အနံ့ခံစမ်းသပ်ပါ။ အနံ့ရှိလျှင် အကြွင်းရှိသည်။
နည်း(၂) ကလိုရင်းဆေးခပ်ပြီး ရေတွင် ပိုတက်စီယမ်အိုင်အိုဒိုက် နှစ်ခဲ(သို့)သုံးခဲ ထည့်မွှေ၍ ထမင်းရည် ထည့်လိုက်လျှင် မိုးပြာရောင်ပြပါက အကြွင်းရှိပါသည်။
နည်း(၃) ခေတ်မီ ကလိုရင်းအကြွင်းအနံ့ စမ်းသပ်ခံကိရိယာများဖြင့်လည်း စမ်းသပ်နိုင်ပါသည်။
ရေကန်ကို သန့်ရှင်းခြင်း
• ရေကန်အတွင်းရှိပေါင်းပင်၊ မှော်ပင်များကိုပုံမှန်ရှင်းလင်း ဖယ်ရှားပေးပါ။
• လိုအပ်လျှင်ကန်ထဲရှိ ရေကိုထုတ်၍ ကန်ဆယ်ရမည်။ ဆယ်ရာတွင်အောက်ခြေမြေသား မပေါက်စေရန် သတိပြုပါ။
• ထို့သို့ဆောင်ရွက်မှုများကို ဒေသခံများနှင့် ညှိနှိုင်းဆောင်ရွက်သင့်ပါသည်။
• လက်နှိပ်တုံကင်မှတစ်ဆင့် ရေကန်ပြင်ပ၌ ရေကျကန်ဆောက်လုပ်၍ ရေကိုရယူသုံးစွဲပါ။
သတိပေးဆိုင်းဘုတ်
“ ရေကန်အတွင်းသို့ ဝင်ရောက်ပြီးရေမခပ်ရ။” ဆိုင်းဘုတ်ကို လူအများမြင်သာသည့်နေရာတွင် စိုက်ထူထားရပါမည်။
ယခုဖော်ပြချက်အား ပြည်သူ့ကျန်းမာရေးဦးစီးဌာန၊ ကျန်းမာရေး အသိပညာ မြှင့်တင်ရေးဌာနနှင့် ကုလသမဂ္ဂကလေးများ ရန်ပုံငွေအဖွဲ့တို့ ပူးပေါင်းထုတ်ဝေသည့် ကျန်းမာရေးဆိုင်ရာ စံပြုအချက်အလက်များ စာအုပ်မှ ကူးယူဖော်ပြပါသည်။
MDN
