တန့်ဆည် ၅ နိုဝင်ဘာ
စစ်ကိုင်းတိုင်းဒေသကြီး၊ ရွှေဘိုခရိုင်၊ တန့်ဆည်မြို့ရှိ ဌာနဆိုင်ရာများ (၂၁) ကြိမ်မြောက် စုပေါင်းမဟာဘုံကထိန်ကို ယနေ့ နံနက်ပိုင်းကကျင်းပခဲ့ရာ ဌာနဆိုင်ရာဝန်ထမ်းများက ပင်မစုပေါင်း ပဒေသာပင်နှင့် ကထိန်သင်္ကန်းကို မြို့တွင်းနှင့် လမ်းမကြီးတစ်လျှောက် လှည့်လည် သယ်ဆောင်ခဲ့ကြပြီး တန့်ဆည်မြို့ရှိ ဝင်္ကပါကျောင်းတိုက်သို့ ကထိန်ခင်းလှူဒါန်းခဲ့ကြောင်း သိရသည်။
အဆိုပါ ကျောင်းတိုက်တွင် မြို့နယ်အုပ်ချုပ်ရေးမှူး ဦးခင်မောင်မြင့်နှင့် ဌာနဆိုင်ရာဝန်ထမ်းများက စုပေါင်း၍ သံဃာတော်များထံမှ ကထိန်အလှူရေစက်ချ တရားနာယူခြင်း၊ ကထိန်သင်္ကန်းနှင့် ဆွမ်းအစရှိသည့် လှူဖွယ်ဝတ္ထုများကို ပင့်သံဃာ(၁၄)ပါးတို့အား စုပေါင်းဆက်ကပ် လှူဒါန်းခဲ့ ကြသည်။ စုပေါင်းမဟာဘုံကထိန်ကို နှစ်စဉ်အစဉ်အလာမပြတ် ဆောင်ရွက်ခဲ့ကြပြီး ယခုနှစ် (၂၁) ကြိမ်မြောက် မဟာဘုံကထိန်တွင် ပဒေသာပင်နှင့် ကထိန်သင်္ကန်းလှူဖွယ်ဝတ္ထုများ စုစုပေါင်း ကျပ်(၇၃)သိန်းကျော် လှူဒါန်းနိုင်ခဲ့ကြောင်းသိရသည်။
ငြိမ်းမင်းထွန်း(တန့်ဆည်)
