ဝန်းသို ၁၂ အောက်တိုဘာ
စစ်ကိုင်းတိုင်းဒေသကြီး၊ ဝန်းသိုမြို့နယ်၊ ဂျိုးတောင်အုပ်စု၊ ကျုတော(၂)ကျေးရွာ၌ NEP Phase-1 ဖြင့် ဆောင်ရွက်သည့် မဟာဓာတ်အားလိုင်းနှင့် ကျေးရွာဖွံ့ဖြိုးရေးစီမံကိန်း (VDP)ဖြင့် ဆောင်ရွက်သည့် ကျေးရွာတွင်း လျှပ်စစ်မီးလင်းရေး ဖွင့်ပွဲအခမ်းအနားကို ယမန်နေ့ ညနေ ၅ နာရီက အဆိုပါကျေးရွာရှိ အခြေခံပညာအလယ်တန်းကျောင်း(ခွဲ)၌ ကျင်းပပြုလုပ်ခဲ့ကြောင်း သိရသည်။
အခမ်းအနားတွင် ပြည်သူ့လွှတ်တော်ကိုယ်စားလှယ် ဦးနေစိုးအောင်နှင့် မြို့နယ်စီမံခန့်ခွဲမှု ကော်မတီဥက္ကဋ္ဌ ဦးနေမျိုးထွန်းတို့က အမှာစကားပြောကြားသည်။ ထို့နောက် မြို့နယ်လျှပ်စစ် အင်ဂျင်နီယာ ဦးကျော်ဇေယျက NEP စီမံကိန်းအကြောင်းနှင့် လျှပ်စစ်မီးသုံးစွဲရာတွင် သတိပြုလိုက်နာရမည့် အချက်များကို အသိပညာပေးပြောကြားပြီး မြို့နယ်ကျေးလက်ဦးစီးမှူး ဦးမြတ်မျိုးထွန်းက ကျေးရွာဖွံ့ဖြိုးရေးစီမံကိန်း(VDP) အကြောင်းအရာများကို ရှင်းလင်းပြောကြားခဲ့သည်။
ယင်းနောက် တိုင်းဒေသကြီး လွှတ်တော်ကိုယ်စားလှယ် ဦးဇော်လင်းဦးနှင့် ဒေါ်ခိုင်ခိုင်ဝင်း၊ မြို့နယ်စီမံခန့်ခွဲမှုကော်မတီဥက္ကဋ္ဌ ဦးနေမျိုးထွန်း၊ မြို့နယ်လျှပ်စစ်အင်ဂျင်နီယာ ဦးကျော်ဇေယျနှင့် မြို့နယ်ကျေးလက်ဦးစီးမှူး ဦးမြတ်မျိုးထွန်းတို့က ကျေးရွာလျှပ်စစ်မီးဖွင့်ပွဲမုခ်ဦးအား ဖဲကြိုးဖြတ် ဖွင့်လှစ်ပေးခဲ့သည်။
ယခုလို ကျေးရွာလျှပ်စစ်မီးကို အောင်မြင်စွာဖွင့်လှစ်နိုင်ခဲ့သည့်အတွက် အဆိုပါကျေးရွာရှိ ကျေးရွာနေပြည်သူများအနေဖြင့် လူမှုစီးပွားဘဝ ဖွံ့ဖြိုးတိုးတက်ရေးအတွက် (၂၄)နာရီလျှပ်စစ်မီးကို အကျိုးရှိစွာ အသုံးပြုနိုင်တော့မည် ဖြစ်ကြောင်း သိရသည်။
မြို့နယ် (ပြန်/ဆက်)
