ကဘူး အောက်တိုဘာ ၁၅
အာဖဂန်နစ္စတန်နိုင်ငံ အနောက် ပိုင်း ဟီရတ်စီရင်စု၌ အောက်တိုဘာ ၁၅ ရက် ဒေသစံတော်ချိန် နံနက် ၈ နာရီ ၆ မိနစ်တွင် ပြင်းအား ၆ ဒသမ ၃ အဆင့်ရှိသည့် ငလျင်တစ်ခု လှုပ်ခတ်ခဲ့ကြောင်း အမေရိကန် ဘူမိဗေဒစစ်တမ်းက ဆိုသည်။ ငလျင်သက်ရောက်မှုသည် ၆ ဒသမ ၃ ကီလိုမီတာ အနက်ရှိမည်ဟု ခန့်မှန်းရသည်။
အဆိုပါ ငလျင်လှုပ်ခတ်ခဲ့ပြီးနောက် မိနစ် ၂၀ အကြာတွင် ပြင်းအား ၅ ဒသမ ၄ အဆင့်ရှိသော ငလျင်တစ်ခု ထပ်မံလှုပ်ခတ်ခဲ့ကြောင်း သိရသည်။ မြေငလျင်ကြောင့် တစ်ဦးသေဆုံးပြီး ထိခိုက် ဒဏ်ရာရရှိသူ ၉၀ ရှိကြောင်း သိရသည်။
အလားတူ အောက်တိုဘာ ၇ ရက်က နိုင်ငံအနောက်ပိုင်းရှိ ဟီရတ်စီရင်စု၌ ပြင်းအား ၆ ဒသမ ၃ ရှိသည့် ငလျင်နှစ်ခု လှုပ်ခဲ့ပြီး နောက်လေးရက်ခန့်အကြာတွင် နောက်ထပ်ပြင်းအား ၆ ဒသမ ၃ အဆင့်ရှိ ငလျင်တစ်ခု ထပ်မံလှုပ်ခတ်ခဲ့သည်။
ငလျင်များ ဆက်တိုက်လှုပ်ခတ်မှုကြောင့် ၂၀၀၀ ကျော် သေဆုံးပြီး အိမ်ခြေ ၂၀၀၀ ကျော် ပြိုကျပျက်စီး ခဲ့ကြောင်း တာလီဘန် ယာယီအစိုးရက ပြောကြားခဲ့သည်။
ကိုးကား - အင်န်အိတ်ချ်ကေ
ဘာသာပြန် - အောင်ကျော်ကျော်
