၂၀ ဇွန်
လွှတ်တော်၏ ပြန်လည်သုံးသပ်ချက်မပါရှိပဲ အာရပ်နိုင်ငံ သုံးနိုင်ငံသို့ လက်နက်များရောင်းချမည့်် ထရန့်အစိုးရ၏ကြိုးပမ်းမှုကို တားဆီးရန် အမေရိကန် ဆီးနိတ်လွှတ်တော်က ယနေ့မဲခွဲဆုံးဖြတ်မည်ဖြစ်ကြောင်း သိရသည်။
ဂျော်ဒန်၊ အာရပ်စော်ဘွားများ ပြည်ထောင်စု(ယူအေအီး)နှင့် ဆော်ဒီအာရေဗျနိုင်ငံများသို့ လက်နက်ရောင်းချမှုကို ပိတ်ပင်ရန် ဒီမိုကရက်ထောက်ခံသူ Menendez နှင့် ဆီးနိတ်လွှတ်တော်ခေါင်းဆောင် Mitch McConnell တို့သည် မဲခွဲဆုံးဖြတ်မှုပြုလုပ်ရန် ယနေ့ သဘောတူညီခဲ့ကြသည်ဟု Menendez ၏ ဝက်ဘ်ဆိုက် ဖော်ပြချက်အရ သိရသည်။ အဆိုပါသုံးနိုင်ငံသို့ လက်နက်ရောင်းချမှုနှင့်ပတ်သက်ပြီး လွှတ်တော်၏ပြန်လည်သုံးသပ်မှုကို ရှောင်လွှဲရန် ပြီးခဲ့သည့်မေလက ထရန့်အစိုးရ၏ ဆုံးဖြတ်ချက်ကို ဥပဒေပြုအမတ်များက မကျေနပ်ဖြစ်ကာ ဆန္ဒပြခဲ့ကြသည်။
အီရန်နိုင်ငံ ခြိမ်းခြောက်မှုကို ဟန့်တားရန်အတွက် အာရပ်နိုင်ငံ သုံးနိုင်ငံသို့ အမေရိကန်ဒေါ်လာ ၈ ဒသမ ၁ ဘီလီယံ တန်ဖိုးရှိ လက်နက်များ ပေးပို့ရန် ထရန့်အစိုးရက လက်နက်တင်ပို့မှုထိန်းချုပ်ရေး အက်ဥပဒေဆိုင်ရာ အရေးပေါ်ပြဋ္ဌာန်းချက်ကို အသုံးချမည်ဖြစ်ကြောင်း အမေရိကန်နိုင်ငံခြားရေးဝန်ကြီး မိုက်ပွန်ပီအို က ပြီးခဲ့သည့်မေလက ထုတ်ပြန်ကြေညာခဲ့သည်။
ကိုးကား - ဆင်ဟွာ
ဘာသာပြန် - မြင့်မြင့်ချို
